2 Samuel 21
21
Ipacbat sc'oplalic yu'un Dios li gabaonetique
1C'alal ochem ta ajvalilal li Davide, ital tsots vi'nal oxib jabil. Li Davide lic sjac' ta stojol li Muc'ul Diose, jech itac'bat: “Li vi'nale ja' ital ta scoj li Saúl xchi'uc xnich'nabtaque, yu'un ja' la smilic li gabaonetique”, x'utat.
2Ja' yu'un li Davide laj yic' li gabaonetique yu'un chchi'in ta lo'il. (Li gabaonetique ma'uc yalab xnich'nab li Israele; ja' sts'unubal amorretic. Ja' ti oy ono'ox c'usi xchapanojic ta stojol Dios xchi'uc li israeletique.#Jos 9.3-15. Pero li Saule tsc'an ox chules ta j'ech'el, yu'un la snop ti jech lec ch-ilat ta scotol Israel xchi'uc ta Judae.) 3Li Davide jech la sjac'be:
—¿C'usi ta jpasboxuc? ¿C'u x'elan xu' ta jlecubtas li c'usi pasbiloxuque yu'un jech xu' chac'anbeic bendición li yu'untac Muc'ul Diose? —xut.
4Itac'ov li gabaonetique:
—Muc ta sventauc taq'uin li c'usi quechel cu'uncutic jchi'uc Saúl xchi'uc xnich'nabtaque. Xchi'uc mu jc'ancutic boch'o chcham junuc avu'unic te ta Israel —xiic.
Li Davide jech laj yal:
—Ja' lec albicun li c'usi chac'anique, ta jpas —xi.
5Itac'ovic:
—Li vinic ti tsc'an chiyulesuncutic, ti la xchapan ti mu junuc chiscomtsanuncutic li' ta scotol avosilalic vo'oxuc li israeloxuque, 6ta jc'an chiyac'bun ta jc'obcutic vucubuc squeremetic yu'un ta joc'ancutic ta te' ta stojol Muc'ul Dios te ta lum Gabaa yu'un li Saúl ti t'ujbil yu'un Muc'ul Diose —xiic.
Li ajvalile la xch'un, jech laj yac'an ta c'abal. 7Yan li Mefi-boset xnich'on Jonatán, smomnich'on Saule muc xac' ta c'abal, yu'un oy c'usi lec xchapanojic ta stojol Muc'ul Dios li David xchi'uc Jonatane.#1 S 20.15-17; 2 S 9.1-7. 8Ja' laj yac' ta tsaquel li chib yalab Rizpa, stseb Ajae. Ja' Armoni, Mefi-boset sbiic; ja' yol xnich'onic xchi'uc li Saule, xchi'uc li vo'ob yalabtac Micale,#1 S 18.19. ja' li stseb Saule, ja' li yol xnich'onic xchi'uc Adriel xnich'on Barzilai ta Meholae. 9Jech laj yac'be ta sc'ob li gabaonetique, bat sjoc'anic ta vits ta stojol li Muc'ul Diose. Jech jmoj icham o svucubalic. Ja' ichamic ta sliquebal sc'ac'alil tuch' cebada yu'unic.
10Li Rizpa, stseb Ajae, la stsac jlic c'u'il sventa me'nal ti ch'ixlajan ta lapele; bat xmochan sba ta jbej muc'ta ch'en. Te oy o c'alal to ta sliqueb tuch' trigoaltic, ja' to ti c'alal iyal vo'e. Me jcotuc mut muc xac' yaluc ta sbaic li animaetique, xchi'uc me jcotuc chonbolometic muc xac' nopajuc ta sts'elic ta ac'ubaltic.
11Bat yalbeic David c'usi la spas li Rizpae, ja' li yan ants yu'un Saule. 12Ja' yu'un li Davide bat stsobbeic tal li sbaquil Saúl xchi'uc xnich'on Jonatán ti te mucajtic ta yosilal Jabes Galaade. Yu'un li Jabes galaadetique ja' ay yich'beic tal ta mucul sbec'talic te ta Bet-sán yo' bu la sjoc'anic li filistaetic c'alal la smilic te ta Gilboae.#1 S 31.8-13. 13Jech laj yich'beic batel li sbaquil Saúl xchi'uc Jonatane, xchi'uc la stsobbeic batel sbaquil noxtoc li vucub laj yich'ic joc'anel ta vitse. 14Li sbaquiltac Saúl xchi'uc Jonatane te bat smuquic yo' bu mucul li Cise, ja' li stot Saule. Ja' te ta yosilal Benjamín ta Zela. Ja' jech la spasic scotol jech chac c'u cha'al i'albatic yu'un li ajvalile. C'alal jech la spasique, lic c'uxubinaticuc yu'un Dios ta scotol yosilalic.
Icoltaat yu'un Abisai li Davide jech muc xmilat
15Li filistaetique lic stsaquic ta pleito yan velta li israeletique. Ja' yu'un li Davide ibat xchi'uc yaj'abteltac, bat spasic pleito xchi'uc li filistaetique. Pero li Davide toj ep lubel laj ya'ay. 16Oy jun muc'ta natil vinic tsc'an ox tsmil li Davide; yich'oj jun slanza ech'em ta lajuneb xcha'vinic (30) kilo yalal, xchi'uc xchuquinoj jun ach' espada. 17Pero li Abisai yol Sarviae bat scolta li Davide. Laj yac'be sba xchi'uc li filista vinique, jech ivu' yu'un la smil. Ja' yu'un li svinictac Davide jech laj yalbeic ta jamal li Davide: “Mu xa me xloc' achi'inuncutic ta spas pleito yan velta, yu'un jech mu xtu'p o li luz ta stojol israeletique”, xutic.
Li svinictac Davide la spasic pleito xchi'uc natil viniquetic
(1 Cr 20.4-8)
18Ts'acal to la spasic pleito yan velta te ta Gob xchi'uquic li filistaetique. Li Sibecai smomnich'on Husae ja'o yorail te la smil li Saf, ja' li sts'unubal natil viniquetique. 19Ts'acal la spasic pleito yan velta te ta Gob xchi'uc li filistaetique. Li Elhanán xnich'on Jair te ta Belene la smil comel jun vinic Goliat sbi liquem ta lum Gat. Li vinique lec muc' balbal li yoc slanzae; co'ol jech chac c'u cha'al ste'el jalubil poc'.
20Ts'acal la spasic yan velta pleito te ta lum Gat. Oy jun vinic bats'i nat ta jyalel. Oy vaquib sbic'tal jujun sc'ob xchi'uc jujun yacan; ja' chanib cha'vinic (24) ta scotol. Ja' sts'unubal noxtoc li natil viniquetique. 21Ja' la sa'ilan ta c'op li israeletique, jech imilat yu'un li Jonatán xnich'on Simea, sbanquil Davide. 22Li chanib natil viniquetic le'e ja' smomnich'nab li Refa te ta lum Gate, pero i'och ta sc'obic xchi'uc yaj'abteltac li Davide.
Currently Selected:
2 Samuel 21: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.