ESTER 7
7
Najə̄ a majaĺ dɔ Haman tə́ ō, oy ō
1Mban̄g nin̄ kə Haman reē əsan̄ yá̰a̰ kə Ester nə̄yá̰ mbangāá. 2Kə ndɔ̄ kə́ nge ko̰ jōó ngeé ń toō dan ń əsan̄ yá̰a̰ oy anī mban̄g tél əda Ester ɓáý to̰ na: Ester, nə̄yá̰ mban̄g, i rí n ī-sāā dəjem̄ ní? M-ā m-ādī yá̰á̰ ní! Yá̰á̰ ń ī-gḛy ní i rí? Ká i núsə ɓē ko̰o̰ yāḿ gə̄gē a m-ā m-ādī. 3Ester tél ədan na: Kɔ́ɔ̄ ɓē gə̄, ré ī-rāā kem majə seḿ ō, ī-ndigəm̄ ō anī, ādə̄ m-óy aĺ ō, ādə̄ gír deē yāḿ gə̄ oyn̄ aĺ ō, yá̰á̰ ń m̄-sāā dəjeī ní n noó. 4Tɔdɔ̄ igən̄ seḿ mā ō gír deē yāḿ gə̄ ō kadə̄ nujən̄ sejí kɔ̄ɔ́! Kadə̄ tɔ̄lə̄n̄jí kadə̄ jə-gətóo kɔ̄ɔ́! Ré igən̄ sejí i kadə̄ jḭḭ i ɓəlo gə̄ anī m-ā m̄-ndi taḿ mbóo. Tɔdɔ̄ rāā kum naā ndoō tə́ kə́ tītə̄ ń noō asə kadə̄ deē njə́ɓań mban̄g alé.
5Anī mban̄g Jerses dəje nə̄yá̰n Ester na: Deē ń gír̄ rāā yá̰á̰ kə́ beē ní i náā? Ndi i rá? 6Ester tél əda na: Nge rāā kumjí ndoō tə́ ō, madə̄ ba̰ā̰jí ō, i Haman de kə́ majaĺ ń ndi toó! Loo ń noō tə́ Haman oy mámák ta kum mban̄g tə́ nin̄ kə nə̄yá̰n. 7Mban̄g ḭḭ kə wōngōó ta yá̰a̰ kəsa tə́ ba teē aw̄ kem ndɔr̄ kə́ kem ndogə̄ yān tə́. Haman ger̄ kadə̄ mban̄g gḛy i kadə̄ yá̰á̰ kə́ to kum kaȳ aĺ rāān. Adə̄ ni-ndi gotoó yā rāā Ester nə̄yá̰ mban̄g ɓɔ́ kadə̄ ajən. 8Ni-əsō bəruk dɔ yá̰a̰ ndi ń Ester ndi dɔ tə́ ní anī, mban̄g tél kem ndɔrɔ́ udə kújə kəsa yá̰á̰ tə́ gogə́. Kə̄ ta jī tə́ noō mban̄g əda na: I gḛy sāā nə̄yá̰ mban̄g dɔ gúú tə́ kə̄ dɔ tə́ ɓáý ta kumḿ tə́ kem kújə yāḿ tə́ a? Mban̄g əda najə̄ tan kógə̄ḿ anī jóó ń jóo toó ngé kəla gə̄ utə̄n̄ ta kum Haman kə kūbūú kɔ̄ɔ́. 9Anī áji mbang kógə̄ḿ kə́ dan madə̄ gə̄ tə́ ń rīn na i Harbona ní əda ta kum mban̄g tə́ na: Ee, kāgə̄ tɔ̄l̄ deē ń Haman nəkɔ́ rāā tām̄ yā Mardose ń najə̄ kə́ tan tə́ ajə mban̄g ní n noó. Kāgə̄ ní ra i ta kújə yā Haman tə́. Ngālən kə́ kə̄ dɔɔ́ i métər kutə jōó gidə i mí. Anī mban̄g əda na: Ə̄nīī kəlā míndən tə́ ba ī-do̰ō̰niī tū tə́! 10Adə̄ ənīn̄ kəlā míndə Haman tə́ ba do̰ō̰nən̄ dɔɔ́ tū kāgə̄ tɔ̄l̄ deē ń ni-rāā tām̄ yā Mardose tə́ ní. Loo ń no ō tə́ wōn̄g yā mban̄g tetə.
Currently Selected:
ESTER 7: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.