LUKA 13
13
Nheugloem: Athid Lang" Re" Yooboo Mo nang Shid: Zi Shoug" Wa
1Hau: uri mung" byu yi byu dayham" gi Yesu jang" moo re" boem lho: Pilaid khokham" wigi said pyam da" Galile byu yi da" khyoo: ri re" kau: to" boem. Houg: bang gi xoin" to' nyid uri said zi shau" mo, nghoid. 2Yesu gi hau: byu phung: yi ri Houg: su" said pyam yoomo gootu: da" Galile byumyu" yi tho' mo jain" lho: yooboo shoid mo, nghoid ein:- nanu" myid go" la". nyangnu" gi yooboo je yoo" mo, anghoid. Ein: ngoo nanu" ri tid kyo. 3Nghoidloug we' Nanu" we' yooboo mo nheigloem: athid nghoid rigi houg: bang: yo" dakhyoo" shid: zi shau" wa. 4Siloam voo mo do, pyu zung- byo gyo" lho: wigi nhe, said pyam da" byu daxe: shed' youg bang: gi gootu: da" Yerusalem voo byu yi tho' moo yooboo je yoo" mo, nghoid ein: nanu" myid go" la". 5Nyangnu" gi yooboo je shoid mo, anghoid- ein: ngoo nanu" ri tid. Nghoidloug we' nanu" we' nheigloem: athid nghoid rigi Houg: bang yo' dakhyoo" ti"- shid: joem: loo" wa zi nghoid ga: tid.
Ashi" Azei: Da" Lafoem Gam Dangtu'
6Yesu gi byu myoo" sho' mo, ri dangtu' daloem: ci: lho: tid zigi «Byu dayoug da" zabyid khyam: moo sho" to" da" Lafoem gam dagam youg jo,- khyam: seing: gi lafoem shi" phyo' re" ri dacab we' amyang. 7Khyam: seing: gi Ngoo he: lafoem gam moo ashi" re" yu" goem: zi soem" zain ju" bye. nghoid loug we' dacab we' amyang. He: lafoem gam ri thoug lheing: pyam loo: ge' Ce: noem koid: wi khyam: myidjang: amyib afoo" koid: too" wa lha"» ga: khyam: zung" su: ri tid. 8Khyam: zung" su: gi hau: shi" gam ri akha: zain dazain to" yu" shi" we'. Shi" gam poem: loem: lheing khab ngoo du: nhau: lho: jen" kaid yu" shi" wa. 9Houg: lang" dalheing: gi ashi" gyeing" gyeing" zei: shi" wa. Gyeing" nyang: ashi" azei: nghoid rigi thoug lheing: pyam we ga: doem tid.
Yesu No Nyid Da" Myiyi: Dayug Ri:- Dougno: Bidnyid Moo Ge Loo" Nhang: Da" Khyoo:
10-11Dougno: Bidnyid danyid" moo Yesu gi tarha" jung moo jhoug" byid: nyid da" tarha" jung moo yu vang ci: lho: daxe: shed zain no nyid da" myiyi: dayug re" ju" nyid. Nyang: gi dang gau" lho: nya: phyid" doem dajhi' we' ayo" dain: lo: su: nghoid. 12Aseing Yesu gi hau: myiyi: myhi, ri myang lang" nya: jang" moo khe: yu lho: myiyi: zoo: we"- re" noo gi bye: ga: tid. 13Nya: da" vhu" loem tho' moo Yesu da" lo, ki" byid: lang" nyang: gi dalheing: dam phyid" doem: yo" dain: lo" lho: Mangso jeju" ri coung" nghei nyid.
14Hau: uri Hau: Dougno: Bidnyid moo Aseing Yesu wigi noophyoo" ri ge loo" nhang: yoomo Tarha" jung vhoeb phoo gi nheig yo: zoore"- moo" ge zei: da" bidnyid khyug nyid" bo- hau: bidnyid moo noophyoo" re" ze: yu ge'. Labain nyid" rigi noo are" zi: goo" ga: wigi Byu phung: yi ri tid kaid.
15 Aseing Yesu gi ayid void mo, nanu" dangain" gi Dougno: Bidnyid ri nanu" da" nu: loozei: joem ri Nu: yhoem: loozei: yhoem: mo tei" ri phoid: lho: gyid jhug wa shid' re" shu" thu' loo" se' nyid anghoid goo" la". 16Abraham da" nya: myiyi: zoo: nghoid su:- he: yug gi daxe: shed' zain satan shen" yhen tei" to" zi shau" nyid. Dougno: Bidnyid ri hau: tei" mo age loid kaid la"» ga: tid. 17Hid: su" ga: tid kaid thang: ri Yesu ri gyikoid noug mo, gi sho' thu' abye: go. Byu phung: moo" dangain" mo, koem gi Yesu zei: da" mau" pho" moo" joem yoomo gau yi ngei pyo: nyid boem.
Nghang" Shi" Cab' Dangtu'
(Mat 13:31-32; Mar 4:30-32)
18 Aseing Yesu myid: zigi Mangso mungdain: gi ce: noem yo" du lha". ceja: yo" tu, tid wa lha". 19Hau: Mungdain: gi hid: su" bue" ziyo' du nyid. Byu dayug gi nghang" shi" ri ci: lho: nya: yoo moo yhe: sain. Hau: ashi" mo agam youg lo lho: gyi: myhang: lo wigi hau: da" akung: ako'' moo ngho' joem lang" soid, yo" soid, ga: tid.
Doo Ced' Dangtu'
(Mat 13:13)
20Yesu dang: tu, doem tid da" zigi Mangso mungdain: gi ce: noem yo" tu, tid wa lha". 21Hau: Mungdain: gi hid: su" bue" ziyo' du go. Myiyi: dayug gi doo cid" ri yu lho: sung: soo: phei" soem" tang moo kaid kaid ri hau: sung: soo: phei" dangain" ri do loo nhang:- ga: tid.
Jhab' Da" khoem" Duang:
(Mat 7:13-14,21-23)
22Yesu gi Yerusalem voo khyoo: lo" ri khyoo: moo jhoug" byid: zoore"- damyu bain damyu- davoo bain davoo khyoo: so" ldd: lo. 23Byu dayug gi Aseing: we"- «khyoid yu khyoo: shau" mo, gi nghab loug neing: shi" lha"» ga: re" myid.
24Yesu gi Nanu" gi jhab' da" khoem" duang: moo vang wa yoem: kaid ge" byu myoo" sho' mo, we' hau: khoem" duang: moo vang wa ga: yoem: kaid boem wa. Yo" vang wa yoem: bo boem zi anghoid wigi ngoo nanu" ri tid. 25Yhoem: seing: gi khoem" ri myhid" pyam lang" nanu" gi nghe: shoid moo shau" nyid moug myang boem wa. Houg: lang" nanu" gi Aseing: we"- Aseing: we" khoem" phang byid: shi" we' o"- ga: khoem" moo ko, yoid nyid loug we' yhoem: seing: gi nanu" kha: khyo" re" zi ngoo asi ga: tid pyam wa. 26Houg: lang" nanu" gi ngoonu" gi Aseing: yo" dazo: dashug nyid yu" mo, nghoid. Aseing: gi ngoonu" da" voogung moo tarha" we' kho" kyo" yu" bye: the,- ga: tid boem wa. 27Nanu" kha: yo, ri" mo, nghoid zi ngoo asi- akhyeing" ashoeb mo, we" nga" jang" mo, gang: loo" ge' ga: doem tid wa. 28Nanu" Mangso da" Mungdain: khoug: moo Abraham- Isag Yaku yo"- Lapi: yi dangain" mo, ju" nyid ziri myang lho: nyang: rigi Mungdain: da" ngi zain shoid khyoo:- khaid thu' too" lang" kha: yhi' kyi: ngau, zei yang: ngaid nyid goo: wa lha". 29Byu yi gi bid thu' bidvang moug: thang: moug: vhoem"- Mougmyid myonhoo: myid loem: mo zeing: lo lho: Mangso: Mungdain: da" pui" yo" vang goo" wa. 30Hau: uri akhid" gam thang: moo nyid mo, gi gam shid" khyoo: ju" loo" wa. Gam shid" moo nyid mo, gi gam thang: shau" gyoo" goo" wa ga: tid.
Yerusalem Voo Ri Aseing Yesu Jhed' Dab'
(Mat 23:37-39)
31Hau: bidnyid ri Pharishe dangain" mo, gi Aseing Yesu jang" moo zeing: re" boem lho: wigi He: jang" mo goo" khyoo: thu' loo" we' Herod khokham" gi Aseing: ri said wa soin nyid ga: re" tid boem.
32Yesu gi «Ngoo gi akhid" nyid" yo' nab yo: nyid gi yu joem: ri khaid thu' lho: noophyoo" ri byang" gi byid: wa. Soem" nyid" nyid" gi nga" da" moo" thang: ri said pyam wa khyoo: ri hau: zeigni phoo ri tid kyoo" ge' ga: tid. 33Nghoidloug we' akhid" nyid" nab yo nyid"- sang: phe: nyid" gi ngoo gyung: soo" shi" wa. Lapi: gi Yerusalem voo mo led: lho: goo" voo moo shid: kham: wa zi a eung:
34Yerusalem we"- Yerusalem we"- Lapi: yi ri said pyam pyam koid: nyid da" voogung we"- Mangsoo nhang: kaid da" lagyoo: yi ri luggo' du" said said koid: da" voo we"- Gyo, zeing gi gyo, nu" joem ri nya: dung vhoo: khoug: moo zheing" kaid to" yhangti"- ngoo gi re" zoo: re" myid: yi ri nga" lo, yoem: khoug: moo zheing" kaid too" nau zi myoo" sho' lheing: nghoid bye. Nghoidloug we' nang koem: gi ngoori houg: su" akoid: nhang noug nghoid da. 35Houg: su" nghoid yoomo re" da" noku yhoem: moo" ri Mangsoo she: pyam wam bye. Nangnu" ri ngoo tid zigi Mangso da" myeing yo" gyoo" loo su: gi ngi lhoo su: nghoid ga: nang tid da" bidnyid aju" shi" ri nang gi ngoori myang loo: wa zi anghoid ga: tid.
Currently Selected:
LUKA 13: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.