Marko 13
13
Ekyana Yesu te Etatturyo Aji Imojit Eneittok
Mt 24:1-2; Lk 21:5-6
1Ninya labusak Yesu aji imojit eneittok ojo obo olo leyiyanak honyi jihonyi, Imijye Hettiyanani, obolori amorwoi huna bwo fe ilamani asik huna. 2Ojo Yesu jihonyi, ?Igonyu iye asik hun obolori’to huna? Obeŋ adi obo amorwo arasa ihorwoŋ obo. Itatturi adi isi daŋ ifau.
Etteri ono Ettigemita
Mt 24:3-14; Lk 21:7-19
3Hetoŋo inyi idoŋe Oliveto an owon ihosyere haji imojit eneittok, ofwonni Petro, Yakobo, Yoane iko Andrea, isi hama, ette isi ifiyo inyi, 4?Iramak hohoi baya adi ihanie nerre hunia? ?Anyo adi etamijani an itahutak hohoi jo ihanie nerre hunia? 5Itteryo Yesu ikyana jihosi jo, Ihumata irrirrya, helaha obo atulo itisyaba itai. 6Ofwonni adi laati arryai ta afure hoŋ hul ojori, Ani alya Kristo, bwo itisyabari adi isi aati arryai. 7Al itaniŋuna tai jo owon narrem bwo fe itaniŋuna tai aati ikyanai jo errem adi hohoi, helafuhoti, nyo oŋida erre huna daŋ ofwonni ati hobeŋ esidi fau. 8Nyo ofwoi adi laati hutto miji obo jyo obo irryomoniere, bwo fe laati hutto lobye obo jyo obo. Ikikiro adi afau imasik hun olufaji bwo fe ottu adi ahure on obolo’to, ati arai erre huna etteri ono ettigemita hun obolori.
9Ihumata ahwattek hatai, iyarai adi itai ilokikoi bwo fe abahye adi itai ihaji imojit. Iyaŋunie adi itai bwo fe ihosyere mandiri iko hobwok ta afure hoŋ iramaniere neruk hatai. 10Ati ihosyere esidi fau oŋida iramani asayyo hun oyiji’to jyo laati daŋ hutta fau daŋ. 11Al iyarai isi itai ilokikoi helafuhoti jo anyo adi ikyanati tai ati ikyanati ihwa isyori jihatai ta asaa nya ikyanari. Nyo obeŋ ara ekyana hatai ati ara ekyana ono Oloyiri ol Olibo. 12Isyo adi obo illanyi iyeri bwo monye lonyi honyi, bwo arrasani aduri monyye hosi naye. 13Oliwarik adi itai aati daŋ ta afure hoŋ ati ol odihu’to many isidi italahuni adi.
Afwanna huno Ettigemita hun Obolori
Mt 24:15-28; Lk 21:20-24
14Al igonyuna tai arrohoji an itamura’to amaji on owotya jyo amaji on obyaŋari inyi owotyari, oŋida hul owoni’to Yudea ofuhoi lidoŋyok. Ijara lya al ihenio hetetaniŋu. 15Ijara lya ol owon’to lihide haji hotobyaŋa isuru ifau iduhuniere obo ariŋ ta haji honyi. 16Bwo fe ijara lya ol owon’to limana hotobyaŋa acaharu iyamari aboŋo honyi. 17Orroho bebe jyo aŋorwo hun oyeduri’to iko hun itadasye’to to noŋitek hwa. 18Omojoti jo oŋida oŋitek hwa obeŋi ofwonni to oŋitek hacoro. 19Nyo to noŋitek hwa owoni adi ettigemita hun obolori hun agalihini ettigemita daŋ t’etteri ’yeuna fau many iko ahana. Ahode obeŋi adi omuk ettigemita agalihini isi. 20Kuyya obeŋ dwo Hobu ihanak oŋitek hunia hun omutari obeŋ dwo tulo italahuno, ati ihanani adi isi hun omutari nyo to hya hul onyimuni. 21To oŋitek hunia al ojo adi obo jihatai, Imijyete Kristo olo, kuyya bu ojo, Kristo lya, heruhoto. 22Nyo odyotoi adi Kristohyen lenyabak iko ebwanak lenyabak hul ihanie adi netamijanita hun obolori iko nedwariti ikemyerek hul onyimuni itisyabari isi. 23Ihumata ’rirrya, eramak ni itai erre huna daŋ hobeŋi isi ofwonni.
Acohuno ono Yesu
Mt 24:29-31; Lk 21:25-28
24Ihalu ettigemita huno noŋitek hunia, oye adi oloŋ bwo fe nayafa ette ilak faŋan. 25Ottoi bu elelyefi douna t’edou, bwo fe ikikiroi adi negoliti hutte dou. 26Attati laati igonyuna adi Lonyi tulo, al isuru t’edou lihide idisi iko nadwaran bwo nakwatan on obolo. 27Ifak adi inyi anjelohyen hotottubaniehe lonyimot honyi hutto ŋaco aŋwan huno oyyami hutta fau daŋ.
Narryamara ono Aŋaboli
Mt 24:32-35; Lk 21:29-33
28Omijana awoyo hiram to ŋaboli. Al ofwonni atanata hony janan bwo fe oyisuni abene, imijana tai jo ilyaha atahas. 29Ihwania bu al igonyuna adi itai nerre huna daŋ idwoŋi, omijana jo ilyaha attuna honyi. 30Ahode ahode ajo ni jihatai jo obeŋi adi nelahaji ana oyei many ihanierek erre huna daŋ. 31Nyo obyaŋarani adi nedou iko nafau ati obeŋi adi nekyanita hoŋ olitohini ’tuŋ.
Abyaŋan Obo Mijana Attuna ono Lonyi Tulo
Mt 24:36-42; Lk 17:26-30, 34-36
32Ati to oloŋ ania iko asaa on ottuniere inyi obeŋ obo omijak, dwadi bu anjelohyen hutte dou iko Lonyi Hollum, obeŋ obo omijak arari Monye hama omijak. 33Ihumata mijo, ihumata ’ra. Ibyaŋata tai imijana baya adi ottu inyi. 34Ara ihwa atulo ol obusak ahaŋ honyi bwo addaddaharu, ati ahosyere isyo inyi jyo legyamak honyi egyama ababo ette inyi iramana errirryani ijara omijo. 35Tania ihumata mijo nyo ibyaŋata tai imijana baya adi ottu eleittok hatai. Kuyya ottu adi inyi ta akikai, kuyya bu ta attari, kuyya ottu inyi ilok ohohoro, kuyya bu ta amotye. 36Ihumata ŋadi ilunyu inyi lunyuna bwo orumak itai ijototi. 37Erre hun ekyana ni jihatai ekyana ni jyo aati daŋ, ihumata mijo.
Currently Selected:
Marko 13: LOT1969
Highlight
Share
Copy
Want to have your highlights saved across all your devices? Sign up or sign in
This text was originally published by the British and Foreign Bible Society in 1969.