JOB 41
41
1Ré deē əndā kemən dɔ tetən rɔ̄ɔ̄ tə́ anī, gól̄ i rɔ̄n karī.
Ka̰a̰n kə kumuú ngóy rāā adə̄ deē gān̄g əsō gagəra ndaa.
2I náā n kɔ̄r̄ yān asə kadə̄ aw̄ sāań tan ní?
Deē ń nāā dum̄ taḿ mā ní, kɔ̄r̄ yān i kə́ mān̄ yā deē ń noō ɓáý.
3De kə́ adə̄m̄ mā yá̰a̰ loo tə̄nā tə́, yā kadə̄ m-ə̄gā kɔ́ɔ̄ kə̄rā i náā?
Yá̰a̰ malang kə́ dɔ nang tə́ i yāḿ mā!
4Banī najə̄ kə́ dɔ jīn gə̄ kə njan gə̄ tə́ ō, tɔ́gən tə́ ō, yá̰a̰ rɔ̄ɔ̄
kə́ rɔ̄n tə́ kə́ majə ngá̰ý tə́ ō ní, m-ɔ́jə najə̄ kə́ dɔ tə́ alé.
5I náā n ra non tə́ ɔrə̄ń ndārə́n ní?
Ngāngən gə̄ ń ran̄ kə ta naá gír loo jōó ní, i náā n mān̄ tadə́ tə́ kə̄ dām̄ kə́rēý tə́ ní?
6I náā n əhɔ ndāŕ tan gə̄ ba teēdə́ dɔ gúú tə́ ní?
Ɓōĺ kə́ ngá̰ý gīr̄ gidə səlēn gə̄!
7Der rɔ̄ɔ̄ kə́ kɔsə̄ kə ta naá gə̄#41.7 Der rɔ̄ɔ̄ kə́ kɔsə̄ kə ta naá gə̄: I ngɔ́ɔ gidən gə̄ aláa i kə̄yā gidə mar utə̄n̄ gidən malang,
télən̄ i mambā gidən gə̄ kə́ tə́ndān̄ ta naā tə́ adə̄ əhɔn̄ ta naā ngan̄g.
8Nin̄ kógə̄ḿ kógə̄ḿ əhɔn̄ ta naā ngan̄g.
Adə̄ néĺ kógə̄ḿ asə kudə mbo̰ō̰də́ tə́ alé.
9Mambā gidən gə̄ ní tə́ya̰n̄ naā kógə̄ḿ kógə̄ḿ ō,
yá̰a̰ gə̄ kə́ kɔsə̄də́ ta naā tə́ beē ní yá̰á̰ kə́ asə kɔr̄də́ ta naā tə́ gətóo ō.
10Dan ń ni ur ádəsó anī, loo unjə̄ kow ō,
kumən əɓa hor kə́ unjə̄ tītə̄ ta gír loo beé ō.
11Ndo̰ hor gə̄ teēn̄ tan tə́ bəlim bəlim ō,
hor kə́ ndɔ́w̄ gə̄ kə́rān̄ tan tə́ sir sir ō.
12Sa hor kógə̄ḿ teē kó̰nən tə́, tītə̄ kə́ teē i kem jóó nánjá beē,
aláa i kem jóo gində̄ kə́ man̄ a nēgə́ kemeé tə́ beē.
13Koō kə́ tan tə́ təngā ngá̰ý, rāā adə̄ yā̰l̄ hor gə̄ tél ajən̄ ying gogə́.
Ndo̰ hor gə̄ teēn̄ tan tə́ bəlim bəlim.
14Tɔ́gə i mindən tə́ ō, ɓōĺ ḭḭ bal kété non tə́ ō.
15Ndārə́n kə́ kudə̄ kem naā tə́ gə̄ nderə̄n̄ pḭḭ,
adə̄ ká ré deē əreń ngá̰ý gə̄gē anī, yá̰á̰ kógə̄ḿ kə́ yéȳ tū tə́ gətóo.
16Kújə́ mósən ngan̄g tītə̄ mbal̄ beé,
ngan̄g tītə̄ mbal̄ riī yá̰á̰ kə́ gír madāá beē.
17Dan ń ni-ɔr̄ dɔn dɔɔ́ anī, ngār gə̄gē
ndíĺdə́ a̰ȳ adə̄ a̰ȳn̄ naā kə̄ loo gə̄ tə́.
18Tə́gānən̄ kə kaskaraá ba kaskar rāā yá̰á̰ kógə̄ḿ seneé alé.
Nənga, aláa səngɔy, aláa gərā, rāā yá̰a̰ seneé aĺ ō.
19Ni-rāā gində̄ i kádə́ yá̰á̰ tə́ ō, rāā gində̄ nə̄ngá kasə i kāgə̄ kə́ ur ruú tə́ ō.
20Ni a̰ȳ ta gərā tə́ alé. Tām̄ yāḿ tə́ ɓáa, mbal̄ kə́ tə́nīnəń kə bējēé to i tītə̄ mu beé.
21Rə̄ngō kə́ tan bo dām̄ kə́rēý tə́ to i tītə̄ mu beé tām̄ yān tə́.
Kōō səngɔy ń a ɓār̄ ta kaw̄ kə̄ dɔn tə́ ní, usən aĺ bátə́.
22Kéngəlé kə́ ta katə gə̄ i gír kemən tə́,
gō tóon to dɔ bɔr tə́ tītə̄ gō tóó yá̰a̰ jɔ̄r̄yɔ̄ nán̄g ta kɔsə ń rīn na i hérsə ní beē#41.22 Hersə: Á̰a̰ī 39.10.
23Dan ń ni udə kum man̄ tə́ anī, man̄ nēgə́.
Ni-rāā adə̄ bā bo tél to tītə̄ jóó kə́ man̄ nēgə́ ngá̰ý kemeé beé.
24Loo unjə̄ kow gō tóon tə́, to tītə̄ kə́ hoȳ batə̄ kə́ ndaa i dan ɓūl̄ maná beē.
25De kə́ i kɔ́ɔ̄n dɔ nang tə́ gətóo. m̄-rāan adə̄ ni ɓōĺ yá̰a̰ alé.
26Madə̄ kɔ̄lən kə́ bo ngá̰ý gə̄ ō, kə́ tɔ́gə́də́ i ngá̰ý gə̄ ō ní, ənīdə́ rɔ̄ɔ̄ kanjə̄ ɓōĺ.
Ni i mban̄g kə́ dɔ dā̰ kə́ bo gə̄ tə́ malang.
Currently Selected:
JOB 41: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.