1 Samuel 2
2
Laj yalbe slequilal Dios li Anae
1Li Anae la sc'opan Dios, jech laj yal:
“Muc'ul Dios, toj xcuxet no'ox co'nton ta atojol,#Sal 113.5-9; Lc 1.46-55.
yu'un laj avac'bun jtsatsal yan velta.
Xu' xa ta jmacbe yeic li boch'o chisna'leicune,
yu'un laj xa acoltaun.
Jech toj xcuxet no'ox co'nton.
2Mu'yuc yan ch'ul Muc'ul Dios jech chac c'u cha'al vo'ot.
Dios cu'un, mu'yuc yan jpojubbail jech chac c'u cha'al vo'ot.
Mu'yuc boch'o yan jech chac c'u cha'al vo'ot.
3Mu'yuc boch'o xu' tstoy sba ta sventa sc'op.
Mu'yuc boch'o xu' toj ech'em yac'oj sba,
vo'ot no'ox xana' scotol, vo'ot li Muc'ul Diosote.
Vo'ot chabis, vo'ot chachapan scotol c'usi tspas li cristianoetique.
4Vo'ot chalilinbe yabtejebic li boch'otic tsots xu' yu'unique.
Ja' chavac'be stsatsalic li boch'o mu'yuc stsatsalique.
5Li boch'otic oy to'ox ep scomelal sve'elique,
ta xa xac' sbaic ta ch'amanel ta juteb pan.
Yan li boch'otic chvi'najic to'oxe,
mu'yuc xa vi'nal cha'yic.
Li boch'o mu to'ox sna' x'alaje,
i'alaj xa vucub velta.
Li boch'otic oy to'ox ep yolique,
mu xa x'alajic o.
6Li Muc'ul Diose ja' chac' chijcham; ja' chac' chijcuxi.
Ja' chac' chijyal ta yavil animaetic;
ja' chisloq'uesutic tal noxtoc.
7Li Muc'ul Diose xu' chispasutic ta me'on; xu' chispasutic ta jc'ulej.
Xu' chisyalesutic ta lum; xu' chistotsutic liquel.
8Li Muc'ul Diose tstots liquel ta banamil li me'onetique.
Tsloq'ues tal ta c'a'eptic li jc'anlimosnaetique,
yu'un co'ol chchotan xchi'uc li banquilaletique.
Chac'be yavil ti bu ich'bil ta muq'ue,
yu'un li Muc'ul Diose ja' yoyal banamil;
ja' sventainoj li banamile.
9Ja' chchabi batel ta jujujet yacan li boch'otic tuc' yo'ntonique;
yan li boch'otic chopolique chch'ayic batel ta ic' osil,
yu'un mu'yuc boch'o xu' tstsal ta stsatsal stuc.
10Li Muc'ul Diose biq'uitic tslilin li yajcontrae;
c'alal to ta vinajel tst'omesbe tal chauc ta stojolic.
Li Muc'ul Diose ja' chchapan sbejel banamil.
Chac'be stsatsal li ajvalil st'ujoje;
toj ep stsatsal svu'el chac'be”, xi li Anae.
11Jech isut batel ta sna te ta Ramá li Elcanae. Li squereme te itun yu'un Muc'ul Dios ta stojol li Elie.
La sta smul xnich'nabtac Elí
12Li xnich'nabtac Elie puru chopol viniquetic; muc xich'ic ta muc' li Muc'ul Diose, 13xchi'uc muc sventainic lec li yabtelic sventa paleal ta stojol xchi'iltaquique. Yu'un c'alal oy boch'o chtal yac'be smoton Diose, te chbat jun smozo li palee yich'oj batel jun xluchubil ti'bol. C'alal ja' to sbats'il ta'ajel li ti'bole, 14li xluchubile tstic' ochel ta perol, ta bin, ta tina, o ta muc'ta bin. Pero li ti'bol chluch loq'uele sc'oplal ja' yu'un li palee. Ja' jech tspasilanic o ti c'alal chc'otic jujun velta li israeletic te ta Siloe. 15Jech noxtoc c'alal mu'yuc to'ox chc'ac' scotol li xepu te ta scajleb smoton Diose, li smozo palee jech chc'ot yalbe li boch'o te chac'be smoton Diose: “Ac'bun batel ti'bol sventa ta jvobe li palee. Mu sc'an me toc'on chavac'bee, tse tsc'an”, xut. 16Pero me ch-albat ti persa chc'ac' ba'yuc li xepue, ti ja' ts'acal ac'o stsac c'u x'elan tsc'ane, jech chal noxtoc: “Persa chavac'bun batel ta ora. Me mo'oje, chajpojbot batel ta persa tana”, xi. 17Ja' yu'un li queremetic le'e toj tsots smulic ta stojol Muc'ul Dios, yu'un mu xa xich'ic ta muc' li smoton Muc'ul Diose.
18Pero li querem Samuele te ch-abtej o ta stojol li Muc'ul Diose; slapoj jun mocan c'u'il pasbil ta lino no.#2.18 Lino - Q'uelo Glosario. 19Jech noxtoc c'alal chbat yac'beic smoton Dios ta jujun jabil li stot sme'e, tspasbeic batel jujulic sc'u' ta jujun jabil. 20Ja' yu'un li pale Elie chac'be bendición li Elcana xchi'uc yajnile, jech chalbe: “Ac'o yac'bot yan anich'nab li Muc'ul Diose; ja' xq'uexol ti li' laj yac' o ta stojol Muc'ul Dios li avajnile”, xut. Jech tsutic batel ta snaic. 21Li Muc'ul Diose laj yac'be bendición li Anae, jech ina'p xch'ut yan velta. Jech lic to alajuc li Anae; ivoc' oxib squeremetic xchi'uc chib stsebetic. Yan li Samuele te chch'i o batel ta stojol li Muc'ul Diose.
22Li Elie toj mol xa, la sna' scotol c'usi chopol tspasic ta stojol israeletic li xnich'nabe, xchi'uc ti chchi'inic ta vayel li antsetic te chchabiic ti'ch'ulna pasbil ta nucule. 23Jech laj yalbe li xnich'nabe: “¿C'u yu'un ti toj chopol c'usi chapasique? Yu'un chca'ay chlo'ilajic scotol jlumaltic ti chopol avabtelique. 24Jnich'nab, mu xapasic jech, yu'un mu lecuc li ac'oplalic ca'yoje. Vo'oxuc ta acojic tsa' smulic ta stojol Muc'ul Dios li jchi'iltactique. 25Me oy jun vinic tsa' smul ta stojol yan xchi'ile, ja' chchapanatic yu'un li Muc'ul Diose. Pero me ja' tsa' smulic ta stojol Muc'ul Diose, ¿boch'o xu' tsc'anbeic vocol ta stojol?”, xut. Pero muc xa xich'beic ta muc' sc'op li stotique, yu'un li Muc'ul Diose chapal xa yu'un ac'o chamicuc.
26Li querem Samuele te yochel ch'iel batel. Lec ch-ilat yu'un Muc'ul Dios xchi'uc lec ch-ilat yu'un cristianoetic.
27Ts'acal te ic'ot jun j'alc'op yu'un Dios yu'un bat sq'uel li Elie, jech c'ot yalbe: “Li Muc'ul Diose jech chayalbot: ‘C'alal te to'ox oy ta mozoil ta sc'ob faraón ta Egipto li amoltote, lec laj cac' jba ta otquinel ta stojol. 28Vu'un la jt'uj loq'uel ta stojol li jaychop achi'iltac ta israelale, yu'un la jtic' ta paleal, yu'un ja' chchic'bicun jmoton te ta scajleb, xchi'uc chchiq'uic pom, xchi'uc tslapic tal ta jtojol li mocan c'u'ile.#Ex 28.1-4. Xchi'uc ja' laj cac'beic ta sc'ob amoltotac li jmoton chaq'uic achi'iltaquic ta israelale.#Lv 7.35-36. 29¿C'u yu'un muc xavich'ic ta muc' li milbil jmoton, xchi'uc li yantic matanal ti laj cal chich' aq'uel te ta ch'ulna pasbil ta nucule? ¿C'u yu'un ja' toj ech'em laj avich' ta muc' li anich'nab jech chac c'u cha'al vu'une, yu'un laj ajubes ta lequil matanaletic ti chiyac'bicun li jteclum cu'une?’, xi li Muc'ul Diose. 30Ja' yu'un li Muc'ul Dios yu'un Israele jech chal: ‘Li vu'une caloj ono'ox ti j'ech'el chatunic o cu'un achi'uc avalab anich'nabe. Pero tana chcal ta jamal ti j'ech'el ta jtuch'boxuc o li avabtelique. Ja' chquich' ta muc' ec li boch'o chiyich'un ta muq'ue. Yan li boch'o chisbajune, mu'yuc stu chquil ec. 31Ista xa yorail ta jtuch' o li avabtelique xchi'uc li yabtel amoltotac ta vo'onee, jech mu xa xmalubic o li anich'nabe. 32Ta to xavil ti mu'yuc stu chcomic o li avalab anich'nabe, xchi'uc ta to x'it'ixaj avo'nton yu'un li c'usi lec ta jpas ta stojol achi'iltac ta israelale yu'un mu'yuc boch'o chmalub o avu'unic li vo'oxuque. 33Pero ta to jcomtsan jun aquerem te ta scajleb jmoton, pero ja' no'ox chayac'bot avat avo'nton xchi'uc avocol. Scotol li boch'otic chvoc'an avu'unique ta yololalic no'ox chchamic. 34Ja' senyail ta aventa chcom li chib anich'nab Ofni xchi'uc Finees ti ta persa chc'ot ta pasele, yu'un xchibalic chchamic ta jun no'ox c'ac'al. 35Vu'un ta jtic' jun pale ti lec tuc' yo'ntone, ti ja' tspas c'usi oy ta co'nton, xchi'uc c'usi jnopoje. J'ech'el ta xcac'beic o yabtelic xchi'uc yalab xnich'nab. Jech j'ech'el te chtunic o ta stojol li ajvalil jt'ujoje. 36Li boch'otic cuxajtic to chcom avu'unique, ta xtal squejan sbaic ta stojol ajvalil ta jsep saquil taq'uin, xchi'uc ta juteb pan, jech chvul yalic: ‘Avocoluc ac'bun to jutuc cabtelcutic li' ta atojolic yu'un jech xu' ta jta jutuc jve'elcutic’, xiic”, x'utat yu'un j'alc'op li Elie.
Currently Selected:
1 Samuel 2: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.