Mateo 24
24
So' Jesús ỹ'axát'a da' qonoláxachiñi qomle so' tamnaxaqui let'ádaic
(Marcos 13.1-2; Lucas 21.5-6)
1So' Jesús joca'li cá'ai so' tamnaxaqui let'ádaic di' Jerusalén da' jec, qana'chi jana'j saua' lapaxaguenataqa, qana'chi qoỹaloxóotapega jeso'me na' qa' 'me l'oxonaxat jeso' tamnaxaqui. 2Qaláxasa so' Jesús 'enaaco':
—¿'Ami 'aulóit'a séetapega jénjo'? Jaỹim ỹátaqta 'eesa dójo' 'ami s'axatema naỹi, jénjo' qa' sa 'te qomle da' 'uo ga' qa' da' na'chi 'eeta't huetalégue ga' laqáỹa. Jena'me ỹátaqta ỹima qomle da' qoỹoláxachiỹi.
Jen'me n'anecpi 'me ỹ'axát'a ga' loiquiaqa'éna
(Marcos 13.3-23; Lucas 21.7-24; 17.22-24)
3Qana'chi ỹic'ádidisee'mec jeso' soqoỹoqóchisee'mec 'aléua 'me nanaqa' jan' 'epaq 'olívos. Qana'chi so' Jesús joca'li ñíchiiñi, qana'chi saua' lapaxaguenataqa nesóxotrot jeso'me da' ỹina't, 'enapega'to':
—Sétaaque da' qo'mi 'au'axatema jai'chíita qomle ỹivíta dójo'. ¿Jái'chogamaxa ga' l'anaxat ga' 'ad'iỹílaxasoxoc qataxa jega'me loiquiaqa' jen' 'aléua?
4Qana'chi so' Jesús 'enaaco':
—Ma'chaxa qomle, sa 'ená'te 'uo ga' 'ami ỹoqovi'n. 5Qá'a ỹátaqta jalcote qomle na' 'chi ñíỹi da' ỹenaxat, 'enaac: “Jaỹim 'me na'chaỹim 'adet'ai 'adec'alaxaquii,” qana'chi ỹátaqta jalcote qomle jen' ỹoqovin. 6'Ami 'anaquiáxañiitapeelégue qomle da' chimaqáchii'ñalo jen' laataq. Qaláxasa sa 'au'óiỹi qomle, qá'a jeda'me na'chi qoỹiná'ac. Qaláxasa maliaxa qomle da' ỹivíta ga' lalóqo' jen' 'aléua. 7Qá'a ga' siỹaxadipi mai'chi delóỹi'ỹi' ga' sa laỹi, qataxa ga' net'a mai'chi delóỹi'ỹi' ga' laqáỹa net'a. Qataxa 'uo ga' noqouáxa qataxa naua' neleuaxaco, qataxa jalcote na' 'aleu'pi 'uo jen' n'iquiaxa. 8Ỹima jénjo' naqáina na' chiỹoqóchii'ña na' nachoxodec.
9Huá'a, qana'chi 'ami qoỹaadéuo, da' qaidi 'ami qoỹi'uaxáat'ape, qataxa da' 'ami qoỹalaa't. Qataxa ỹima na' siỹaxadipi ỹátaqta 'ami niquiỹa'alo, ỹasouaxat da' jaỹim 'oquíitapegue'. 10Qana'chi jega'me nolo' ỹátaqta jalcote qomle na' ỹaxanéegue da' lip'iỹáxac, qana'chi niquiỹá'a ga' laqáỹa qataxa ỹimen. 11Qataxa jalcote qomle jen' qovínaxanaxaicpi da' naloxon, 'enapeela't da' l'aqtáxanaxanecpi ñi' Dios, qana'chi ỹátaqta jalcote qomle jen' ỹoqovin siỹaxadipi. 12Qataxa ỹátaqta jalcote qomle na' sa nó'inpi, chan'eesa 'uo qomle na' ỹaxañi da' ỹauotec ga' laqáỹa. 13Qaláxasa ga' qaỹa ga' ỹoqo'cha, cha ỹivíde'ta ga' loiquiaqa' da' l'óiỹaxac, naqaiga qomle ga' qonec'alaxatéegue. 14Dójo' 'ónaxaic qadipí'ic 'me ỹ'axat da' n'aqtaguec da' l'onataxanaxac ñi' Dios 'me ỹimata'a'téna, jeda'me qoỹ'axáteegue qomle ỹima jen' 'aléua, da' qaidi ỹima jen'me ỹodapecachi siỹaxadipi ỹaỹáten jeda'me. Huá'a, qana'chi ỹivíta ga' loiquiaqa' jen' 'aléua.
15So' l'aqtáxanaxanec ñi' Dios, lenaxat Daniel, jeso'me ỹidíñi joca'li jeda'me 'éeta ga' desepaxanaqtaxan qataxa dolaqtaxan. (Naỹi jega'me ỹitaxaỹaxan jénjo' ỹidíisec 'me l'aqtac so' Jesús, 'ónaxaic da' ỹaỹáteet'egue), da' qaidi qomle 'ami 'aulói'ỹa jega'me da' huétaaue ñi' tamnaxaqui di' Jerusalén 'me sa l'acháqa', 16qana'chi jen' huét'a di' Judea, ỹ'iisée'ma qomle na' qasoxonaxa. 17Jen'me huetalégue jen' lápo' ga' l'emec, n'óota qomle da' sa ỹím'a da' táaue ga' l'emec da' 'uo ga' ỹáchi. 18Qataxa jega'me huetalégue na' n'ónaxa, qaa'le sa 'te qomle da' v'iỹílaxa'uo ga' l'emec, da' qaidi ỹáchi ga' lapoto. 19¡Ỹátaqta choxodaipi qomle na' ỹauodipi 'me qo'uaxaipi jega'me nolo', 'uootaxa jaga' 'uo ga' lec'óxot maliaxa huanoquétac! 20Chan'eesa 'aviỹaxañiỹot qomle ñi' Dios, tetoqo' sa huáaue qa'en ga' l'ómaxa, 'uootaxa ga' mataxaqui da' 'auasoỹíiỹi. 21Qá'a ỹátaqta sa lec'óxotolec qomle da' nachoxodec. Sa 'te da' 'uo ga' 'ená'am da' qoỹachiỹoxota'ague joca'li ỹímta qoỹí'et jen' 'aléua, qataxa sa ỹitaxa qonauá'ne' qomle dójo' nachoxodec. 22Qataxa ñi' Dios da' 'uootaxa ỹipagaqtéetreegue gaua' noloqo'te, qana'chi sa 'te qomle da' 'uo ga' nec'aléegue. Qaláxasa jiñi'me sa ỹipagaqtéetreegue ỹasouaxat da' lauo'chi jen' liquiỹacpi.
23Tadeeto' da' 'uo ga' 'ami 'enapegalo', 'eet'oi: “Ỹa 'aulóichiỹi, jénjo' jen'me net'a nec'alaxaqui, huet'énjo',” 'uootaxa da' 'eet'oi: “Jiñi' chá'a jiñi'me,” qaláxasa 'ami 'ená'te da' 'au'amaqchíñii qomle. 24Qá'a ỹátaqta jalcote qomle jen' janac da' 'enapeela't net'a nec'alaxaqui, 'uootaxa 'enapeela't da' l'aqtáxanaxanec ñi' Dios. Qana'chi jen'me ỹí'et qomle na' let'ádaic n'anecpi qataxa jen'me sa qoỹauanápiỹi, da' qaidi doqovínaxan. Sa ỹiuénaaque nataq'en qomle da' ỹañoxot da' ỹoqovin jen'me leloisecpi ñi' Dios. 25Jeda'me 'ami s'axatema naỹi, qaidi na'chi 'eeta't qomle da' 'auaỹáchiñiit'eguet. 26Chan'eesa da' 'uo ga' 'ami 'enapegalo da' 'eet'oi: “Ỹa 'aulói'ỹa ñi' qadet'a qadec'alaxaqui, jiñi'me netalégue di' totelégue 'aléua,” qaláxasa sa 'te qomle da' 'auc'áchiỹii'ỹa. 'Uootaxa da' 'eet'oi: “Jiñíjo' jiñi'me, nétaaue ñi' 'emec,” qaláxasa sa 'au'amaqchíñii qomle. 27Qá'a jega'me 'ená'am qomle da' qoỹilá'a ga' naqasélgaxa, da' chiỹoxogue da' ỹ'oxoñi, qana'chi ỹivid'ague da' jávit, naqaida qomle da' naq'áita da' livídaxac jen'me siỹaxaua lec'óxot qomle n'iỹílaq. 28Ga' huet'ague ga' ỹileu, qana'chiga ga' huá'ña da' ỹimalégue na' poipi.
Da' 'éeta da' l'iỹílaxasoxoc so' siỹaxaua lec'óxot
(Marcos 13.24-37; Lucas 21.25-33; 17.26-30, 34-36)
29Qomle 'chi ỹinoxodéegue gaua' noloqo'te 'me nachoxodáxaqui', qana'chi jañi' c'atena 'om qataxa so' 'auóxoic, qataxa n'áqañi jan' huaqchiñi chiỹaqsée'ma di' piỹem, qataxa ỹivíd'a jen' n'añaxacpi 'me huet'ague da' piỹem ỹátaqta d'iqui. 30Huá'a, qana'chi qoỹilásee'ma na' piỹem ga' l'anaxat na' siỹaxaua lec'óxot. Qana'chi ỹima qomle jen' ỹodapecachi siỹaxadipi noỹíitaỹi, qomle qoỹila'aguet jen' siỹaxaua lec'óxot da' naquétaaue ga' ló'oc, ỹátaqta sa lec'óxotolec da' l'añaxac qataxa da' li'ỹoxodic. 31Qana'chi ỹamaq qomle jen' lamaxa'spi piỹem lé'ec, da' qaidi sa ỹ'aiden da' lesamaxa jan' laseede da' daseedáxan, qaidi ỹiỹaxa't ỹima na' leloisecpi 'me net'aguelo naua' cuatro ladíco jen' laỹat. Ỹima jen'me ỹachiỹoxota'aguelo naua' loiquiaqa'te jen' 'aléua.
32'Anapaxaguiñiỹo' qomle jaga' higo lichidic 'me saloqtenaxana: Jaga'me da' ỹivíta da' nolel jan' lepee, qana'chi 'uo jan' laỹoqte. Qana'chi 'ami 'auaỹáchiñii da' ma'le sa qaỹadapiỹi naua' neta'pi let'al. 33Qana'chi naq'áita nataq'en qomle 'ami 'aulói'ỹa ỹima jénjo' s'axátetac, qana'chi 'ami 'auaỹáchiñii da' sóxote sa qaỹáaque ga' loiquiaqa' ỹimaquéna. Jega'me ma'le nadiitequéna. 34Ỹátaqta 'eesa dójo' 'ami s'axatema, da' ỹima qomle jen'me 'uáiñi da' di'ỹoq, qomle 'uootaxa sona'li ỹileu jen' siỹaxadipi 'me huetaavlo naỹi nauójo' noloqo'te. 35Na' piỹem qataxa jen' 'aléua ỹiméta qomle, qaláxasa da' ỹ'aqtac sa ỹiméta.
36Qaláxasa jega'me nolo' qataxa ga' lalóqo' dójo', qaláxasa qaỹa ga' ỹañoxot da' ỹaỹáten, ỹivíd'a na' namaxa'spi piỹem lé'ec sa ỹaỹáten qataxa jen'me lec'óxot ñi' Dios. Na'chiñíta ñi' ỹit'a 'me ỹaỹáten.
37'Ená'am da' 'éeta joca'li saua' noloqo'te 'me huetaavlo so' Noé, qana'chi naq'áita nataq'en qomle ỹivíta da' n'iỹílaq jen' siỹaxaua lec'óxot. 38Jesaua' noloqo'te joca'li sonaliaxa da' damolíñi jen' 'aléua, qaa'le na' siỹaxadipi ỹ'étetac na' liqui'ỹáxac, niỹómtac qataxa 'uootapega't, qataxa ỹ'onáxan jan' lec'oqtelpi, cha ỹivíde'ta so' nolo' so' Noé huenótooue jaso' lilicota lat'édai. 39Qaláxasa sa nóma dójo' joca'li so' siỹaxadipi, cha ỹivíd'a joca'li janac so' huétep, qana'chi ỹaỹoxon qa'en ỹima jeso'me siỹaxadipi. Naqaida da' 'éeta nataq'en qomle ỹivíta da' n'iỹílaq jen' siỹaxaua lec'óxot. 40Jega'me nolo' gaua' dos siỹaxa'u da' 'uootaxa huetralégue ga' n'ónaxa, qana'chi jegaa'me 'oonolec ga' qoỹauec, qaláxasa ga' laqáỹa qaa'le qoỹaqpiaqtenáñi. 41Qataxa gaua' dos ỹauo' da' desógaxat'ape, qaa'le 'oonole jaga' qoỹauec, jaga' laqáỹa qamqaa'me qoỹaqpiaqtenáñi.
42'Ami ỹátaqta 'anlóitaiỹo' qomle, qá'a sa 'auaỹáchiñii ga' lalóqo' da' n'iỹílaq jen' 'adesaliaxanquii. 43Qaláxasa 'ami 'auaỹáchiñii da' 'uootaxa jega'me loxot jega'me 'emec, da' 'uootaxa ỹaỹáten ga' lalóqo' ga' pí'ỹaq da' nóvi' ga' cacháxaic, qana'chi jega'me sa ỹañoxot da' d'ochi, qaidi sa 'te da' ỹasen da' qoỹinoxonóoue ga' l'emec da' qodecachiỹot. 44Chan'eesa 'ami ỹátaqta 'aniỹamaxachiita't qomle. Qá'a qomle ma'le sa taỹapíỹi 'adai'lídii' dójo', qana'chi nóvi' jen' siỹaxaua lec'óxot.
Ga' namaxasec 'me ỹátaqta ỹaloxolégue ga' l'onatac qataxa jega'me sa ỹañoxot
(Lucas 12.41-48)
45¿Jái'chi toqo' ga' namaxasec da' ỹátaqta ỹipaquetelégue ga' l'onatac qataxa 'uo na' ỹaỹáten, da' 'uootaxa ga' ladípa da' ỹamaxalégue jega'me, da' qaidi ỹiqui'ỹáxatac jen' huét'a ga' l'acháqa' da' ỹivíta ga' lalóqo' da' niqui'ỹáxac? 46Ỹátaqta máchiiñi qomle jega'me namaxasec, da' 'uootaxa ỹivíta da' nóvi' ga' ladípa, qaláxasa ỹilalégue da' ỹ'étetac jega'me qoỹamaxalégue. 47Ỹátaqta 'eesa dójo' 'ami s'axatema, da' jega'me ladípa ỹañoxot da' ỹamaxalégue jega'me ỹima jen'me lalémaxasetpi. 48Qaláxasa jega'me namaxasec, da' 'uootaxa sa nó'inaloic, qana'chi 'eet'oi: “Ga' ỹadípa ỹátaqta qoniỹateguet.” 49Qana'chi jec da' ỹi'uaxáatac jen' namaxasóxou'pi, qataxa ỹí'et da' liqui'ỹáxac qataxa niỹómaxaua na' taxaicpi. 50Qana'chi jeso' ladípa n'iỹílaq so' nolo' 'me sa ỹauáaque so' lamaxasec, qataxa so'me lalóqo' 'me sa 'te da' ỹaỹáten. 51Qana'chi ỹátaqta qaỹa ga' 'ená'am qa'en da' ne'uaxánaguec, 'ená'am qa'en da' ne'uaxánaguec jen'me 'enapeela't 'eesa. Huá'a, qana'chi noỹíitac qataxa ỹátaqta ỹiuoga't naua' lodaitel ỹasouaxat da' naỹaliaxa.
Currently Selected:
Mateo 24: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.