HOSEA 12
12
1Zingpit ihsin zanlam tiang Israel mi pawl ih an tuahmi cu thil ṭhahnem lo le siatsuahnak lawnglawng an si. An lakah mi zuarthlainak le thisen suahnak a karh ciamco. Assiria thawn ral remnak an tuah ih Izipt thawn pursum leilawnnak an tuah,” tiah a ti.
2 Bawipa in Judah mi pawl mawhthluk ding a nei; Israel pawl khal an nunzia a ṭhat lo ruangah a hrem ding. An tuahmi parah phu a lak ding. 3An pu Jakob cu a u Esau thawn an nuih pum sungih an um laiah an sual-aw; a hung upat tikah Pathian thawn an buan-aw fawn. 4Vancungmi thawn an buan-aw ih a neh. Jakob cu a ṭap ih thlawsuah a dil. Pathian cu Bethel ah Jakob hnenah a ra ih thu a sim. 5Amah cu Cungnungbik Bawipa Pathian a si; Bawipa ti cu a hmin a si. 6Curuangah Jakob ih tesinfa pawl, nan Pathian cu rinsan uhla atu-ah amah ih hnenah kir uh. Rintlak le dingtein nung uhla, nan Pathian hnaṭuan ding cu thinfualte in hngak uh.
Thuṭhennak ṭongkam
7 Bawipa in, “Israel mi pawl cu Kanaan mi pawl vek thotho in an hrokhrawl. An thil leitu pawl kha a dik lo cuai khainak in bum an duh. 8‘Kan lian ngah zo, kan nei ngah zo a si. Zohman in thil dik lo in lennak nan ngah tiah in mawhthluk thei lo ding,’ an ti. 9Sihmansehla kei hi Izipt ram ihsin a lo hruaisuaktu Bawipa nan Pathian ka si. Nelrawn ih nan hnen ka rat laiah puanthlam sungih nan rak um vek khan ka lo umter sal ding.
10“Profet pawl hnenah thu ka sim ih langnak tampi ka umter. Profet pawl hmang in ka minung pawl hnenah ralrinnak ka pek. 11Gilead ah milem an biak ih a biatu hmuahhmuah cu an thi ding. Gilgal ah cawcang in rai an thawi; curuangah biakṭheng pawl cu hramlak ih lungtopen ah an cang ding,” tiah a ti.
12Kan pu Jakob cu Aram ram ah a tlan; cutawkah nupi hlawhnak ah tuu a khal. 13Israel mi pawl Izipt saltaannak ihsin suah dingah le kilkhawi dingah Bawipa in profet pakhat a thlah. 14Israel mi pawl in Pathian cu nasa zetin a thin an hengter; an sualnak ruangah thi tlak an si. Pathian parih thangsiatnak an thlenter ruangah amah in a hrem ding a si.
Currently Selected:
HOSEA 12: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.