HOSEA 13
13
Israel Parah Netabik ṭhuthennak
1Hlanlai ahcun Efraim hrin an ṭong tikah hrin dang pawl in an rak ṭih ṭheu. Israel hrin dang pawl in Efraim hrin cu an rak zohso. Asinain Baal khawzing biaknak in an sual ih curuangah annih cu an thi. 2An sual sinsin ih biak dingah thir in milem an tuah. Minung thinlung in suai copmi ngun milem pawl minung kut in an tuah. Cule, “Cuih milem hnenah raithawinak pek uh,” tiah an ti. Ziangtin so minung in cawcang hmel cuangih tuahmi cawlem cu an hnam thei! 3Curuangah hi minung pawl cu zinglam suumzing bangin an hlo ding, daitla bangin an hloral ding a si. Fang cilnak puum ihsin thli ih a seemmi fanghi bangtuk an si ding; meikhu suahnak ihsin a suakmi meikhu vek an si ding.
4 Bawipa in, “Izipt ihsin a lo hruaisuaktu cu keimah, Bawipa nan Pathian hi ka si. Keimah siar lo Pathian dang nan nei lo. Keimah lawng hi nanmah runtu ka si. 5Thlaler ramṭhing le ramcaar ah ṭhatein ka lo kilkhawi. 6Asinain ram ṭha sungih nan luh tikah nan pum a puar ih nan hna a ngam; cule nan puarthau ih kei cu in hngilh. 7Curuangah kiosa bangin ka lo nam ding. Tlavang bangin nan fehnak lamzin ihsin ka lo bawh ding. 8A fano lonmi savompi bangin ka lo zon ding ih ka lo bauhthlek ṭheh ding. Kiosa bangin nan hmun rori ah ka lo maai ṭheh ding ih sahrang bangin cipseksek in ka lo thlek ṭheh ding.
9“Maw Israel mi pawl, Keimah in ka lo siatsuah ding! Zoso a lo hum thei ding? 10Siangpahrang le hruaitu nan ngen. Asinain atu khuiah so an si? Ziangtin so ram pumpi an hum thei ding? 11Ka thinheng in siangpahrang ka lo pek zo ih ka thinheng ah ka lak sal zo.
12“Israel ih sualnak le mawhnak cu cazual parah ṭhatein nganmi a si ih ṭhatein retkhummi a si. 13Israel cu nun theinak tikcu ṭha a nei, asinain a aat ruangah cuih tikcu ṭha cu a laak hna a thiam lo; amah cu a rung suak zikmi naute a nuih pum sungih suah duh lo ih a kir salmi bangtuk a si. 14Himi pawl cu mithi khua Sheol#Mithi khua Sheol cu vun biak theihmi tlukah an ruat; leilung thuai ah khawthim dok, khawvang dok ah an um, tiah zumnak an nei. ihsin ka run suak lo ding; thihnak kut sung khal in ka sansuak lo ding. Maw Thihnak, na pulhnat cu run keng hnik aw! Maw Sheol, na mi siatsuah theinak thawn ra aw! Himi pawl parah zaangfahnak zianghman ka nei thei nawn lo. 15Israel cu phaikung bangin no hngualhngi hmansehla nelrawn ihsin nisuahnak lam thli sa ka hrangter ding ih an tipuut le an tikhur pawl a caar ṭheh ding. A thil mankhung hmuahhmuah a siat ṭheh ding. 16Pathian a dodal ruangah Samaria cu hrem a si ding ih a ṭio ding. A minung pawl cu ral kut in an thi ding. An faate pawl cu leilung ah denthat an si ding ih an nunau fa vun lai pawl cu an pum zaithlek an si ding,” tiah a ti.
Currently Selected:
HOSEA 13: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.