Marko 11
11
Ajiŋana Yesu Yerusalem Ihwa Hobu
Mt 21:1-11; Lk 19:28-40; Yn 12:12-19
1Lafanyi isi imisik Betfaje iko Betania hutteger doŋe Oliveto, ilyaha Yerusalem attati Yesu ifahina leyiyanak honyi arrihai, 2ette iramana isi, Ifwatta limiji on owon ihosyere hatai, inyurana adi itai nobo aŋarri sigirya dia an ifitani, on hobeŋ nya obo atulo itoŋo ihorwoŋ honyi. Ohouniete inyi, iyauniete dini. 3Al ifiyo obo itai ojo, ?Anyo ihaniete tai?, itarraŋata ojo, Hobu awak inyi, ati inyyahuno adi inyi jihoi kwak. 4Tania ette isi fwatan ette rumana aŋarri sigirya iryatani likoi iger ikat haji ette isi houna inyi. 5Attati laati hul owoni’to dia ifiyo isi ojori, ?Anyo ihoyete tai asigirya ania? 6Ette isi itarraŋ ihwa iramak dwo Yesu isi ette laati hya ŋatana isi ofwoi. 7Attati isi iyaŋuno aŋarri sigirya jyo Yesu attati isi fyatana aboŋojin ihorwoŋ honyi ette Yesu itoŋo dia. 8Attati laati arryai fyatana aboŋojin hosi ikoi bwo omuk ofyatani atanata ’yanio hun oyefuni isi ’totwa matta. 9Hul ofwoi’to ahosyere honyi bwo fe hul ofwonni’to tehalu ojori, Itahabuyete Hollum. Hotomunoi lya ol ottu’to ta afure ono Hobu. 10Hotomunoi olobye on ottu’to ono Hobu hohoi Davide. Ijara etahabuyo hatawana idou. 11Ojiŋak Yesu Yerusalem ette jiŋana ihaji imojit eneittok, ette mijo erre dia. Ihalu ette inyi leten imiji Betania iko leyiyanak honyi ’tomon harrihai.
Aŋaboli on Obeŋ’to Oŋi
Mt 21:18-19
12Nya motye acaharai isi to Betania Yerusalem ette Yesu niama. 13Igonyu inyi aŋaboli alamarai iko abene arryai ette inyi leten mijo kuyya arumak adi inyi omuk aŋer dia. Lafany inyi iwoyo honyi ette rumana abene ijai nyo obyaŋara ayafa nya on oŋerihiniere aŋaboli. 14Ette Yesu jaran jihonyi, Ijara obo hotobyaŋa inyyak ŋiyo omuk aŋer jihoi tulaŋ. Ette leyiyanak honyi itayiruna nekyana ania.
Etaliboryo Yesu Aji Imojit Eneittok
Mt 21:12-17; Lk 19:45-48; Yn 2:13-22
15Ette isi fanyan Yerusalem ette inyi leten ihaji imojit eneittok. Itteryo inyi ifuhara laati hul itinyyaŋai’to iko hul inyyaŋai’to asaŋ hosi ihaji ania. Ette inyi sulara ateremejahyen huno atobok gurusi kwalalaŋ, iko akurusi huno etinyyaŋak wolosin. 16Ati obeŋ inyi iruk obo iyaro omuk erre tehiji haji. 17Ette inyi ittiyenio laati ojo, Igyoroni ahode jo, “Ifurani adi aji hoŋ ahaji imojit ono aati daŋ, ati iloitoto tai inyi ahinom hahalak.” 18Itayiruni ehumak eleittaha iko egyorok inyi ikyana ette isi ’tifya ekoi ittohori inyi ati abaŋi isi inyi nyo illillihai laati daŋ ta nettiyenita honyi. 19Ninya ara akikai ette isi fwatan addi to miji ania.
Awoyo Hiram ono Aŋaboli
Mt 21:20-22
20Agalarai isi ta amotye ette igonyuna aŋaboli inor many jyo nadde honyi. 21Ogotyere Petro erre hoŋole ette jaran jyo Yesu, Hettiyanani imijye, ayyani oŋole ipitak iye aye. 22Itarraŋ Yesu jihosi ojo, Iruhoto jyo Hollum. 23Ahode ajo ni jihatai atulo ol ojo’to jyo adoŋe ania, Otte, irwoŋok ahwan hoi itwa hari, bwo fe obeŋ adi ikuyya ta ataji honyi ati iruk inyi ihwa ikyana inyi, ihanie adi. 24Tania eramak ni itai jo, erre hun ifiyete tai ta amojo bwo iruhoto tai jo ifwotuna adi itai, ifwotuna adi. 25Al imojoti tai ati iwanata tai iko obo eram jyo obo atulo, obusana inyi, tania monyatai ette dou obusak adi eyyata hatai. 26Al ibyaŋata tai ibusana obo atulo obeŋ adi monyatai ette dou obusak eyyata hatai.
Efiyo Leittaha Yesu te Elaballok Honyi
Mt 21:23-27; Lk 20:1-8
27Ette isi inyyak caharo Yerusalem. Hadaha Yesu ihaji imojit eneittok ofwonni ehumak eleittaha iko egyorok iko amarwak jihonyi. 28Ette isi ifiyo inyi ojori, ?Ta anani elaballok ihanio iye erre huna? ?Ŋai isyo jihoi elaballok ihaniere isi? 29Ojo Yesu jihosi, Efiyo ni itai obo nefi, kuyya itarraŋata tai jihoŋ eramak adi ni itai ta anani elaballok an ehanio ni erre huna. 30?Ottu elaballok ono Yoane an ibatisyere inyi laati tai? ?Jyo Hollum kuyya to wati? 31Attati isi itarisa ta ahwattek hosi ojori, Al ejo hohoi, Ottu elaballok honyi jyo Hollum, ojo adi inyi, ?Nyo ibyaŋata tai iruhoto inyi? 32Ati al ejo hohoi, Ottu elaballok honyi to wati, ebaŋ hohoi aati nyo iruhi aati daŋ ara Yoane aheyani sayyo. 33Tania itarraŋi isi jyo Yesu ojori, Ebeŋ hohoi emijak. Attati Yesu jaran jihosi, Ani bwo fe abeŋ ni eramak itai ta anani elaballok en ehanio ni erre huna.
Currently Selected:
Marko 11: LOT1969
Highlight
Share
Copy
Want to have your highlights saved across all your devices? Sign up or sign in
This text was originally published by the British and Foreign Bible Society in 1969.