PĀ GƏ̄ 137
137
Jə-ndi nang tə́ ta man̄ gə̄ kə́ Babilon tə́
1Jə-ndi nang tə́ ta man̄ gə̄ kə́ Babilon tə́ jə-nōō,
tɔdɔ̄ əga kemjí dɔ Siyo̰ tə́.
2Jə-naā kənde yājí gə̄ dɔɔ́
ta jī kāgə̄ gə̄ ń ran̄ ta man̄ tə́ ní.
3Loo ngeé ń noō tə́ ní,
ngé kəhɔjí ɓəlo tə́ gə̄ mērə̄n̄jí kənī pā,
ngé rāājí yá̰á̰ kə́ tōr̄ gə̄ ran̄ sejí ta kənī pā rɔ̄nel̄,
nin̄ ədan̄jí na: Úniī pā kə́ Siyo̰ ādī j-oō.
4Loo kadə̄ j-un pā yā Kɔ́ɔ̄ɓē
dɔ nang yā tə̄rā gə̄ tə́ ní i ba̰ý?
5Jerusalem, ré dɔḿ ndígə̄nalií anī,
ādə̄ jī ko̰ḿ oy njururu kadəḿ tə́!
6Ré m̄-gír̄ dɔí tə́ to̰ alé,
ré i ḭ̄ n m̄-rāā rɔ̄nelí tɔȳ gotə yá̰a̰ gə̄ malang aĺ ní anī,
ādə̄ ndo̰ḿ tə́ya̰ ngangáḿ tə́.
7Yá̰á̰ ń Edom gə̄ rāān̄ ndɔ̄ ń ɓē kə́ Jerusalem əsōń tə́ ní,
Kɔ́ɔ̄ɓē, ādə̄ dɔí ndígə̄nal alé.
Nin̄ əgan̄ kɔŕ ədan̄ na:
Ī-tɔ̄ɔ̄ī bɔr kə́ Jerusalem, ī-tɔ̄ɔ̄ī dɔɔ́ gān̄g nja tə́ nang tə́!
8Banī ḭ̄ Babilon, a nujən̄ seí sák sák kɔ̄ɔ́.
Rɔ̄ ngé kəgāī kə̄rā yá̰a̰ gə̄ ń ī-rāā sejí ní a nel̄də́.
9Rɔ̄ ngé kəhɔ ngání gə̄ rējə̄də́ dɔ mbal̄ tə́ a nel̄də́.
Currently Selected:
PĀ GƏ̄ 137: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.