LUKA 9
9
Yesu Gi: Cang" Zoo: Daxe: Eig Yug Ri: Nhang: Kaid' Da" Khyoo:
(Mat 10:5-15; Mar 6:7-13)
1Yesu gi cangzoo: yi daxe: eig yug bang: ri khe: zheung" yu lho: yu joem ri yo" khaid thu' pyam' wa da" yoem: so' yo' noo phyoo" joem ri yo" ge, loo" nhang: wa da" yoem: so' yo' amyeing" a: na: ri byid. 2Hau: thang: ri nyang: gi nyangnu" ri tid zigi Mangso mungdain da" akhyoo" ri yhe: kho" kyoo" wa ziyo' noo phyoo" shau" mo, ri yhe: gi, byid: wa shid re" nhang: kaid' boem bye. 3Yesu nyangnu" ri tid zigi nanu" gi hau: gyung" khyoo: mo shid re" ci" we' avoin, goo"- lham: dung: we' aci: goo"- thung: ngui" moo zoo: noem ngei sheing: we' akaid' voin, goo"- byimi we' ajhain" avoin goo. 4Nanu" ri being" lhoem: tau yu da" kha: yhoem: moo nghoid loug we' nanu" gi hau: voogung mo doem thu' lo' da" ayo, ju" sho' - hau: yhoem: moo za: danyid nyid ge'. 5Nanu" ri being" alheom: tau yu boem nghoid rigi hau: voogung mo doem thu' lo' wigi nanu" da" khyid: voo: mo phei" lhoug: ri ko" khyo, too" khoo, lho: nyangnu" ri sadi byid: khoo ge'.
6Houg: lang" cangzoo: yi gi thu' yhe: lo" lho: voogung dangain" jang" moo joeb, sho' so" yen" boem wigi ludang: gi, ri cang kho" kyo" ziyo'-khyi, khang" moo" mo mo, ri noo phyoo" ge, loo" nhang: yen: ago".
Herod Da" Myid' Myo: Khyoo:
(Mat 14:1-12; Mar 6:14-29)
7Galile mung" zoug: phoo Herod gi houg: su" bue" nyid da" khyoo: dangain" ziri shaug" gyoo: lang" -nyang: gi myid' gye" myo: loo bye. Khasu" wim ga: ri byu phung: yi dayham" gi Babtisma byid: da" Yohan doem dei loo bye"- ga: tid nyid ago". 8Hau: lho: gootu: dayham" bang: gi Elia po" thu' loo bye"- ga: dayham" gi goo" nham, mo lapi: yi dayug yug doem dei lo zi nghoid- ga: tid go" nyid boem. 9Houg: lang" Herod gi Yohan vhuloem ri ngoo phyed" pyam' byid: bye: zi nghoid- ngoo ludang: shau" gyo: nyid da" he: yug gi hang" nghoid wa lha: ga: tid wigi nyang: gi Yesu ri shau" myang wa shid re" yoem: gye" kaid' nyid.
Yesu Gi: Byu Wim: Khyeing" Ri: Doo" Zho" Khyoo:
(Mat 14:13-21; Mar 6:30-44; Yoh 6:1-14)
10Lagyoo: yi gi doem tau" lo wigi nyangnu" zei: da" moozoo" dangain" Yesu ri tid kyo" zigi. Houg: lang" Yesu gi nyangnu" ri shu" lho: Bedsaida ga: da" voogung khyoo: yhe: lo" boem. 11Byu phung joem hau: khyoo: ri zheung: shau" gyo: lang" Nyang: nu" gi Yesu da" thang: zheung: cang yhe: lo" ago". Nyang: gi nyangnu" ri lheom: tau: yu lho: Mangso mungdain khyoo: tid kyo" ziyo' noo phyoo" bo mo, ri ge, loo" nhang. 12Bid' vang lo" nyid lang" cangzoo: yi daxe: eig yug gi nya: jang" moo re" lo wigi byu phung: yi ri voogung khyoo:- yoozang joem khyoo: lo" wigi yhoeb, joyoo sho: wa ziyo' zoo: noem, lo" sho: boem, wa shid re" nhang: kaid' we' Khasu" wim gari he: joyoo gi byu hang" we' a nyid jo yoo nghoid -ga: tid ago". 13Nghoid loug we' Yesu gi nanu" nyang: nyangnu" ri zoo: noem daja: ja: byid: zhoo" ge'. ga: nyangnu" ritid. Nyang: nu" doem, phoug tid zigi ngoonu" yo" zoo: noem gi zooyho' wim: loem: yo' ngoo: eig du: za: date: nghoid. Nang gi ngoonu" ri he: byu phung: yi dangain" mo, shid re" zoo: noem, yhe: qei, nhang: nau, la"» ga: myid: boem. 14(Houg: moo nyid mo, giyug gi, yi za: wim: khyeing" koo: bo da) Yesu nya: cangzoo: yi ri «daphung moo wim xi: yug koo: koo: koid lho: wigi aphung: phung: zhoung: jo, nhang: ge"» ga: tid.
15Cong: zoo: yi gi hougsu" bain koid thang: ri 16Yesu gi hau: zooyho' wim loem: yo' ngoo: eig du: ri yu lho: moug: khung: khyoo: nghang yu" wigi Mangsoo jeju" bain' coung" byid: lang" zooyho' yo' ngoo: ri phe, yu lho: byu phung: yi ri gam, byid: boem wa shid re-cangzoo: yi ri byid: kaid'. 17Nyang: nu" dangain" mo, gyi" sho' shug" zo: boem bye. Cangzoo: yi gi zo: teing da" ajab amoin" daxe: eig gyoin, byeung" sho' doem cang koid: zheung" yu ashi" go.
Yesu Da" Khyoo: Peteru Tid Thu' Byid:
(Mat 16:13-19; Mar 8:27-29)
18Danyid" ri Yesu gi nyang: kyeing" za: akyu" mho' nyid uri cangzoo: yi gi nya: jang" moo re" ago Yesu nyangnu" ri «byu phung: yi gi ngoori hang" nghoid ga: tid go" nyid boem ago» ga: lheom: myid.
19Nyang: nu" phoug tu" boem zigi dayham" gi nang ri Babtisma byid: su: Yohan nghoid ga: nyangnu" phoug tid nyid ago- dayham" gi goonham, mo, lapi: dayug yug doem dei lo zi nghoid ga: tid nyid ago- ga: tid nyid boem. 20Houg: lang" Yesu gi nyangnu" ri nanu" gi ngoori hang" nghoid ein: myid' nyid go" ga: myid: Peteru phoug tu" zigi nang gi nang Elia nghoid ga:-Mangso Meshia nghoid ga: tid.
Shid: Kham Wa Ziyo' Kyi Khyeug Kham Wa Khyoo: Yesu Tid'
(Mat 16:20-28; Mar 8:30—9:1)
21Houg: lang" Yesu gi he: khyoo: hang" ri we' atid kyoo" wa shid mo jhug za: amyeidng" byid: bye. 22Nyang yang: nu" ri i- byu da" nya: zoo: gi kyi" khyeug khyoo: myo" sho' shau" zoo: wa zi nghoid. Yuda Ludaid vhu" jhung: yi Khai jung zeing yi yo' tarha" sara: yi wigi ngeug pyam' zi shau" lho: said' pyam' goo" wa zi nghoid- nghoid loug we' soem" nyid" thang: ri doem dei to' loo wa zi nghoid- ga: tid kyo.
23Houg: su" wi, nyang: gi-nyangnu" dangain" mo, ri nga" thang: moo cang noug su: hang" nghoid loug we' nyang: nya: gung ri ngeug pyam ca:. Hau: lho: nya: pyang" zeing ri nyid" khang" moo' vu, ci: lho: nga" thang: moo cang ca. 24Khasu" wim ga: ri nyang: nya: da" kangso' ri khyoid yu noug su: gi hang" nghoid loug we' kang: so' soem" loo" wa nghoid loug we' ngoo yoomo kangso' soem" loo" su: koem' gi khyoid yu zi shau" wa nghoid. 25Byu dayug gi he: mougmyid goin" ziri yo" seung: ci: nghoid loug we' Nyang: nya: da" kangso' soem" lo" rigi ce: noem, akyu" se' boo wa lha". ce" akyu" we' aboo nghoid da. 26Houg: lang" ngoo yo' nga" da" mungdang: ri sho' su: rigi byu nya: zoo: gi Nya: phung" yoeb, yo' nya: pho, da" phung" yoeb, bang yo' gyeungshang: moug: lagyoo: yi da" phung" yoeb, bang yo' ju" ri" lang" byu nya: zoo: we' nyang: ri sho' pyam' wa zi nghoid. 27Nanu" ri ngoo deing" deing tid ba- he: khyi, moo nyid mo, mo dayham" Mangso mungdain ri amyang myang gi ashid: shigoo" wa.
Yesu Asam" Aved, Thed' Loo" Khyoo:
(Mat 17:1-8; Mar 9:2-8)
28Houg: bang: ri bain tid thang: ri labain daloem: kyoo: lang" Yesu gi Peteru- Yohan Yaku ri shu" lho: wigi akyu" mho' wa shid re" boug gung daloem: khyoo: do, yhe: lo" ago". 29Nyang: akyu" mho' nyid uri nya: myo nhoo: gi thed' loo khare" wigi nya: byimi joem gi yeing: yeing: lo,- moin: moin: phyu loo" khare". 30Hau: jang" mo nyeigdain tung" byu eig yug gi Yesu yo' dang: tid go" nyid. hau: eig yug gi Moshe yo' Elia nghoid ago". 31Nya: eig yug gi moug: khung: phung" yoeb, yo' thu jhu, lo wigi Yesu gi atoung" myang" ri Yerusalem voomoo" moo shid: kham: khyo" wigi Mangsoo myid' vho: khyoo: ri joeb, byeung" loo" nhang: wa ziyo' sen: lho: wigi Yesu yo' zheung: doem, go" nyid go". 32Peteru yo' nya: byen cang" yi gi yhoeb pyo: nyid ago nghoid loug we' nyangnu" bom: so" re" boem, rigi Yesu phung" bang yo' nyang: yo' yab, jo, da" byu eig yug ri myang ago". 33Hau: eig yug gi Yesu jang" mo phang: lo" nyid uri Peteru gi Yesu ri Aseing: we" ngoonu" he: khyi, moo nyid ge da- Re" shid' mo zoem" daloem:- Moshe shid mo zoem" daloem- Elia mo zoem" daloem: zoem" soem" loem: koid wa"- ga: tid kaid' da. (Nyang: ci: tid shid' kaid' zi ri nyang: gyeing nyang: asi) 34Nyang dang: da tid nyid shi" uri joem" moug" dathei" thu' lo wigi nyangnu" ri lo shoem" nghoeb, pyam- houg: lang" nyangnu" gi gyoug dain" nyid boem ago". 35Jhoem: thei" khoug: mo thui: daleom: gi He: yug gi nga" rizoo: nghoid- Nyang: ngoo khyen: to" zi nghoid- nya: jhoug" myeing" ri tam" gyoo: ge' ga: da" thui: daloem: myeung thu lo. 36Hau: da" dang: thang: sau: loo" lang" houg: moo gi Yesu za: danyid lo. Cangzoo: yi gi nyangnu" shau" myang da" khyoo: dangain" hau: ayo, gyoo: moo hang" ri we' atid kyoo" loo- sam" zoo: danyid nyid ago".
Yu Bo Da" Yug Gi Nu" Ri: Yesu Geloo" Nhang:
(Mat 17:14-18; Mar 9:14-27)
37Thang: nyid" ri Yesu yo' cangzoo: yi soem" yug gi-boug gung tho' mo doem tau" gyoo" lo ago, byu phung: phung" moo" gi Yesu ri re" tau: yu boem ago". 38Byu dayug gi mo, phung: gung mo nyho: thu' lo wigi"- sara: we" nga" zooti" zoo: ri yu" byid: wa shid re" ngoo nang ri mho' ga: tid. 39Hau: yu gi nyang: ri vang joung" ci: wigi nyed dain' tung" nyho: lho: lang" thoung: joeb, leung: lo" wigi nhoid mo nyoeb, du" athei" thei" thu' nyid da- gye" noo sho' ayoug: akhi" lho: lhoung phang: thu' lo" da. 40Hau: yu ri kaid, thu' pyam byid: wa shid re" ngoo gi re" da" cangzoo: yi ri mho' nghoid loug we' nyangnu" gi ayo" khaid thu byid: nghoid ago". 41Yesu gi «loem" jeung" e" myed abo ziyo' shoid vhang: da" byu yi we"- ngoo gi nanu" yo' khamyang ju" sho' nyid wa lha"» ga: tid. Hau: thang: ri Yesu gi «re" zoo: ri hid: khyoo: shu" ri we' ga: tid. 42Hau: yug gi nu" ju" re" lo da" uri yu gi nyang: ri myidjang: moo theung lheung: kaid' lho: lang: thain: nain" nyid nhang: Yesu gi akhyeung" da" yu ri amyeing" byid: kaid' lho yug gi nu" ri ge, loo nhang. houg: lang" nya: phoo ri doem ab byid: kaid. 43Meing: byu phung: yi dangain" mo, gi Mangsoo da" phung" Yoeb, ri mau" hang" to" boem ago".
Nyang: Shid: Wa Da" Khyoo: Ri: Yesu Doem, TidKhyoo:
(Mat 17:22-23; Mar 9:30-32 byu phung: yi gi Yesu zei: loo bye: da" moozoo" aja: ja: ziri damoug" go" nyid boem shi" uri)
44Yesu gi nya: cangzoo: yi ri byu nya: zoo: gi sube" lo, khoug: moo ab, byid: pyam' shau" wa nghoid- he: dang: ri nanu" ato" myhid loo: xoem" too" ge' ga: tid. 45Nghoid loug we' cangzoo: yi gi he: dang: gi ce: noem, ri tid nyid da" khyoo: ri ase' gyoo: shi" nghoid ago". Hau: dang: ri nyangnu" ase' gyoo: goo" baja" ga: zau" too" byid: da Cangzoo: yi gi hau: khyoo: yo' sen: lho: nyang: ri avoem" myid: nghoid ago".
Khayug Gyi: Thang Su: Nghoid Lha?
(Mat 18:1-5; Mar 9:33-37)
46Cang: zoo: yi gi nyangnu" mo, gyi: thang yug gihang" nghoid wa lha".- ga: coem, tid ngeig go" thu' lo beom. 47Yesu gi nyangnu" da" ung: khoug: moo ce: noem, bo nyid zigi si' byid: nyid yoomo nyang: gi zooshang: dayug ri khe: yu lho: nya: nam moo yab, jo, nhang: wigi 48Nyang: nu" ri tid zigi nga" myeing mo, he: zooshang: yi ri kham: yu mo, hang" nghoid loug we' ngoori ri nhang: kaid' yug ri kham: yu su: nghoid bye khasu" wim gari nanu" mo nge thangsu: gi gyi: thang su: nghoid bye"- ga" tid.
Nanu" Ri: Athoug Athoug Theung Su: gi Nanu" Shoid Moshu Nghoid.
(Mar 9:38-40)
49Houg: lang"Yohan gi Aseing: we" re" da" myeing khyo" wigi yu joem ri khaid thu pyam' nyid da" byu dayug ri ngoonu" shau" myang boem bye- nghoid loug we' nyang: gi ngoonu" da" phung: mo byu anghoid yoomo wigi ngoonu" nyang: ri toem, pyam pye:- ga: tid. 50Nyang: y' gootu: cangzoo: yi ri Yesu tid zigi nyang: ri atoem goo" ciwim gari nanu" ri athoug theing su hang" we' nanu" shoid mo su: nghoid.
Samari Voogung Daloem: Bang: Yesu Ri: Akham: Yu Khyoo:
51Yesu moug: khung: khyoo: do, loo" wa da" ayo, jhangloo lang" nyang: gi myid kho: ci: lho: Yerusalem voomoo" khyoo: yhe: lo" nyid. 52Nyang: gi nya: shid' vhu" khyoo: lagyoo: yi ri nhang: kaid lho: nyang: nu: gi Yesu shid' mo ca" khyoo: nyheung soin' byid: wa shid re" Samari voogung daloem: khyoo: vang yhe: lo" ago". 53Nghoid loug we' Yesu gi-Yerusalem voomoo" khyoo: dayhe: lo" nyid ziri se' boem yoomo voogung bang: gi nyang: ri akham: yu nghoid ago". 54Cangzoo: Yaku yo' Yohan tang: gi he: khyoo: rimyang lang" nyang: tang: gi Aseing: we" nyangnu" ri nghe, said' pyam wa shid re" nga" eigyug gimoug: khung: mo myi: ri khe: khyo, yu wa: nang aveing" la?-ga: tid ago". 55Yesu gi lheung: lo lho-nyang: tang: ri gyikoid da. 56Hau: thang: ri Yesu yo' nya: cangzoo: yigi goo" voo, khyoo: thu' so" lo" ago".
Yesu Da" Thang: Moo BO Cang Noug Mo,
(Mat 8:19-22)
57Nyangnu" gi khyoolaid' moo so" lo" nyid boem uri byu dayug gi nang khakhyoo: yhi: khakhyoo: ngoo we' bo cang wa» ga: Yesu ri tid. 58Yesu nyang: ri «zeig ni, joem gi khyung: yo" ago"- ngo, zoo: joem we' soid jo, ago"- nghoid loug we" byu nya: zoo: koem' gi vhu" shid" khoug: jang: khyalhang" we' ayoo"» ga: tid. 59Nyang: gootu: dayug ri doem tid zigi «nga" thang: moocang we'» ga: tid. Nghoid loug we' hau: yug gi «sara we" nga pho, mang shi" lo" shung: khoo' wa akhang" byid: we'» ga: tid. 60Yesu gi «byushid: yi gi nyangnu" da" byushid: nyang: cang" myhoeb, shung: goo" baja"- nang gi MangSo mungdain khyoo: riyhe: kho" kyoo" byid: we'» ga: tid. 61Gootu: dayug gi «sara we" ngoo we' re" thang: cang wa Nghoid loug we' nga" yhoem: byu yiri shi" lo" vhu" too" khoo, wa akhang" byid: we'» ga: tid. 62Yesu nyang: ri tid zigi «Khoin, zhug moozei: ci: lho: thang: khyoo: lheung: yu" su: hang" nghoid loug we' MangSo mungdain shid re" ce" akyu" we' boo zi anghoid» ga: tid.
Currently Selected:
LUKA 9: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.