PĀ GƏ̄ 18
18
Mban̄g kógə̄ḿ rāā Nə́ɓā kə́ra gō tetə rɔ̄ɔ̄ tə́
(Á̰a̰ī 2 Sam 22.1-51)
1Pā kə́ kem makətūbə̄ yā ngār yā gōsə̄ pā gə̄ tə́. I pā yā Dabid kə́ nge kəla yā Kɔ́ɔ̄ɓē. Ni-ɔr̄ najə̄ kə Kɔ́ɔ̄ɓēé kə pāá i gō gān̄g ń Kɔ́ɔ̄ɓē gān̄g dɔn jī Saul tə́ ō, jī madə̄ ba̰ā̰n gə̄ tə́ malang ní ō, əda na:
2Kɔ́ɔ̄ɓē, ḭ̄ i tɔ́gə yāḿ, o̰o̰m̄ tɔdɔ̄í ngá̰ý!
3Kɔ́ɔ̄ɓē i mbal̄ yāḿ ō, loo ndiḿ kə́ ngan̄g ngá̰ý ō, nge gān̄g dɔḿ ō.
Ni i Nə́ɓā yāḿ ō, mbal̄ ɓɔ̄ɔ̄ rɔ̄ yāḿ ō.
Ni i der yāḿ ō, yá̰á̰ ń m̄-tetəń rɔ̄ɔ̄ ní ō,
loo ndiḿ kə́ ngan̄g ō.
4Ādə̄ de gə̄ ɓōkə́n̄ Kɔ́ɔ̄ɓē tɔ̄ȳ.
m̄-ɓāŕ Kɔ́ɔ̄ɓē, anī m̄-tetə madə̄ ba̰ā̰ḿ gə̄ rɔ̄ɔ̄.
5Yo ɓírə̄m̄ kə tɔ́gɔ́ tītə̄ katə man̄ ō, a̰ȳ ndílə́ḿ ō.
6Loo kə́ ɓádá ɓírə̄m̄ ō,
yo əyā gūmbə̄ noḿ tə́ ō.
7Dan ń wur kɔl əsō dɔḿ tə́ ní m̄-ɓāŕ Kɔ́ɔ̄ɓē,
m̄-nōō kə̄ dɔ Nə́ɓā yāḿ tə́ kadə̄ dḭḭ̄m̄.
Ni-ndi kem kújə yān tə́ oō ndūḿ.
Nōō yāḿ əsō mbīn tə́.
8Loo ń noō tə́ wōn̄g rāā Kɔ́ɔ̄ɓē adə̄ dɔ nang yéȳ ō ndebə ō.
Ngəra mbal̄ gə̄ ndāmə̄n̄ ngin ngin ō yéȳn̄ ō.
9Sa kógə̄ḿ teē kó̰ń Kɔ́ɔ̄ɓē tə́,
hor kə́ o̰o̰ bəlim bəlim ō, yā̰l̄ hor ō teēn̄ tan tə́.
10Kɔ́ɔ̄ɓē tetə ta dɔ rā̰ kə̄ nang tə́ ba risə.
Kil̄ man̄ kə́ ndul ndḭ́ ndḭ́ i gír njan tə́.
11Ni al̄ de kə́ dɔ rā̰ tə́ sə́ndá tə́ ba ḭḭń bɔ̄gə̄.
Ni nēl̄ dɔ bɔ̄gə̄ néĺ tə́.
12Ni ɓɔ̄ɔ̄ rɔ̄n dan kil̄ man̄ kə́ ndul ndḭ́ ndḭ̄ tə́,
utə̄ gidə rɔ̄n kə kil̄ man̄ kə́ risə til ndingií.
Kil̄ man̄ gə̄ ní ndulən̄ tītə̄ kum man̄ kə́ rúu ngá̰ý beē.
13Loo ndə́lē kété non tə́ ō kil̄ man̄ yān gə̄ mānə̄n̄ naā tə́ kə kɔ̄sɔ̄ɔ́ ō,
kə yā̰l̄ hor kə́ a kə̄rā sirií ō.
14Kɔ́ɔ̄ɓē rāā adə̄ man̄ ndang dɔ rā̰ tə́,
Nə́ɓā kə́ dɔɔ́ sa̰y ngá̰ý rāā adə̄ ndūn ɓār̄.
15Ni-túr̄ kum gərā yān gə̄ tə̄ndā tḭ̄ḭńdə́ kə̄ loo gə̄ tə́ ō,
rāā adə̄ tel̄ man̄ kə́ ngá̰ý gə̄ tə́ndā gán̄gdə́ naā tə́ kɔ̄ɔ́ ō.
16Kɔ́ɔ̄ɓē, nang kə́ gír bā bo tə́ ō kə́ gír ngəra dɔ nang tə́ ō ní,
dɔdə́ teē ndágá i kə ta kūl̄ ndán̄g rɔ̄ yāí ō,
i kə ta kūl̄ koō kə́ kó̰ní tə́ ń ə̄nī pḭḭ ō ní.
17Tā anī Kɔ́ɔ̄ɓē ń ndi dɔ rā̰ tə́ ní əla jīn əhɔm̄neé
Ni-teē seḿ kɔ̄ɔ́ kum man̄ kə́ bo ngá̰ý tə́.
18Ni-gān̄g dɔḿ jī madə̄ ba̰ā̰ḿ kə́ ngan̄g ngá̰ý tə́ ō,
jī ngé rɔ̄ɔ̄ seḿ gə̄ kə́ tɔ́gə́də́ tɔȳ yāḿ tə́ ō.
19Nin̄-ənīmə̄n̄ rɔ̄ɔ̄ ndɔ̄ kə́ tɔ́gə́ḿ gətóó tə́,
banī Kɔ́ɔ̄ɓē rāā seḿ.
20Ni-taām̄ jīdə́ tə́ əya̰m̄ dɔɔ́ ō gān̄g dɔḿ ō,
tɔdɔ̄ ni tárəm̄.
21Kɔ́ɔ̄ɓē rāā yá̰á̰ kə́ beé seḿ sɔɔ̄ń i hálə́ḿ kə́ gōtə́ ō,
jīḿ kə́ unjə̄ njáý ō.
22Tɔdɔ̄ mā m̄-ngɔ̄m̄ gō róbə gə̄ yā Kɔ́ɔ̄ɓē majə,
mā m̄-rāā háĺ kə́ gōtə́ aĺ kə Nə́ɓā yāḿ alé.
23m̄-ngɔ̄m̄ ndū najə̄ yān gə̄ malang ta kumḿ tə́ ngándáńg ō,
gō míndən gə̄ ní m̄-ḭ́ḭ bal dɔ tə́ aĺ ō.
24M-ə́hɔ rɔ̄ḿ tɔgə kadə̄ najə̄ gətóo dɔḿ tə́ ta kumən tə́.
m̄-tūr̄ gidəḿ ta yá̰á̰ kə́ gōtə́ aĺ gə̄ tə́ kɔ̄ɔ́ malang.
25Loo ń noō tə́ Kɔ́ɔ̄ɓē əndā njaḿ sɔɔ̄ń hálə́ḿ kə́ gōtə́ ō,
jīḿ kə́ unjə̄ njáý njáý ń ni a̰ā̰ ní ō.
26Kɔ́ɔ̄ɓē, deē ń ra dɔ ndūn tə́ seí ní ḭ̄ ī-ra dɔ ndūí tə́ kə kɔ́ɔ̄ɔ́ ō,
deē ń əndā kumən gíŕ yá̰á̰ tə́ rāā kə gōó ní
ḭ̄ ɔ́jə́ kɔ́ɔ̄ kadə̄ ḭ̄ i nge kəndā kumií gíŕ yá̰á̰ tə́ rāā kə gōó ō.
27Deē ń unjə̄ njáý njáý ní ḭ̄ ɔ́jən kadə̄ ḭ̄ ūnjə̄ njáý njáý ō,
ba ḭ̄ i nge kəla mbóo dɔ nge gól̄ loo tə́ ō.
28Gír de gə̄ ń madə̄də́ gə̄ əlan̄ rɔ̄sɔl̄ dɔdə́ tə́ ní,
i ḭ̄ n i nge rāā kadə̄ nin̄ tetən̄ rɔ̄ɔ̄ ō,
i ḭ̄ n i nge rāā kadə̄ kum ngé kɔjə rɔ̄də́ gə̄ tetə kə̄ nang tə́ ní ō.
29I ḭ̄ n i nge kəndā hor tū lámba yāḿ tə́ ní.
Kɔ́ɔ̄ɓē Nə́ɓā yāḿ rāā adə̄ loo ń risə til dɔḿ tə́ ní unjə̄ kow.
30M-ḭ́ḭ bal dɔ bəlo tə́ i seí ḭ̄ḭ́.
M-ḭ́ḭ bal dɔ ndogə̄ mbal̄ tə́ i kə Nə́ɓā yāḿ.
31Róbə yā Nə́ɓā i róbə́ kə́ majə ɔtə̄ kə taá.
Najə̄ kɔr̄ Kɔ́ɔ̄ɓē a rāā yá̰á̰ gáŕ.
Ni i der yā de gə̄ malang ń a ɓɔ̄ɔ̄n̄ rɔ̄də́ rɔ̄n tə́ ní.
32Ní i náā n i Nə́ɓā ní, i Kɔ́ɔ̄ɓē ngóy aĺ a?
I náā n i mbal̄ ní, má i Nə́ɓā yājí ngóy aĺ a?
33I ni n adə̄m̄ tɔ́gə́ á m̄-rāań yá̰á̰ ní.
Ni-rāā adə̄ kəla rāāḿ udə gírí majə.
34Rāā adə̄ njaḿ ɔl tītə̄ nja dul beé,
rāā adə̄ m̄-rā ngan̄g loo kə́ kḭḭ kə̄ dɔɔ́ gə̄ tə́.
35I ni n ɔjəm̄ loo rɔ̄ɔ̄ ō,
rāā jīḿ adə̄ ger̄ ndɔ́r̄ ga̰ gərā kə́ rāā kə gində̄ nə̄ngá kasaá adə̄ rugə ní ō.
36Ḭ̄ ādə̄m̄ der yāí ń ī-tetəń rɔ̄ɔ̄ ní.
Jī ko̰í ɔsəm̄ kə̄ dɔɔ́.
Kem majə yāí rāā adə̄ m̄-tél de kə́ bo.
37M-ún njaḿ m-ə̄ndā sa̰y kanjə̄ kadə̄ udə̄ i kə ta kūlīí.
38m̄-ngɔ̄də̄ madə̄ ba̰ā̰ḿ gə̄ m-ə́wádə́.
Ré m̄-tɔ̄l̄də́ təgā aĺ anī m̄-tél gōdə́ tə́ alé.
39m̄-rāādə́ rāā kə́ majaĺ ngá̰ý adə̄ tə́sōn̄ nang tə́ njaḿ tə́,
asən̄ kḭḭ dɔɔ́ to̰ alé.
40Ḭ̄ ādə̄m̄ tɔ́gə kadə̄ m̄-rɔ̄ɔń.
Ḭ̄ ə́la dɔ ngé kənīḿ rɔ̄ɔ̄ gíŕ tɔ́gə yāḿ tə́.
41Ḭ̄ ī-rāā adə̄ madə̄ ba̰ā̰ḿ gə̄ tūrə̄n̄ gándə́də́ adə̄mə̄n̄,
adə̄ m̄-tɔ̄l̄ ngé rɔ̄ɔ̄ḿ gə̄ kɔ̄ɔ́ malang.
42Nin̄ əgan̄ kɔŕ banī deē dḭḭ̄də́ alé.
Nōōn̄ kə̄ dɔ Kɔ́ɔ̄ɓē tə́ banī ədadə́ najə̄ alé.
43m̄-rāādə́ adə̄ télən̄ bumbə́rú kə́ kadə̄ nél ɔy dáyń.
m̄-tə́ɓādə́ njaḿ tə́ tītə̄ bɔr kə́ kum róbó beē
44Ḭ̄ Ī-gān̄g dɔḿ jī gír de gə̄ kə́ əsōn̄ wōn̄g tə́.
Ḭ̄ ə̄ndām̄ dɔ nápar de gə̄ tə́.
De kə́ m̄-ger̄də́ kété aĺ gə̄ rāān̄ kəla ɓer̄ adə̄mə̄n̄.
45M-ə́da najə̄ taḿ kógə̄ḿ beē anī nin̄ rāān̄ yá̰á̰ ń m-ə́dá ní.
Tə̄rā gə̄ reē a gólə̄n̄ kumḿ.
46Tɔ́gə tə̄rā gə̄ ur̄ wak.
Nin̄ əndan̄ loo teēn̄ loo ɓɔ̄ɔ̄ rɔ̄ yādə́ gə̄ tə́.
47Kɔ́ɔ̄ɓē ndi ngándáńg!
M-ɔ́r ta mbal̄ yāḿ!
Nə́ɓā ń ajəm̄ ní ādə̄ de gə̄ tɔ̄ȳnən̄!
48Ni i Nə́ɓā ń rāā ba̰ā̰ adə̄m̄ ō,
əla dɔ gír de gə̄ gíŕ tɔ́gə yāḿ tə́ ō ní.
49Kɔ́ɔ̄ɓē, ḭ̄ ī-gān̄g dɔḿ jī madə̄ ba̰ā̰ḿ gə̄ tə́.
Tá ɓáý to̰ ní ngé gə̄ ń ənīmə̄n̄ rɔ̄ɔ̄ ní, ḭ̄ ī-rāā adə̄ m̄-tetədə́ rɔ̄ɔ̄ ō,
ɔ̄rə̄m̄ kɔ̄ɔ́ jī ngé rāā dɔ́nɔ gə̄ tə́ ō.
50Adə̄ m̄-ndigə ɓōkíī tɔ̄ȳ dan nápar de gə̄ tə́ ō,
kənī pā kə rīí yā kɔsəń gɔnií ō.
51Kɔ́ɔ̄ɓē tetə rɔ̄ɔ̄ kə́ bo gə̄ ō kə́ ngan̄g gə̄ ō adə̄ mban̄g yān.
Ni-rāā kem majə kə Dabid ń ni ur yibə̄ dɔn tə́ ní ō,
kə gír kaa yān ō, ta kaw̄ jóo.
Currently Selected:
PĀ GƏ̄ 18: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.