PĀ GƏ̄ 135
135
m̄-ger̄, Kɔ́ɔ̄ɓē i de kə́ bo
1-2 Aleluya! Ī-tɔ̄yī rī Kɔ́ɔ̄ɓē.
Sḭḭ̄ ngé kəla gə̄ yā Kɔ́ɔ̄ɓē ń ā ī-raī kem kújə yā Kɔ́ɔ̄ɓē tə́,
ā ī-raī ndágə loo gə̄ kə́ gīr̄ gidə kújə yā Kɔ́ɔ̄ɓē Nə́ɓā yājí tə́ ní,
ī-ɓōkə́niī tɔ̄ȳ!
3Aleluya! Kɔ́ɔ̄ɓē i de kə́ majə!
Ī-tɔ̄yī rīn kə pāá, tɔdɔ̄ ni i de kə́ kemən ndaa ngá̰ý!
4Tɔdɔ̄ Kɔ́ɔ̄ɓē gə̄rā Jakob tām̄ yān tə́,
ni-rāā Israel i yá̰a̰ yān nəkɔ́ tə́.
5A̰á̰ā̰, m̄-ger̄, Kɔ́ɔ̄ɓē i de kə́ bo,
Kɔ́ɔ̄ɓē tɔȳ nə́ɓā gə̄ malang.
6Yá̰a̰ malang ń Kɔ́ɔ̄ɓē ndigə ní, ni-rāā,
dɔ rā̰ tə́ ō, dɔ nang tə́ ō,
kum bā bo gə̄ tə́ ō, kem bəlo loo gə̄ kə́ kum bā bo gə̄ tə́ malang ō.
7Ni-rāā adə̄ kil̄ man̄ gə̄ ḭḭn̄ ta ngóy dɔ nang tə́ kum kə̄ dɔɔ́
rāā adə̄ man̄ tel̄ yā kedə̄.
Ni teē kə nélé loo ngɔ̄mən tə́.
8I ni n tɔ̄l̄ ngáń hágə gə̄ kə́ Ejiptə tə́ ní,
tɔ̄l̄ hágə de gə̄ ō, hágə dā̰ gə̄ ō.
9Ḭ̄ ɓē kə́ Ejiptə, ni-əla ngé kəla yān gə̄
adə̄ aw̄ rāān̄ yá̰á̰ kə́ yā kɔjəń yá̰a̰ gə̄ ō,
yá̰á̰ kə́ to kɔr kum gə̄ ō, ɓēé looí,
yā rɔ̄ɔń Parao̰ kə ngé kəla yān gēé malang.
10Ni ənda nápar de gə̄ ngá̰ý ō,
tɔ̄l̄ mban̄g kə́ tɔ́gə́də́ i ngá̰ý gə̄ ō,
11mban̄g gə̄ ní i Sihon mban̄g yā Amor gə̄ ō,
Og mban̄g kə́ Basan ō, mban̄g gə̄ malang kə́ Kanaan ō.
12Gō tə́ anī ni un dɔ nang yādə́ adə̄ yá̰a̰ ndəbā tə́,
adə̄ Israel gə̄ ń i gír deē yān gə̄ ní kadə̄ téĺ yá̰a̰ haladə́.
13Kɔ́ɔ̄ɓē, rīí a ɓār̄ kə dɔ ndɔ̄ gə̄!
Kɔ́ɔ̄ɓē, a ənīn̄ gotə najə yāí kə dɔ ɓāl̄ gə̄.
14Tɔdɔ̄ Kɔ́ɔ̄ɓē gān̄g sarya kə́ majə tām̄ yā gír deē yān gə̄ tə́.
Ni lōō gír̄ yá̰á̰ ń sāā rāā tə́ ní
ba rāā majə kə ngé kəla yān gēé.
15Ɓesə̄ gə̄ yā nápar de gə̄ kə́ rāā kə gində̄ arjā̰a̰á̰ gə̄ ō, kə lɔ́rɔ́ gə̄ ō ní,
i deē ndul gə̄ ń rāān̄də́ kə jīdə́ ní.
16Tadə́ to ba ɔrə̄n̄ najə̄ alé,
kumdə́ to ba a̰a̰n̄ loo alé.
17Mbīdə́ to ba oōn̄ loo alé,
Ngōn̄ koō kə́ sḛ́ý beē gə̄gē gətóo tadə́ tə́.
18Ādə̄ ngé rāādə́ gə̄ ton̄ tītə̄də́ ō,
ādə̄ ngé kəndā kemdə́ dɔdə́ tə́ gə̄ malang ton̄ tītə̄də́ ō.
19Sḭḭ̄ gír ɓē gə̄ yā Israel, ī-tɔ̄yī Kɔ́ɔ̄ɓē!
Sḭḭ̄ ngé tun̄ yá̰a̰ gə̄ kə́ gír kɔjə yā Aaro̰ tə́ gə̄,
ī-tɔ̄yī Kɔ́ɔ̄ɓē.
20Sḭḭ̄ ngán Lebi gə̄, ī-tɔ̄yī Kɔ́ɔ̄ɓē!
Sḭḭ̄ ngé ɓōĺ ndíĺ Kɔ́ɔ̄ɓē gə̄, ī-tɔ̄yī Kɔ́ɔ̄ɓē!
21Ādə̄ de kə́ Siyo̰ gə̄ tɔ̄ȳn̄ Kɔ́ɔ̄ɓē ń ndi Jerusalem ní!
Aleluya!
Currently Selected:
PĀ GƏ̄ 135: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.