1 SAMUEL 4
4
Ekwatopo lyoshikethahangano
1Pethimbo ndiyaka Aafilisti oya gongala, ya hingile Aaisraeli iita. Onkee Aaisraeli oya tokola oku ya kondjitha. Aaisraeli oya yungu ontanda yawo puEbenezer nAafilisti opuAfek. 2Aafilisti oya ponokele Aaisraeli, nokonima yolugodhi olululu oye ya dhenge noya dhipaga konyala aalumentu omayuvi gane. 3Mboka ya hupu po, sho ye ya kontanda, aawiliki yaIsrael oya ti: “Omolwashike Omuwa e etha Aafilisti, ye tu dhenge nena? Tu yeni, tu ka tale oshikethahangano shOmuwa kuShilo, opo e ende natse, e tu hupithe kaatondi yetu.” 4Onkee oya tumu aatumwa kuShilo noya kutha oshikethahangano shOmuwa, shoka shi lile po oshipangelapundi shOmuwa Omunankondoawike. Aana yaali yaEli, Hofni naPinehas, oya thindikile oshikethahangano.
5Oshikethahangano sho sha thiki, Aaisraeli oya kugilile kenyanyu, ndele nevi olya fa tali kakama. 6Aafilisti sho yu uvu onkugilili, oya ti: “Pulakeneni shoka tashi kugililwa montanda yAahebeli! Otashi ti ngiini?” Sho ya dhimbulula kutya nani oshikethahangano shOmuwa she ya montanda yAahebeli, 7oya li ya tila noya ti: “Okalunga e ya montanda yawo! Yaye tse! Nonale inatu ningilwa iinima yi thike mpa! 8Olye te tu hupitha kookalunga mboka aanankondo! Oyo ookalunga mboka ya dhipaga Aayegipiti mombuga! 9Yafilisti ne, ikoleleleni! Kondjeni ngaashi aalumentu, opo twaa ninge aapika yAahebeli, ngaashi yo ya li aapika yetu. Onkee tu kondjeni twa mana mo!”
10Aafilisti oya kondjo noonkondo noya dhenge Aaisraeli, onkee oya yi ondapo kaandjawo. Ekanitho olya li enene: aakwiita Aaisraeli omayuvi omilongo ndatu oya dhipagwa. 11Oshikethahangano shaKalunga osha kwatwa po, naana yaEli, Hofni naPinehas, ayehe yaali oya dhipagwa.
Eso lyaEli
12Omulumentu gwomezimo lyaBenjamin okwa zi kolugodhi ta matuka e ta thiki kuShilo esiku tuu ndyoka. Opo a holole oluhodhi lwe, okwa li a tuula oonguwo dhe nokwiigunda evi momutse. 13Eli, ngoka a li i impwiyika unene noshikethahangano, okwa li a kuutumba koshipundi pooha dhondjila ta talatala. Omulumentu okwa taandelitha elaka moshilando ashihe, naayehe oya kugu kuumbanda. 14Eli oku uvu euyagano nokwa pula: “Euyagano ndyoka olyashike?” Omulumentu okwe ya kuEli meendelelo nokwe mu hokololele. 15(Eli okwa li e na omimvo omilongo omugoyi nahetatu nokwa li omuposi.) 16Omulumentu okwa ti: “Onda zi ontuku kolugodhi nonda matuka ondjila ayihe nena.”
Eli okwa pula: “Oshike sha ningwa ko, mumwandje?”
17Omutumwa okwa yamukula: “Aaisraeli oya yi Aafilisti ontuku; otwa dhengwa nayi. Nokuli aamwoye Hofni naPinehas oya dhipagwa, noshikethahangano shaKalunga osha kwatwa po!”
18Omulumentu sho a tumbula oshikethahangano, Eli okwa gu ongali koshipundi she popepi nosheelo. Okwa li a kulupa noku na oshipapa sholutu, onkee mokugwa okwa teka othingo e ta si. Okwa li a wilike Aaisraeli omimvo omilongo ne.
Eso lyomuselekadhi gwaPinehas
19Oshitenya shaEli, mukadhaPinehas, okwa li omusimba e li pokuvala. Sho a kundana kutya oshikethahangano shaKalunga osha kwatwa po, osho wo hemweno nomulume oya sa, okwa adhika mbala koshitheta e ta vala. 20Sho a li pokusa, aakulukadhi mboka ya li puye, oye mu lombwele ya ti: “Ikolelela! Owa mona omumati!” Ihe ina pupa ko ye ina yamukula sha. 21Okwa luku okamati edhina lyako Ikabod nokwa ti: “Esimano lyaKalunga lya thigi po Israel.” Noohapu ndhika oku ulike ekwatopo lyoshikethahangano neso lyahemweno nolyomulume. 22Oye a ti: “Esimano lyaKalunga lya thigi po Israel, oshoka oshikethahangano shaKalunga sha kwatwa po.”
Currently Selected:
1 SAMUEL 4: ONDB
Highlight
Share
Copy
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.