JEREMIA 48
48
Ehanagulo lyaMoab
1Omuwa Omunankondoawike ota popi Moab ta ti:
“Yaye Aanebo, oshilando shawo otashi hanagulwa po!
Kirjatajim otashi kwatwa po,
epopilongulu lyasho otali kumunwa po,
naantu yasho otaa sithwa ohoni.
2Eadhimo lyaMoab otali hulu po.
MuHeshbon otaa pangele okuhanagula po Moab.
Nangoye Madmen, oto mwenekwa,
omatangakwiita otage ku matukile.
3Aahoronajim otaa kugu: ‘Oshiponga! Oshiponga!’
4“Moab osha teka po;
pulakeneni, aanona otaa lili.
5Uveni omahekumuno gawo mondjila yu uka kuLuhit,
oonkugo dhiiponga mondjila yu uka kuHoronajim.
6Otaa ti: ‘Fadhukii po, mu ka holame.
Kwinyoleni mwa fa oongolo mombuga!’
7“Moab, owi inekela oonkondo nuuyamba woye,
ihe ono sindika;
kalunga koye Kemosh ota yi muupongekwa,
pamwe nomalenga naayambi.
8Kape na oshilando tashi yanda ehanagulo;
esilu nolushandja otalu ka hanagulwa po.
Ongame, Omuwa, nda popi.
9Dhikeni emanyambila lyaMoab,
otashi ka hanagulwa po mbala.
Iilando yasho otayi kumunwa po,
nokwaa na we ngoka ta kala mo.”
10(Ngoka ta tonyala mokulongela Omuwa, na tulwe omutima! Na thingwe ngoka ta ngungunine egongamwele lye lyaa tilehi ombinzi!)
Iilando yaMoab tayi teka po
11Omuwa okwa ti: “Moab okwa kala aluhe megameno, noina falwa muupongekwa. Moab okwa fa omaviinu gi ilongelela inaaga pimpwa mo moshiyuma, ga tulwe moshiyuma oshikwawo. Omulyo gwago inagu lunduluka, notaga shata nawa ge vule agehe.
12“Onkee ano esiku otali ya, uuna tandi ka tuma aantu taa ka tilahi Moab a fa omaviinu. Otaa ka mana okutilahi omaviinu agehe miiyuma notaye yi tatula po. 13Nena Aamoabi otaa ka sithwa ohoni pamwe nakalunga kawo Kemosh, naanaa ngaashi Aaisraeli ya li ya sithwa ohoni omolwokwiinekela ontsezi yoshingoli kuBetel, oshikalunga shoka ya li yi inekela.
14“Aalumentu ne Aamoabi, oshike tamu iti oofule?
Omwe shi mona molugodhi?
15Moab ota hanagulwa po,
iilando ye otayi matukilwa.
Aagundjuka ye yo opala otaa dhipagwa po.
Ongame omukwaniilwa, Omuwa Omunankondoawike,
nongame tuu ngoka nda popi,
16Epangulo lyaMoab otali hedha ko;
ekumukopo lye otali endelele.
17“Ne mboka aashiinda, lileni oshigwana shika,
amuhe mboka mwa tseya esimano lyasho.
Tyeni: ‘Epangelo lyasho lya kola olya teka po;
kashi na we esimano noonkondo.’
18One mboka mwa kala muDibon,
zii ko komahala geni gesimano,
mu kuutumbe mevi montsi;
omuteyipo gwaMoab oye nguka,
a kumune po oonguluhote dhoye.
19Ne mboka mwa kala muAroer,
thikameni mepola mu tegelele; puleni aafadhukipo,
moneni utale shoka sha ningwa mo.
20‘Moab okwa teka po,’ osho taa yamukula,
‘mu lileni, okwa sithwa ohoni.
Uvitheni pomulonga Arnon kutya Moab okwa teka po.’
21“Epangulo olya thiki kiilando yoketumbalovi: Holon, Jahsa, Mefaat. 22Dibon, Nebo, Bet Diblataim, 23Kiriataim, Betgamul, Betmeon, 24Keriot naBozra. Epangulo olya thiki kiilando ayihe yaMoab, kokule nopopepi. 25Oonkondo dhaMoab odha teka po; omatha ge oga kana po. Ongame, Omuwa, nda popi.”
Moab ta fupipikwa
26Omuwa okwa ti: “Kolitheni Moab, oshoka okwa tsu ondumbo nangame. Moab ota ka galangata monkungo ye mwene, naantu otaye ke mu yola. 27Moab, oto dhimbulukwa tuu, sho wa ningi Aaisraeli oshipwedhela? Owe ya nyonkele ya fa aantu ya kwatelwa mongundu yaafuthi.
28“Aantu ne mwa kala muMoab, thigii po iilando yeni. Indeni mu ka kale komatayimanya! Feni onguti tayi yala oshihandhila shayo pooha dhekolombongo. 29Moab oku na uuntsa wa pitilila. Ondu uvu, nkene aantu ye ye na omwiityo, uuntseyele, oshilundo noshiikwatelo. 30Ngame, Omuwa, onda tseya elunduko lyawo. Einomo lyawo itali eta sha, naashoka taa longo itashi kalelele. 31Omolwashoka tandi lili Aamoabi ayehe nondi na oluhodhi omolwaantu yokuKir Heres. 32Otandi lili Aasibma unene shi vule Aajaser. Oshilando Sibma, owa fa omuviinu gu na iitayi ya taakana Efuta lya sa tayi ifala sigo oJaser. Ihe iiyimati yoye yothinge nomandjembele goye oga hanagulwa po. 33Elago nenyanyu olya kuthwa mevi lyo ondoka lyaMoab. Onda mweneke ekunguluko lyomaviinu komatemba gokukolela. Kaku na we ngoka ta kolo omaviinu ti imbi ye ta kugilile kenyanyu.
34“Aantu yomuHeshbon naElale otaa kugu, nonkugo yawo otayi uvika sigo okuJahas; otayi uvika kaantu yomuZoar, notayi uvika sigo okuHoronajim naEglat Shelishia. Okalonga Nimrim otaka pwine. 35Aamoabi otandi ke ya mweneka okuyamba omafikilondjambo pomahala gawo giinonoma nokokuyambela iikalunga yawo oontselelandjambo. Ongame, Omuwa, nda popi.
36“Omwenyo gwandje otagu lili Moab naantu yomuKir Heres gwa fa ohiya tayi hikwa, oshoka omaliko gawo ga yiwa nago. 37Oyo ayehe ya kulula omitse noombenzi dhawo. Oyi ishata komaako noya zala omahahi. 38Koontala dhomagumbo agehe nomomahalandjandja gaMoab omu na elilagano alike, oshoka onda tatula po Moab ongoshiyuma inaashi halika we. 39Moab a tatuka po! Lileni oosa! Moab a sithwa ohoni! Moab a ningwa oshipwedhela noshihaluthi shaashiinda ye ayehe. Ongame, Omuwa, nda popi.”
Moab ke na ehunukopo
40Omuwa ota ti: “Tala, oku na sha sha fa ekodhi lya yalaleka omawawa galyo, tali tuka tali ukilile kuMoab. 41Iilando nomapopilongulu otaga kwatwa po. Esiku ndyoka aakwiita yaMoab otaa ka haluka ya fa omukulukadhi ta thetwa. 42Moab ota ka hanagulwa po, noita ka ninga we oshigwana, oshoka okwa tsu ondumbo nangame. 43Omahalutho, omakelo noomwigo otadhi mu tegelele, ne Aamoabi. Omuwa oye a popi. 44Ngoka ta kambadhala okufadhuka po ehalutho, ota gwile mekelo, naangoka ta zi mo mekelo, ota ka yulwa komwigo, oshoka otandi etele Moab ethimbo lyehanagulo. 45Oontauki dhaa na ekwatho, otadhi kambadhala okumona egameno muHeshbon, oshilando shonale shomukwaniilwa Sihon, ihe oshi li momalaka gomulilo. Omulilo gwa yaka kooha dhoshilongo nokoondundu dhaMoab e hole iita. 46Akwetse Moab! Aantu mboka ya simaneke Kemosh, oya hanagulwa po, noyana aamati naakadhona oya yiwa nayo oonkwatwa. 47Ihe momasiku tage ke ya otandi ka hepulutha ishewe Moab.”
Oohapu dhepangulo lyaMoab otadhi hulile mpaka.
Currently Selected:
JEREMIA 48: ONDB
Highlight
Share
Copy
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.