1 Samuel 3
3
Ic'opanat yu'un Dios li Samuele
1Li querem Samuele te ch-abtej ta stojol Muc'ul Dios; ja' ventainbil yu'un li Elie. Ja'o yorail ti baq'uintic xa no'ox chc'opanatic yu'un Muc'ul Diose; mu'yuc xa boch'o c'usi ch-ac'bat lec yil ta xvayech. 2Oy jun c'ac'al c'alal chmac xa sat li Elie, ja'o te vayem ta yut sna. 3Yan li Samuele te vayem ta xch'ulna Muc'ul Dios yo' bu oy li xcaxail smantale. Tsanal to'ox li candile. 4Li Muc'ul Diose la sc'opan li Samuele:
—Samuel —xut.
—Li' oyune —xi li Samuele.
5Ibat ta anil yo' bu oy li Elie, jech c'ot yalbe:
—Lital xa. ¿C'usi chaval? —xut.
Itac'ov li Elie:
—Mu'yuc bu xaquic'ot. Sutan, bat vayan —xut.
Jech ibat vayuc yan velta. 6Li Muc'ul Diose la sc'opan yan velta li Samuele:
—Samuel —xut.
Li Samuele ibat yo' bu oy li Elie, jech c'ot yalbe:
—Li' oyune. ¿C'usi chaval? —xut.
Itac'ov li Elie:
—Unin olol, mu'yuc bu xaquic'ot; sutan batel, bat vayan —xut.
7Li Samuele mu'yuc to bu yotquinoj li Muc'ul Diose, xchi'uc mu'yuc to bu ya'yoj jtenuc c'u x'elan chc'opoj. 8Ic'opanat yoxibal velta yu'un Muc'ul Dios li Samuele, jech ibat yan velta yo' bu oy li Elie, jech c'ot yalbe:
—Li' oyune. ¿C'usi chaval? —xut.
Li Elie lic sna' ti ja' Muc'ul Dios chc'opoj ta stojol li Samuele. 9Jech laj yalbe:
—Bat xa vayan. Me chasc'opanot yan veltae, jech xatac'be: ‘C'opojan, Cajval, ta xca'ay c'usi chaval, vu'un avajtunelun’, uto —xut.
Jech isut batel li Samuele, bat vayuc. 10Ital noxtoc li Muc'ul Diose; te va'al ivul ta sts'el. La sc'opan yan velta jech chac c'u cha'al ono'oxe:
—Samuel, Samuel —xut.
—C'opojan, ta xca'ay c'usi chaval, vu'un li avajtunelune —xi.
11Li Muc'ul Diose jech laj yalbe:
—Oy c'usi tsots ta jpas ta stojol li israeletique. Toj c'ux ta a'yel cha'yic li boch'otic ta xa'yique. 12Ja' xa yorail ta xcac' c'otuc ta pasel ta stojol Elí scotol li c'usi laj cal ta jpas ta stojol yalab xnich'nabe. 13Calojbe xa ti j'ech'el ta xcac'be o stoj smulic xchi'uc yalab xnich'nab ta scoj ti chopol c'usi la spasique. La sna' ti chopol c'usi tspasic li xnich'nabe, pero mu'yuc la staq'ui. 14Ja' yu'un laj xa cal ta jamal ti j'ech'el mu'yuc ta jtu'pbe o smulic li yalab xnich'nab Elie, ac'o me tsmilbicun jmoton, o me yantic matanaletic —x'utat.
15Li Samuele ivay yan velta. Ja' to ilic ta sob yoc'omal; la sjamanbe li sti' ch'ulnae. Pero li Samuele ta xi' ta yalbel Elí li c'usi i'albat yu'un Muc'ul Diose. 16Li Elie laj yic' li Samuele, jech laj yalbe:
—Cunin querem Samuel —xut.
Itac'ov li Samuele:
—Li' oyune —xi.
17Li Elie jech la sjac':
—¿C'usi laj yalbot li Muc'ul Diose? Avocoluc jamal xavalbun; mu me xamuc ta avo'nton. Me chamuc ta avo'nton jaybeluque, tsots ac'o yac'bot atoj li Diose —xut.
18Li Samuele lic yalbe Elí li c'usi i'albate, me jbeluc mu'yuc la snac'. C'alal laj ya'ay li Elie, jech laj yal:
—Ac'o spas li c'usi tsc'ane yu'un ja' Muc'ul Dios stuc —xi.
19Li Samuele ich'i; lec chi'inbil yu'un Muc'ul Dios. Persa laj yac' c'otuc ta pasel c'usi laj yalbe Samuel li Muc'ul Diose. 20Scotol li israeletic xlic ta Dan c'alal to ta Beersebae la sna'ic ti ja' lequil j'alc'op yu'un Muc'ul Dios ta melel li Samuele. 21Li Muc'ul Diose laj yac' sba ta ilel yan velta ta Silo, yu'un ja' ono'ox te ic'opanat yu'un Muc'ul Dios li Samuele.
Currently Selected:
1 Samuel 3: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.