LUKA 12
12
Akug Void yo" Sen: Lho Sadi Byid: Da" Khyoo:
(Mat 10:26-27)
1Hau: da" uri Byu khyeing" moin zoeb foem: lo boem yoomo nyang: cang" nyang: we' nang: khyoid go" lo. Yesu cangzoo: yi ri xang: shid" tid da" zigi Pharishe" yi da" ayid void' doo cid" ri zed" nyid ge'. 2Nghoeb to" da" zi dangain" gi phang shug loo wa. Yhoem" to" da" zi dangain" we' shau" myang loo wa. 3Houg: yoomo moug: coid moo nanu" tid da" dang: gi-moug: boo" moo subi" shau" gyo: loo" wa. Yhoem: mo khoug: lhung khoug: moo nanu" dang: so' so' go" da" dang: gi yhoemkhung: tho' mo nyho: yoid zi shau" wa ga: tid kyo.
Gyug Moin: Su:
(Mat 10:28-30)
4Nga" bidnoem yi we"- nanu" ri ngoo tid zi gi gung shoo" ri said tho' moo gootu: Ci" we ayo" koid: mo ri agyug goo. 5Nanu" gyoug moin: su: ri ngoo toin" shid ba. Gung shoo" ri said thang: ri nanu" ri ngarai mung" moo yo" khyo kaid su: ri gyoug nyid ge'. Nanu" ri ngoo tid. Hau: Aseing: ri je: gyoug nyid ge'.
6Jhakhyang wu: du: ri theing" cen eig cu' yo"- yo" oung" anghoid goo" la". Nghoidloug we' Mangsoo gi jhakhyang dadu: ri we' ato" myhid. 7Nanu" da" vhuloem mo xam: ri lang" dangain" nghab too" bye. Houg: yoomo agyug goo"- Nanu" gi jhakhyang joem tho' moo je phoug" dab mo nghoid nyid.
Khristu Ri: Aseing: Ga: Yhen: Yu Ziyo" Ngeig Pyam Da" Khyoo:
(Mat 10:32-33; 12:32; 10:19-20)
8Nanu" ri ngoo tid zigi Nga" cangzoo: gyeing" nghoid ga: sube" shid' moo yhen: yu su: rigi Byu da" nya: zoo: we' Mangso lagyoo: yi da" shid' khoin" moo nya: cangzoo: agyeing" nghoid ga: yhen: yu wa. 9Ngoori su" da" shid' khoin" moo ngeig pyam su: rigi Byu da" nya: zoo: we' Mangso lagyoo: yi shid' khoin" moo ngeig pyam wa.
10Byu da" nya: zoo: ri nhoid wigi shoid su: ri yooboo yo" khyoid pyam byid: nghoid loug we' gyeungshang: da" Venyi: ri tid shoid su: ri koem gi yooboo yo" khyoid pyam byid: loo: wa zi anghoid.
11Subi" gi nanu" ri tarha" jung yi moo we' khokham" amyeing" ci: mo, da" shid' khoin" moo nghoid loug we' khe: shu" lo" da" uri khasu" tid wa zi ce: myid amyoo: goo. 12Nanu" Khasu" tid wa da" khyoo: ri gyeungshang: da" venyi: gi hau: uri jhoug" byid: loo wam bye: ga: tid.
Fang: Da" Sathe" Dangtu'
13Byu phung: moo" mo da" byu dayug gi Sara: moo" we"- ngoori mid gam byid: wa shid' re" nga" mang: ri tid byid: we' ga: Yesu ri tid.
14Yesu gi Byu nang we"- Re" shid' re" hang" su: wigi ngoori tarha" agyi khyo" we' moid gam byid: wa su: khyo" we' nyheing to" lha"» ga: doem myid. 15Hau: thang: ri vhoo: bo myo, no, da" khyoo: aja: ja: ri zed" pyam ge'. Byu da" kangso' gi ziyoo jonu" moo geing: zug jo, zi anghoid ga: tid.
16Hau: thang: ri Yesu gi dangtu' yu lho: Sathi" dayug gi nya: yoo thung" mo gug myoo" sho' yoo" yoomo 17Nga" yoo mo gug shi" mei: shi" ri shoung: too" wa shid' re" joyoo lang" ayu" loo:- ngoo khasu" se' koid: loo: wa lha"» ga: nyang: kyeing" nyid yu nyid. 18Hau: thang: ri nyang: gi ngoo hid: su" koid: wa jhi: xoug ri phyo pyam lho: jhi: seig je gyi: zi ngoo koid: wa. Nga" da" gug- shivoo: joem yo' ziyoo joem ri hau: jhi: seig moo shoung: too" wa. 19Houg: lang" nang gi zain ved myoo" sho' zo: shug wa shid' re" ziyoo jonu" ri young: too" bye: yoomo nheigloem: pyoo" pyoo: danyid re'- zo: pyoo shug pyoo: nyid re- ein: ngoo nga" gung ri tid wa" ga: tid. 20Nghoidloug we' Mangsoo gi Byu fang: phoo nang we"- akho: myen nyang: re" kangso' gi thang loo" wa. Houg: yoomo nang young: to" da" ziyoo jonu" joem gi hang" lo, moo vang loo" wa lha"» ga: tid.
21Nyang: nya: shid' re" ziyoo jonu" khamyhoo young: too" nghoid loug we' Mangso da" shid' khoin" moo ayoo" ajo, su: gi hau: da" sathe" phoo yo" dadu nyid ga: tid.
Mangsoo: Moo Deing" Main" Su:
(Mat 6:25-34)
22Hau: thang: ri Aseing Yesu gi nya: cangzoo: yi ri tid zigi Houg: su" yoomo nanu" gi Ce: noem se' zoo: wa lha". ein: kangso' shid' re" seing" akho" nyid goo. Ce: noem sevoid wa lha". ein: wigi gung du: shid' re" seing" akhoo" goo" ga: tid. 23Kangso' gi zoo: noem tho' moo je yhoug: gyen:- Gungdu: gi byi: mi tho' moo je yhoug: gyen. 24Ka" no, joem ri myid yu" ge'. Nyangnu" gi amyoug: ri we' asain" too. Ayham" ashab yu. Nyangnu" moo zei: kaid to" yhoem: zeing ajo, Jhi: moo we' ashoung: too. Nghoidloug we' Mangsoo gi nyangnu" ri zho" jhoug nyid. Nanu" gi ngho' joem tho' moo myoo" sho' aphoug" je dab nyid anghoid goo" la". 25Nanu" mo hang" nghoid loug we' seing" kho" nyid yoomo nyang: nya: da" kangso' ri dazain damoo" khyalhang" yo" loung: sheing: nhang: goo" wa la". 26Hid: yhangti"- nge" da" moozoo" ri lang" age bue" nghoid rigi ci: yoomo gootu: moo" ri myid myo: nyid go" lha". 27Siyoo mo, zu: kyen: bain: gam joem ri yu" yu" ge'. Khyeing: we ani:- yo, gain: we' ayo,- Nghoidloug we' myonhoo: bo da" Sholumon khokham" zeing lang" Hau: bain: dakyang: yhangti" lang" ashug" void yoomo nanu" ri ngoo tid zi nghoid. 28Loem" jeing" loem: khau: khyoo: neing: mo we"- akhid" nyid" siyoo khoug: moo jo lho: nab yo nyid: gi myi: khyoem moo vang lo" da:- siyoo mo myo, gam ri lang" Mangsoo gi hid: su" foid to" nghoid rigi nanu" ri hau: tho' mo je foid wa zi anghoid goo" la".
29Ci: zoo: wa lha".- ci: shug wa lha". ein: wigi seing" akho" nyid goo. 30(Houg: yhangte" da" ziri Mougmyid tho' moo nyid da" byumyu" bain sho' mo gi sho: nyid ago".) Hau: da" zi nanu" ca" nyid ziri nanu" da" nya: phoo gi se' nyid gu nghoid. 31Nanu" gi nya: mungdain: nya: deing: byeung" khyoo: ri xang: shed" ri shoo: ge' houg: lang" hau: zi joem nanu" ri byid: wa zi nghoid.
Mougkhung: Mungdain: Yoo" Zoo: Yoo" Shoug Khyoo:
(Mat 6:19-21)
32Yang" phung: zoo: we"- agyug goo. Khasu" wim gari nanu" da" nya: phoo gi Mungdain: byid: nau nyid. 33Nanu" gi nyang: nya: da" ziyoo jonu" oung" pyam lho: sho" jhen: mo, ri gam byid: ge' apyang: ayoin" se' da" ngei thung: ri daci: ge'. khoug" su: aju"- nhau: ayo" zo: da" mougkhung: tho' moo nanu" ziyoo jonu" ri dayoung: too" ge'. 34Khasu" wim gari nanu" da" ziyoo jonu" jo, jang" moo nanu" da" nheigloem: we' jo, nyid zi nghoid.
Lhed Nyid Da" Dei Zoo: Yi
35Nanu" gi khanham we' jen" jen" nghoid nyid wa shid' re" phyid" cu" cu" ci: lho: myi: kug ri tab too" ge'. 36Lo, xo' pui" mo doem lo da" nya: yhoem: seing: gi khoem" lo ko, da" uri phyed' yo" phang byid: wa shid' re" lang" nyid da" dei zoo: yi yhangti"- lhed nyid ge'. 37Dei zoo: yi zung" nyid da" khyoo: ri Aseing: doem ju" lo da" uri gyeing: boin: lhed nyid zi lo myang nghoid ri houg: bang: khayhi' ngi lho: boem wa lha". Nanu" ri ngoo deung" deing tid zigi Aseing: gi hau: da" dei zoo: yi ri being" voo agyeing" khyo" zoobui" moo zhung: nhang: lho: Aseing: nyang: atho' byi: khyoid ci: lho: dei zhoo" dei jhug wa zi nghoid. 38Nyang: gi myen" gam gung ri nghoid loug- myo, myang zoo" ri nghoid loug we' ju" lo da" uri lhed lang" nyid da" dei zoo: yi gi ngi lho' boem wa. 39Gyeing" nyang: yhoem: seing: gi khoug" su: juri" wa da" ayo, dase' nghoid rigi khoug" su: ayo" baid thoid vang ri" sho' nyang: koid: zi nghoid. 40Byu da" nya: zoo: gi nanu" ayu" alang" nyid da" ayo moo gyoo" loo wa nghoid yoomo nanu" we' jen" jen" koid: nyid ge".
Dang: Zung" Da" Dei zoo: Yo' Dang: Azoung" Da" Deizoo:
(Mat 24:45-51)
41Peteru gi Aseing: we"- he: dangtu' gi ngoonu" ri tid la". houg: su" anghoid lang" gi byu dangain" bang: shid' re" la"» ga: myid.
42Yesu gi dang: zung" lho: phajhi" se' da" dei zoo: gi hang" nghoid la". Yhoem: seing: gi dei zoo: yi ri vhoeb khang" wa shid' re" yo"- ayo, ju" lang" vhu" kung: phoug" thug byid: wa shid' re" vhu" jhung: dayug nyeing to" ein: shang. 43Koid: nhang: da" yoovoin ri zhug zhug zei: nyid ziri Aseing: lo myang lang" hau: da" dei zoo: gi khayhi' ngi lho' wa lha". 44Ngoo nanu" ri deung" deing tid zigi Yhoem: seing: gi nya: ziyoo jonu" jo, moo jo, ri vhoeb khang" nhang: wa shid' re" ab byid: wa zi nghoid. 45Nghoidloug we' gyeing" nyang: ga: rigi hau: da" dei zoo: gi nga" da" yhoem: seing: doem loo wa zigi myang" shi" wa ga: nheigloem: moo myid lho: wigi dei zoo: myhi, langjhang phoo yi ri baid nhoug zo: yed shug yed dakoid nyid. 46Hau: yug amyid to" da" bidnyid amyang to" da" ayo, moo yhoem: seing: gi doem ju" lo wigi hau: yug ri adu du lo jhu khyo lho: wigi dang: azung" atrha" mo kham: zo: wa da" dam, ri shau" kham: zo: nhang: zi nghoid.
47Aseing: vho: da" khyoo: ri si si- jen" jen" asoin too"- Aseing: vho: khyo" acang loo: nyid da" dei zoo: yi gi gyoem, thoung" wigi gyi" sho' lo mho' zi shau" zoo: wa nghoid. 48Houg: su" nghoid loug we' Aseing: da" nheigloem: ri asi loo za: gyoem thung" kham: zo: da" khyoo: ri shoid vhang: su: gi dajhi kyeing" da" gyoem thung" dam ri shau" kham: zoo: wa nghoid. Jeju" koid: da" khyoo: myoo" sho' kham: yu" su: gi yoovoin myoo" sho' boo wa. Je loem" jeing" ab nung" su: gi je gyi: da" voin vu, wa moo" je bo loo wa zi nghoid.
Mo, Kang" Da" Yesu
(Mat 10:34-36)
49Ngoo gi he: mougmyid ri myi: nghe, kaid wa shid' re" jure" zi nghoid. Akhid" nyang: nghe, kaid noug bye. 50Ngoo kham: yu wa Babtisma daloem: jo,- hau: moo" abain zei: zei: gi ngoo nheigloem: amyen. 51He: mougmyid ri myenjham" ngei pyo: khyoo:- byid: wa ein: ngoo re" ein: jhoo: go" la". Houg: su" anghoid. Byu dayug yo" dayug gang: go" loo" wa shid' re" ngoo re" zi danghoid. 52Akhid" mo byu wu: yug nyid da" yhoem: moo eig yug gi dagang- soem" yug gi daphung: gang: go" loo" wa. 53Nya: phoo gi yuggi zoo: yo"- Nya: myhi gi myiyi: zoo: yo, nya: nid, yo' nya: du moo"- nyang: cang" nyang: gang: go" loo" wa.
Ayo, Bidnyid Ri: Si, Ca" Khyoo:
(Mat 16:2-3)
54Hau: thang: ri Yesu gi mung" byu yi ri tid bidvang shoid moo jhoem: moug: do loo lang" gi mougvoo wa amyang" loo: ga: nanu" dalheing: dam se' ago"- nanu" tid ziyo' dakhyoo" bui" se' zi nghoid. 55Moug: thang: khyo" lid hau, lo zi myang lang" gi loung loo wa ga: tid se' ago"- nanu" tid yhangti" bui" se' nyid. 56Akug void mo we"- nanu" gi mougmyid aved asam" ri yu" lho: mougvoo moug: phang" rigi se' tid boem. He: pyaid moo bue" loo wa da" alhoo: again rigi ciwim wigi asi go" lha".
Gyikoid Su: Yo" Khasu" Zoem" Wa Khyoo:
57Tarha" nyeing veing" da" moo" zei: wa da" shid' re" ciwim wigi nanu" nyang: gung nyang: asham: kho: go" lha". 58Nang ri tarha" yung" shug su: dayug yug- Tarha" agyi jhang khyoo: dage" yhe: lo" da" uri khyoo: moo tid go" pyai" pyam ge'. Houg: su" anghoid ri nyang: gi nang ri tarha" agyi shid' khoin" moo she: yhe: loo" wa zi nghoid. Tarha" agyi gi nang ri pya: da: yi jhang khyoo: ab kaid wa. Pya: da: yi gi nang ri thung: lhoung: too" wa zi nghoid. 59Hau: jhen: dangain" pyai" pyam sho' axab xab gi nang gi thung: mo yo" thu' loo lho: wa zi anghoid. ein: wigi ngoo tid.
Currently Selected:
LUKA 12: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.