JEREMIA 49
49
Ammon ta pangulwa kOmuwa
1Omuwa okwa popi Ammon ta ti: “Aalumentu Aaisraeli oye li peni? Kaku na nando ogumwe a popile evi lyawo? Omolwashike ye etha aalongeli yaMilkom taa kwata po oshikandjo shezimo lyaGad e taa kala mo? 2Ihe esiku otali ya, uuna aantu yomoshilandopangelo Rabba tandi ke ya uvitha onkugo yolugodhi, notashi ka kumunwa po, nomikunda dhasho otadhi ka lunguna po. Nena Israel ota ka kuthulula ko evi lye kumboka ye li kuthile po. 3Heshbon, takuma, oshoka Ai osha hanagulwa po. Aakiintu yomuRabba, lileni oosa. Zaleni omahahi ne mu lile. Pwampwaukeni pokati komakulukuma. Kalunga keni Milkom ota falwa muupika pamwe naayambi nomalenga ge. 4Aahasha ne, otamu itangele shike? Oonkondo dheni odha kwisha. Oshike mwi inekela oonkondo dheni notamu ti, kaku na ngoka te mu itakeke? 5Otandi ke mu undulila ehaluko tali zi koombinga adhihe. Amuhe otamu ka ya ontuku. Shaa ngoka ota ka holeka omwenyo gwe mwene, nokape na we ngoka ta ka gongela ishewe omatanga.
6“Ihe konakuyiwa otandi ka hepulutha Ammon ishewe. Ongame, Omuwa, nda popi.”
Omuwa ta pangula Edom
7Omuwa Omunankondoawike okwa popi Edom ta ti: “Aaedom oya kanitha tuu oondunge dhawo? Aagandjindunge yawo itaye ya tsu we omayele mushoka taa ningi? Uunongo wawo auhe owa kana? 8Aadedan, pilukeni mu matuke! Ka holameni! Otandi ka hanagula po oluvalo lwaEsau, oshoka ethimbo olya thiki, ndi ya geele. 9Aatononi yomandjembele ohaa thigi ko omakukila komiviinu, aafuthi uusiku ohaa kutha po ashike shoka ye shi hala. 10Ihe oluvalo lwaEsau otandi ke lu hula thiluthilu noku lu tula pontundulu, noitalu vulu we okuholama. Aaedom ayehe otaa ka yonagulwa po. Kape na ngoka ta hupu ko. 11Thigilii ndje oothigwa dheni, notandi ke dhi tekula; aaselekadhi yeni nayi inekele ndje.
12“Nokuli mboka inaayi ilongela okugeelwa, oye na okunwa moshitenga shegeelo. Omolwashike ngoye u kale inoo geelwa? Aawe, nangoye wo ou na okunwa mo. 13Ongame mwene nda gana kutya oshilando Bozra otashi ka ningwa ehalutho notashi mbugala; aantu otaye ke shi nyonkela e taa tumbula edhina lyasho, nge taa tukana. Omikunda adhihe dhopopepi otadhi ka yonagulwa po sigo aluhe. Ongame, Omuwa, nda popi.”
14Onda ti: “Edom, onda taamba elaka lya zi kOmuwa. Okwa tumu omutumwa a lombwele iigwana, yi gongaleke omatangakwiita gayo, ge ku ponokele. 15Omuwa ote ke ku yululukitha, nokape na ngoka te ku simaneke. 16Uuntsa woye owe ku ningilila mo. Kaku na ngoka te ku tila, ngaashi ho shi dhiladhila. Owa kala momakololo nokoondungu dhoondundu. Ihe nando u yale oshihandhila shoye pombanda wa fa ekodhi, Omuwa ote ke ku undulila pohi. Omuwa oye a popi.”
17Omuwa okwa ti: “Ehanagulo ndyoka tali ka adha Edom, otali ka kala etilithi, noshaa ngoka ta piti po, ota ka haluka nokukumwa. 18Edom ota ka ningilwa, ngaashi sha ningilwa Sodom naGomorra, sho ya hanagulwa po nomikunda dhopuushiinda. Nokape na we ngoka ta ka kala mo. Ongame, Omuwa, nda popi. 19Otandi ke ya nda fa onime ya hituluka mongoya yomugulu gwaJordan tayi ya melundu lyuunapelo, notandi ka yitha Aaedom ontuku ohaluka, ya thige po oshilongo shawo. Nena omupangeli ngoka tandi hogolola, ota ka lela oshigwana. Olye ta yelekwa nangame? Olye ti itakeke ndje? Omupangeli lye ta kondjitha ndje? 20Onkee ano pulakeneni shoka nda dhiladhilile Aaedom, naashoka nda sheya okuningila aantu yokoshilando Teman. Nokuli aanona yawo otaa ka kookololwa po, noshaa ngoka ota ka haluka. 21Uuna Edom ta teka po, otaku ka kala endundumo enene tali kakamitha evi alihe, nekugagano lyehaluko otali ka uvika sigololo okEkololo lyaAkaba. 22Tala, omutondi ote ya a fa ekodhi tali yeluka lya yalaleka omawawa galyo tali tengele lyu uka kuBozra. Esiku ndyoka aakwiita yaEdom otaa ka sholola ya fa omukulukadhi ta thetwa.”
Omuwa ta pangula Damaskus
23Omuwa okwa popi Damaskus ta ti: “Aantu yomiilando yaHamat naArpad oya piyagana noya timpililwa, oshoka oya kundana onkundana ombwinayi, oya lulilwa ya fa efuta lya pindjala, itaa vulu okungungumana. 24Aadamaskus otaa tyololoka, taa kwatwa kuumbanda e taa yi ontuku. Oye na uuwehame wa fa womukulukadhi ta thetwa. 25Oshilando sha simana nda li nde shi hokwa, otashi hanagulwa po thilu. 26Esiku ndyoka aagundjuka aamatilela otaa dhipagelwa momapandaanda goshilando, naakwiita yasho ayehe otaa kombwa po. 27Otandi ka tomeka omadhingililokuma gaDamaskus omulilo e tandi fike po uuwa womukwaniilwa Benhadad. Ongame, Omuwa Omunankondoawike, nda popi.”
Omazimo gAayarabia taga hunganekwa
28Omuwa okwa popi ezimo lyaKedar niikandjo yaHazor, mbyoka ya lalwa komukwaniilwa gwaBabilonia Nebukadnezzar, ta ti: “Homoneni Kedar, mu hanagule po ezimo ndyoka lyaantu yokuuzilo! 29Kuthii po omatsali gawo niigunda yoonzi dhawo, omalapi gootenda dhawo naayihe yi li mootenda dhawo. Kuthii po oongamelo dhawo ne mu lombwele aantu mu tye: ‘Iihuna oyi li koombinga adhihe!’
30“Aantu ne yomuHazor, ongame, Omuwa, otandi mu londodha, mu ye ontuku mu ka holame. Nebukadnezzar, omukwaniilwa gwaBabilon, okwa tsu ondumbo nane nokwa ti: 31‘Ileni! Tu ponokeleni aantu mboka, manga ya thuwa! Oshilando shawo kashi na iiyelo nenge omakumba, ano kashi na eshigo lyasha.’
32“Kwatii po oongamelo dhawo niimuna yawo ayihe! Otandi ka halakanithila koombinga adhihe aantu mboka haa ikulula omapalu. Otandi ya tumine oshiponga tashi zi koombinga adhihe. 33Hazor otashi ka mbugala sigo aluhe. Otashi ka ninga ehala lyoombandje. Kaku na we omuntu ta ka kala mo. Ongame, Omuwa, nda popi.”
Omuwa ta pangula Elam
34Pethimbo Sedekia a ningi omukwaniilwa gwaJuda, Omuwa Omunankondoawike, okwa lombwele ndje ehunganeko tali popi oshilongo Elam. 35Okwa ti: “Otandi ka dhipaga po oondjumbeta dhomuElam adhihe ndhoka dhe mu kingika. 36Otandi ka pepitha ombepo yi pepele Elam tayi ziilile koombinga adhihe, naantu yasho otandi ya halakanithile akuhe, sigo kaku na we oshilongo hoka taa ka holama ko. 37Otandi ka tilitha Aaelam, ya tile aatondi yawo mboka ya hala oku ya dhipaga. Mondjahi yandje ya hwama otandi ka hanagula po Aaelam e tandi ya tumine iita, sigo nde ya kombo po thilu. 38Otandi ka hanagula po aakwaniilwa naawiliki yawo e tandi tula ko oshipangelapundi shandje. 39Ihe konakuyiwa otandi ka hepulutha Aaelam ishewe. Ongame, Omuwa, nda popi.”
Currently Selected:
JEREMIA 49: ONDB
Highlight
Share
Copy
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.