JOB 40
40
Deē ń kadə̄ tūr̄ najə̄ əda ní i Job
1Anī Kɔ́ɔ̄ɓē dəje Job najə̄ kə ngangāá əda na:
2Madə̄ kɔ̄l̄ Nə́ɓā kə́ tɔ́gən i ngá̰ý aw̄ kə najə̄ kə́ yā kəda dɔ yá̰a̰ gə̄ ń noō tə́ a?
Nge tə́da najə̄ kə́ majaĺ gə̄ dɔ Nə́ɓā tə́ gḛy tūr̄ Nə́ɓā najə̄ tə́ a?
3Tā anī Job tūr̄ əda Kɔ́ɔ̄ɓē na:
4Mā i yá̰á̰ kógə̄ḿ alé. I rí n kə m̄-tūr̄ kə m-ə́daī ní? M-ə̄ndā jīḿ taḿ tə́ kɔ̄ɔ́.
5M-ɔ̄r̄ najə̄ i nja kógə̄ḿ, m-ā m̄-tūr̄ najə̄ yā kəda to̰ alé.
Nja kə́ nge ko̰ jōó, m-ā m̄-ə̄nā kə́ rang ta tə́ alé.
Job a̰ā̰ kadə̄ nəkɔ́ i Nə́ɓā a?
6Loo ń noō tə́ Kɔ́ɔ̄ɓē ra kum nél balway tə́ tūrəń najə̄ əda Job na:
7Ī-ndi dəngam dɔ rɔ̄í tə́ na m-ā m̄-dəjeī najə̄ ō,
i kadə̄ ā ī-tūrə̄m̄ tə́ ō.
8Kə́ rɔ̄kum tə́ ní ī-ndigə tútə sarya yāḿ kɔ̄ɔ́ a?
Ī-ndigə kəndā najə̄ dɔḿ tə́ yā kɔjəń na yá̰a̰ rāāí na i gōtə́ a?
9Jīí i tītə̄ jī Nə́ɓā á?
Ndūí ɓār̄ tītə̄ man̄ kə́ ndang tītə̄ yān a?
10Beé ɓáa ī-súū rɔ̄í kə kɔsə gɔn ō, kə háĺ kə́ loo de kə́ bo tə́ ō,
ə́la loo kə́ ndə́lē ngá̰ý ō, kə́ unjə̄ kow ō, rɔ̄í tə́ tītə̄ kūbə̄ beé!
11Ī-bə̄gā wōn̄g yāí kə́ to ɓōĺ ngá̰ý dɔ deē ndul gə̄ tə́.
Ī-tél kə ngé kɔjə rɔ̄də́ gə̄ malang kə̄ nang tə́, kə ta kūl̄ ka̰a̰ kə́ á̰á̰də́ kə kumií ta kógə̄ḿ.
12A̰á̰ā̰, ādə̄ kumií kə́ á̰a̰ńdə́ ta kógə̄ḿ rāā adə̄ nin̄ malang əlan̄ dɔdə́ nang tə́.
Ī-rējə̄ ngé kem ndul gə̄ kə̄ loo nəkɔ́ ń noō tə́.
13Ī-ɓɔ̄ɔ̄də́ kə̄ loo gə̄ tə́ gíŕ nángāá,
ūtə̄ tadə́ kem kújə dəngáý yā yo tə́.
14Loo ń noō tə́ mə̄kɔ́ kə dɔḿ m-ā m̄-ɓōkíī tɔ̄ȳ tɔdɔ̄ jī ko̰í tetə rɔ̄ɔ̄ adī.
Yabə
15Yabə ń i dā̰ man̄ ní á̰a̰n majə.
I mā n m̄-rāān tītə̄ ń m̄-rāāiń ḭ̄ ō ní. Ni-əsa mu tītə̄ man̄g beé.
16Á̰á̰ tɔ́gə́ kə́ dūnə̄n tə́ ō, á̰a̰ nder̄ ń dā̰ kemən nder̄ ní ō!
17Kə̄lán ngan̄g tītə̄ ɓōdə̄ kāgə̄ sédər beé.
Rāān̄ dā̰ ɓúrən gə̄ i kə ngəɓa kə́ ngan̄g gēé.
18Kə̄ngān gə̄ ngangə̄n̄ tītə̄ gində̄ nə̄ngá kasə kə́ kemən ra bəlo beé ō,
kə̄ngā nganjən gə̄ ton̄ tītə̄ gində̄ kə́ koo beé ō.
19I ni n i kəla rāā Nə́ɓā kə́ majə páráńg ní.
Nge rāān əla kaskar yān kə̄ dɔn tə́ sāā kɔsənəń.
20Dɔ mbal̄ gə̄ əɓan̄ mu kə́ yā kadə̄ əsa ō,
dā̰ kə́ bembeé gə̄ rāān̄ rɔ̄nel̄ gīr̄nəń gidən ō.
21Ni to gír ɓala gə̄ tə́ ō, ɓɔ̄ɔ̄ rɔ̄n dan tə̄ɓā gə̄ kə́ kum dang tə́ ō.
22Ni-ənge loo ɓɔ̄ɔ̄ rɔ̄ yān gír ɓala gə̄ tə́,
kə gō gír kāgə̄ popiliye gə̄ ń ran̄ kadə̄ man̄ tə́ ní.
23Katə man̄ kə́ ngá̰ý a̰ȳ ndílən alé.
Ká ré man̄ kə̄rā bátə́ ugə̄ń nga̰ā̰n tə́ gə̄gē a, ni to beé.
24Dan ń ni to kə kumneé ní, i náā n asə kəhɔn ba mbutə kó̰nən kə kāgāá ní?
Mar, aláa dā̰ man̄ kə́ bo kə́ majaĺ ngá̰ý
25Ā ə́hɔ mar kə kuyú a?
Ā ə́nda kuȳ yāí kadə̄ əga ndo̰n kadə̄ ə́hɔnneé a?
26Ásə kəla tə̄ɓā kó̰nən tə́ a? Ásə mbutə tan kə gində̄ kə́ ruguú a?
27Ɔ́jəń na ni a rāāī ɓɔ́ a? Ni a ɔr̄ najə̄ seí kə tárá a?
28Ni a ənī ndūn yā kadī kadə̄ ni i ɓəlo yāí bátə́ n-oyń a?
29Ā ī-kógə̄ naā seneé tītə̄ loo kógə̄ naā kə yelēé beē a?
Ā ī-do̰ō̰n kə kəlaá yā kadə̄ ngání kə́ dəyá̰ gə̄ kógə̄n̄ naā seneé a?
30Ngé ndo̰ kānjə̄ gə̄ kə́ əndān̄ rɔ̄də́ naā tə́ a əndānən̄ gātāá a?
Ā ī-gór̄yō dā̰n yā kadə̄ ngé gātəń gə̄ a?
31Ā ī-mbútə̄ ndārə́n kə gində̄ kə́ ta katə gēé a?
Gō tə́ anī, ā ɔ́sə dɔn kə səngɔyɔɔ́ yā mbutə a?
32Beé ɓáa ə̄ndā jīí dɔn tə́ tā:
Ré əga kemií dɔ rɔ̄ɔ̄ ní tə́ anī, ā ī-tél yā kəndā jīí dɔn tə́ gogə́ to̰ alé!
Currently Selected:
JOB 40: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.