Apocalipsis 4
4
Ich'bil o ta muc' te ta vinajel li Diose
1C'alal jech li'albat scotol chac' le'e, ts'acal laj quil jamal ti'na ta vinajel. Li c'op ti ba'yuc laj ca'ay, ti xco'laj xchi'uc x'oc' oq'uese, jech laj yalbun: “La' muyan tal li'i; vu'un chacac'bot avil scotol li c'usitic ta to xc'ot ta pasele”, xiyutun.
2Jech ta ora no'ox la sventainun svu'el li Espiritue, jech laj quil jun muc'ta chotlebal ta vinajel. Oy boch'o te chotol tspas mantal. 3Li boch'o te chotole oy xojobal jech chac c'u cha'al xojobal jaspe ton xchi'uc cornalina ton. Ta muc'ta chotlebale te oy jun vacnabal. Ja' jech ta q'uelel jech chac c'u cha'al esmeralda ton.#Ez 1.26-28; 10.1. 4Ta joyob li muc'ta chotlebale oy yan chanib xcha'vinic (24) chotlebal te oy. Ja' te chotajtic chanib xcha'vinic (24) banquilaletic, puru sac sc'u' slapojic, xchi'uc oy scoronail sjolic pasbil ta c'anal taq'uin. 5Ta muc'ta chotlebale te chloc' sacsevuletic, xchi'uc xc'ulet no'ox chauquetic.#Ex 19.16; Ap 8.5; 11.19; 16.18. Ta yeloval li chotlebale oy vucub candil te tsanajtic;#Ez 1.13. le'e ja' li vucub espíritu yu'un Diose.#Zac 4.2; Ap 1.4. 6Ta yeloval li chotlebale, xco'laj xchi'uc nab yilel, sts'ayts'un jech chac c'u cha'al nen.#Ez 1.22. Ta mero stuq'uil, xchi'uc ta spat xocon li muc'ta chotlebale oy chanib c'usi cuxajtic nojemic ta satil. Oy sat ta yelovic xchi'uc ta spatic. 7Li sba c'usi cuxule xco'laj xchi'uc león. Li xchibale xco'laj xchi'uc tot vacax. Li yoxibale xco'laj xchi'uc sat vinic. Li xchanibale xco'laj xchi'uc xic chvil.#Ez 1.5-10; 10.14. 8Li chanib c'usi cuxajtique oy vaquib xic' jujunic. Jech noxtoc oy satic ta spat xiq'uic xchi'uc ta yolon xiq'uic.#Ez 1.18; 10.12. Ta c'ac'al ta ac'ubal scotol ora jech chalic:
“Ch'ul Dios, Ch'ul Dios,
ja' Ch'ul Dios stuc li Cajvaltic ti ech'em svu'ele.#Is 6.2-3.
Ja' li Boch'o te ono'ox oye, xchi'uc ti te oy o li' ta orae, xchi'uc ti te oy o sbatel osile”, xiic.
9C'alal ja'o chalbeic slequilal, ja'o chich'ic ta muc', xchi'uc tstojbeic ta vocol li Boch'o te chotol ta chotlebale, ja' li Boch'o cuxul o sbatel osile. 10Li chanib xcha'vinic (24) banquilaletique ja'o chlic spatan sbaic ta stojol ec li Boch'o te chotol ta chotlebale, chlic yich'ic ta muc' li Boch'o cuxul o sbatel osile. Tsloq'ues li scoronaique; te chaq'uic ta stuq'uil xchotleb, jech chalic:
11“Cajval, vo'ot Diosot cu'uncutic,
vo'ot no'ox atuc oy ta aventa albel alequilal,
ich'el ta muc', xchi'uc vo'ot no'ox atuc oy avu'el.
Yu'un vo'ot laj apas scotol li c'usitic oye,
yu'un jech la sc'an avo'nton ti jech oye,
ti jech i'ayin scotole”, xiic ta stojol li Diose.
Currently Selected:
Apocalipsis 4: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.