LUKA 10
10
Yesu Byu Nyhed' xe: Eig Yug Ri: Nhang: Kaid Da" Khyoo:
1Hau: thang: ri Aseing: gi cangzoo: nyhedxe: eig yug ri khyen: thu' yu lho: eig yug dazoem" zoem"- Aseing: nyang: yhi: wa da" voogung- khyi khang" moo" khyoo:- yhe: loo" lang" wa shid' re" nhang: kaid. 2Nyang: tid zigi yham" yu wa da" gug myoo" sho' myheing jo, bye:- nghoid loug we' gug yham" dei zoo: gi atham:- houg: yoomo gug yham" dei zoo: myoo" sho' nhang: kaid wa shid' re" gug seing: ri akyu" mho' nyid ge'. 3Yhi: ge' voemkhuid" phung: moo yangnu" ri yhangti"- ngoo nanu" ri nhang: kaid. 4Nanu" gi ngei thung: nghui"- khyidbaid- ri aci: goo"- khyoo: moo yab lho: hang" yo" we' adoem goo" goo. 5Nanu" kha: yhoem: moo vang loo" nghoid loug we' he: yhoem: moo myenjham" goo" baja" o"- ein: wigi xang: shid" ri mainkaid dang: tid ge'. 6Hau: yhoem: moo myenjham" khyoo: ri vhoo: su: nyid nghoid rigi nanu" tid byid: da" mainkaid jeju" ri hau: yug shau" kham: zoo wa nghoid. Houg: te" byu da yug we' anyid: nghoid rigi nanu" tid byid: da" mainkaid jeju" gi nanu" nya: jang" moo doem tau" loo wa. 7Nanu" gi hau: yhoem: moo nyid lho: yhoem: seing: mi" doo" zho" gu: ri zo: shug ge'. Khasu" wim ga: ri dei zoo: gi nya: vhu" kung: phoug" kham: zo: moin: yoomo nghoid. Yhoem: dayhoem: mo gootu: dayhoem: khyoo: athoid yhi: goo. 8Nanu" ri lhoem: kham: yu da" voo bang: byid: zho" gu:- dangain" zoo: ge'. 9Hau: voo moo noo phyoo" shau" nyid mo, ri ze: gi byid: ge'. Hau: thang: ri nyangnu" jang" moo Mangso da" mungdain: ju wa zi jhang bye: da" khyoo: ri tid kyoo" ge'. 10Nanu" ri alhoem: kham: yu da" voo moo khyoo: gung moo yhe: lho: hid: su" tid ge' 11Ngoonu" khyid: moo dab da" Nanu" voogung mo phei" lhoug: ri ngoonu" ko: khyoo bye: ein: tid ge'. Nghoidloug we' Mangso da" mungdain: gi nanu" nam moo jhang lo nyid bye: da" khyoo: ri myid boin: ge'. 12Ngoo deing" deing tid nau zigi tarha" dang: kho" da" bidnyid moo Sodom voo tho' re- hau: voo je noo: wa ga: tid.
Aloem" Jeing" Da" Moug Bang:
(Mat 11:20-24)
13O"- Kurazin voo we"- nang joem: loo" wa. O"- Bedsaida voo we"- nang we' joem: loo" wa. Re" eig youg jang" moo toin" shid da" mau" pho" alhoo: again ri Turhu yo" Sidun voo ri toin" shid' nghoid yoo: gi hau: eig yug gi goonham mo jidmoo" mi gang" ci: lho: wigi myiyab cang" moo zhoung: jo, lho: nya: yooboo mo nheigloem: thid' lheung: loo goo" wam: bye. 14Turhu yo"Sidun: gi-tarha" dang: kho: da bidnyid moo-nanu" da tho' moogi-khyam" sa yoo" shi" wa zi nghoid. 15O"- Kaperna-um voo we"- nang gi moug: gung moo ju" sho' tu: to ziri vho: nyid la". Ngarai mung" khyoo: nang ri du" khyo pyam zi shau" wa nghoid ga: tid.
16Yesu nya cangzoo: yi ri tid zigi nanu" da" dang: ri tam" gyoo: mo gi nga" dang: ri we' tam" gyo: zi nghoid bye. Nanu" ri keing" pyam mo gi ngoori keing" pyam zi nghoid. Ngoori keung" pyam zigi ngo ri nhang: kaid su: ri keing" pyam zi we' nghoid bye.
Cangzoo: Nyhed' xe: Eig Yug Doem Tau" Lo Da" Khyoo:
17Cangzoo: nyhed xe: eig youg bang: gi gye" gau yi ziyo' doem zheing: ju" lo boem lho: Aseing: we"- ngoonu" gi Aseing: da" myeing ri lang: lho: amyeung" byid: lang" yu joem lang" ngoonu" dang: ri tam" gyo: boem ago" ga: lo tid kyo" boem.
18Yesu phoug tu" zigi-Moug khung: mo -satan gi lhab, myeig yhang: ti" byed gyoo" lo" zi ngoo myang. 19Tam" gyoo: ge'- lhang: myu yo' gunggau" tho' moo yo" nang: led lo" lho: gyivo: da" yoem: so' dangain" ri yo" ung: pyam' wa da" amyeing"- Ana: ri ngoo nanu" ri byid: too" bye. Ceja: gyi we' nanu" ri ayo" ung: wa. 20Nghoidloug we' nanu" moo yu join: joem ri yo" khaid thu' pyam yoomo agoug yi goo. Mougkhung: mungdain: moo nanu" da" myeing lhid" too" bye: yoomo za: dagoug ge" ga: wigi tid.
Yesu Ngei Pyoo: Gauyi Da" Khyoo:
(Mat 11:25-27; 13:16-17)
21Hau: da" uri gyeungshang: Venyi: gi ngei pyoo: gau yi nhang: yoomo Yesu gi hid: su" ga: tid- Mougkhung: myidjang: da" Aseing: phoo Mangsoo we"- Se, thang Phajhi" zoug: yi moo yhoem" to" da" khyoo: yi ri phajhi" aboo mo ri phang shug byid: yoomo re" jeju" zeing: ri ngoo coung" nghei nyid. Phoo we" hid: su" bue" lo da" khyoo: gi nang vho: ngei da" khyoo: nyang: nghoid bye.
22Nga" phoo gi ziyoo bain sho' ngoori ab byid: too" bye. Zooshang: kha: yug nghoid zigi Nya: phoo mo led: lho: gootu: hang" we' asi. Nya: phoo gi kha: yug nghoid zi we' nya: zoo: yo' nya: zoo:- khyen: yu lho: toin" shid noug su: mo lid: wigi hang" we' asi ga: tid.
23Hau: thang: ri Yesu gi cangzoo: yi jhang khyoo: phug lho: akhid" nanu" myang da" zi joem khyoo: ri yo" myang da" myojid" joem gi ngi lhoo wa. 24Nanu" ri ngoo tid zigi nanu" shau" myang da" khyoo: yi ri Lapi: yi khokham" yi gi myang noug nghoid loug we' ashau" myang boem. Nanu" shau" gyo: da" khyoo: ri gyoo: noug goo" nghoid loug we' ashug" gyo: boem.
Ge Da" Samari Byu Dangtu'
25Tarha" sara: dayug gi Yesu jang" moo re" lho: Sara: we"- ngoo gi apyaid ato: kangso' khasu" koid ri yoo" wa lha"» ga: Yesu ri phajhi" ca: yu noug yoomo re" myid.
26Yesu gi Jhoem: mungdang: moo khasu" ga: tid to" lha". nang ci: lhoung shau" nghab yu lha"» ga: nyang: ri doem phoug tid.
27Hau: yug tid zigi Re" da" Aseing: Mangsoo ri Re" nheigloem: soo zoo: dangain"- Re" yoemso' dangain"- re" nyain: phajhi" dangain" yo' jheddab we'. Re" yhoem: kyoo" cang" ri nanya: gung yo' dakhyoo ti" jheddab we' ga: doem tid.
28Houg: lang" Yesu gi nang phoid: zigi joo bye. Nang we' houg: yo' dakhyoo ti" kang so dei nyid yab we'.
29Hau: tarha" sara gi nya: deingman" khyoo: vhoo noug yoomo nga" yhoem: kyoo" cang" gi hang" nghoid lha"» ga: nyang: gi Yesu ri myed.
30Hau: uri Yesu tid zigi shid' phyang" byu dayug gi Yerusalem voo mo Yerikho voo moo gyoo" lo" da" khyoo: moo khyangtoug: joem yo' shau" go. Hau: khyangtoug: joem gi hau: youg da" byi mi, lhoid khyoid yu lho: coem nhoug wigi alug lug shid: loo" lang" she: pyam too" khare" boem. 31Khainjung agyi dayug gi gyung: so" lo" ri hau: nhoug lheing: too" su: ri khyoo: moolo" myang. Houg: loug we' nyang: jang" pyam khare". 32Houg: yo" dakhyoo" Levi kung: mo dayug we' hau: joyoo moo ju" lo. Hau: yug we' houg: noo su: ri yhe: yu" lho: jang" goo" khaid khyo" phang: lo. 33Nghoidloug we' Samari byu dayug gi gyung: so" lo" ri hau: da" byunoo jang" moo ju" loo" lang" hau: noo su: ri myang wigi nheig khyeig myid boo. 34Noo su: jhang ju" sho' yhe: lho: noo su: da" dam, joem moo shooxu: yo' zabyid yhid: kaid byid: wigi pain" cu' yo' thoeb byid. Hau: thang: ri nya: loozei: dang moo noo su: ri zhung: nhang: wigi yhoeb' wa jang: ju" sho' shu" lo" lho: coung: goin byid: da. 35Thang: nyid" ri yheb jang: mo thu' loo" yo, ri ngei eig kyab ri thoid lho: yhoeb jang: yhoem: seing: ri byid: wigi he: noo su: ri yu" goin coung: lang" ge'. Jain" gyo" gu: gi ngoo doem loo lang" lo xab' wa ga: tid kho'.
36Houg: bang: soem" yug mo khyangtoug: shau" su: da" yhoem: kyoo" cang" gi kha: yug nghoid ein: nang jho: la"» ga: Yesu dang: thang: said'
37Tarha" sara: phoo gi nheig khyeig ziyo' pang" thoug khari" su: nghoid ga: tid ri
Yesu gi nang we' houg: su" lo" koid: we' ga: tid kaid.
Matha Yo" Mari Yhoem: Moo Yesu Lam" Yhe: Da" Khyoo:
38Yesu yo' nya: cangzoo: yi gi gyung: so" lo" uri voo davoo moonyang: yhe: lo. Hau: voo moo Matha ga: myeing su: myiyi: zoo: gi nya: yhoem: moo nyang ri being" lhoem: kham: yu. 39Matha moo nya: no, Mari ga: da" myiyi: zoo: dayug bo. Nyang: gi Aseing: da" khyid: yang: moo nyang: jhoug" byid: khyoo: ri tam" gyo: zhoung: jo. 40Matha gi being" did" moo" myo: nhoung nyid yoomo Yesu jhang lo" lho: Aseing: we" nga" no, gi being" did" zho" moo" ri ngoo dayug nyang: kyeing" ri noung" to" zi nang abo myang la". ngoori bo pang" zei: wa shid' re" nyang: ri tid kaid we' ga: lo" tid.
41Aseing: gi Matha we"- Matha we"- nang gi moozoo" myoo" sho' shid' re" myid myo: nyid ga: nyang ri tid. 42Nghoid loug we' nang moo daja: ca" shi"- Mari gi jo da" ziri khyen: yu abye:. Hau: ziri nya: jang" mo hang" we' ayo" lhoid yu loo:- ga: tid.
Currently Selected:
LUKA 10: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.