1 SAMUEL 5
5
Oshikethahangano mokati kAafilisti
1Konima Aafilisti sho ya kwata po oshikethahangano, oye shi kutha kuEbenezer e taye shi fala koshilando shawo Ashdod, 2ye shi tula motempeli yakalunga kawo Dagon noye shi langeke ontega noshiyelekela shaDagon. 3Ongula onene sho kwa shi, aantu yokuAshdod oya mono efano lyoshiyelekela shaDagon lya gwila pevi nolya sizimaneka oshipala pevi komeho goshikethahangano shOmuwa. Oyo oye li toola po e taye li tula pehala lyalyo. 4Ongulangula ya landula oya mono ishewe oshiyelekela shaDagon sha gwile pevi komeho goshikethahangano. Omutse gwasho nomaako gasho agehe oya li ya teka ko, yi li lwoposheelo; olutu aluke lwa li lwa kala po. 5(Omolwashika aayambi yaDagon naasimaneki ye ayehe muAshdod ihaa lyata po we pehala mpoka sigo onena.)
6Omuwa okwa geele aantu yokuAshdod noonkondo e te ya tilitha. Okwe ya geele pamwe naantu yomomikunda dhe ya kunduka nokwe ya etele iitumbuka. 7Sho ya mono mbika ya ningwa, oya ti: “Kalunga kaIsrael ote tu geele e ta geele wo kalunga ketu Dagon. Itatu vulu we okukala noshikethahangano shika.” 8Onkee oya tumu aatumwa noyi ithana aakwaniilwa yatano yAafilisti ya gongale noye ya pula: “Oshikethahangano shaKalunga kaIsrael otatu shi ningi ngiini?”
Aakwaniilwa oye ya yamukula ya ti: “Shi faleni kuGat.” Osho ngaaka ye shi fala kuGat, oshilando shilwe shAafilisti. 9Ihe sho sha thiki ko, Omuwa okwa geele noshilando shika wo nokwe eta ehaluko enene. Okwe ya geele niitumbuka maantu ayehe yomoshilando, aanona naakuluntu. 10Oya tumu ishewe oshikethahangano kuEkron, oshilando shilwe shAafilisti; ihe sho sha thiki ko, aantu oyi igidha ya ti: “Oya tumu huka oshikethahangano shaKalunga kaIsrael, opo shi tu dhipage po atuhe!” 11Oya gongaleke ishewe aakwaniilwa ayehe yAafilisti noya ti kuyo: “Shunii ko oshikethahangano kehala lyasho, opo shaa tu dhipage po naangandjetu.” Moshilando ashihe omwa li etilo, oshoka Kalunga okwe ya geele noonkondo. 12Naamboka inaa sa, oya li yu udha iitumbuka, aantu noya kugile iikalunga yawo onkugo, yi ya kwathe.
Currently Selected:
1 SAMUEL 5: ONDB
Highlight
Share
Copy
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.