Romanos 5
5
Sinia' kaslesajne'n
1Ijiate ti wuj ti kasts'isisi siunie ti je akakiunie, jak je iyoyiji'ni Sinia' kaslesajne'n. Sekyi'i Saka'niona Jesús ti Sijwajieti nak it'imina pet ti akajmakie. 2'Yina ti Sijwajieti jla'am ti it'imina ti a'yakanaja'm nak jikap'ijliuskiye iyo ni Sinia' ti awaki, je lajk'i pet ki iyo ti je akakiunieje. Jak je iyoyiji sinikanitiejeye po', lapakawo ti janesajap nak jiwunitiejeye iyo ni Sinia' ti wuj ti 'es ni anejejwiyejenk'iye. 3'Yina je nakata ka kia'iwo, 'yina siunie sijliak'ali kia'iyo sinikanitiejeye yiji lapakawo ti naka ti iyo sijweyeja', it'iminayi pet ti akajlaje ti anilayitieje. 4Naka ni sijweye iyo, naka'ne pet ti kaskajanit siupa ts'oniye iyo, jak je iyoyiji siuti kaskaja pet, it'imina ti sinijijwiye po' pet ilia'm siojona ijwilts'e'm ti janwents'e'm. 5'Yina siunie sinijijwiye iyo je takak'emisie'n jiwek, kajeyepa ti Sinia' ipionitik'i 'niwa sosikis sekyi'i ti isia'ni siunie jlemijnaye ti tajla'm je lajk'i japa Sinia' jikimet ti 'es ti iyoyi si'wajieta'.
6Jak je iyoyiji pet ti sa'am ti lajk'iyi paka iyoki ti je kasts'ajane paka iniwonaja, ka ini'manitie ilia'm siuniwa soski'layis pakayeyi pet ti Sijwajieti ininekiaj'l ape'e napoka i'nio' ti je isis. 7Ajwel'ni lajk'ipa ka inkajli ka iniwe'n ape'e pi jikiecha ti jla'am ti tijna'yi, ni'ne ka nakaye ni i'nio' ti ijiate ti jlosik po'. 8Sinia' 'yakajanit pet ni jlemijnaye ti yints'e'm, jak je iyoyiji ti sa'am ti je atajlaje ni sake', Sijwajieti jla'am ti ininekial sitipe'e ti tiliana. 9'Nakayi siuti kiak iyoyi ti Sinia' kaslesajne'n, ijiate ti jajwieyeje pet siunie Sinia' jiwak ts'ijiye ka netie jlaja niwa jlomas. 10Tankiuniek'i ti pajk'i, jlam'ne je alekiji ti ataye ilia'm pa Sinia', je iyojliyi ti iyo ka kasts'isisi wita'm ti jla'm pakayik'i ti tiliana pa jlas Sijwajieti Jesús ti kasts'isisi. 'Nakayi tepa jawo ka kiak je iwoyi ti ja kasts'isisi ti jajwieye ti jatiajlajaja ni jlas Sijwajieti Jesús ti jla'am ti 'wasa'n, siuti ti je atayeja ilia'm. 11Je nakata, siu'neje ni jikiecha, ti wuj ni sinikanitieyi yiji pet ti naka Saka'niona jla'm ti it'imijne'n ti kia'iyo, 'yina ti nak it'imina ti kasts'isisi wita'm pa Sinia'.
Adán siu'neje pa Sijwajieti
12'Yina iyoye pet 'ate ti ijwienjli siupa it'imina ni siunie je 'es yi'i ni ajnat, sekyi'i itionayi jlek'i ni siojona 'najlati ni i'nio',#Gén 3.6-19 jak je iyoyiji pet ni siojona 'najlati iyo napo i'nio' itij'w ape'e napo ijia, kajeyepa wikie'eyi ti iyoyisi ni siunie jike'. 13Ti pajk'i ti lajt'ik'i kiupe nak Moisés jika'neyasajnaye, siunie inke' ta'a ti yi'i 'ni ajnat, ejlowek ti lajatak'i pa ka inamtikie' ka jitis ine'ne pa, siuti iyoyetaja pa jike'. 14Jlam'ne ti tajlap'e puwak jlomas yi'i pet pa Adán, paj ti yiyeyi siupuwa jlomas yi'i pet pak Moisés, siojona 'najlati wikie'eyi siunapo i'nio' iyoyi ni jike' yiyis kiajwe, 'wanjliyi siupa jike' iyot'iyi pet papok je kiak iyoyeta 'ate iyo pak Adán, ti je its'iuye pa Sinia' iyontaja.#Gén 2.16-17; 3.11-12
Adán iyoye 'ate siunie ti jipelta pa siunie ti je 'yakajli'ijyi ti ja'nes, paka t'ipi pa Sijwajieti. 15Siupa Adán jitis iyot'iyipi je ijlien'ni pet siunie Sinia' iwints'e'm. Ataj enayi pet 'ate siu'nie: ti ijwienjli ni i'nio' ti it'imijne'n ti 'loj napo ijia ti it'imina ti 'yajle'n, 'yina jlampet siunie Sinia' iwints'e'm ti kasp'elisijne'n, ti iyoyi si'wajieta', ti kia'iyo ijwienjli siunie i'nio' itiajlat, naka Sijwajieti Jesús, nak ijiate ti 'yaka'm ape'e naka, siu'neje ti 'loj napo ti 'esi.
16Ijiate siunie i'nio' ijwienjli siunie jike' iyo, je ijlien'ni pet siunie in'wajiet ti tajle ni Sinia', 'yina siupa ti ijwienjli inke' t'ipi pak it'imina pet ti Sinia' jitis yi'ne pa i'nio'. 'Yina ka lajak'i pet siunie in'wajiet it'iminayi pet ti Sinia' isiwaliyi'i siuniwa jloski'la iyo napo i'nio' ti je pini', siu'neje ti ilisank'i napo i'nio'.
17Jlampet siunie i'nio' ijwienjli ti 'loj napo i'nio' it'imina ti yi kiajwe ni siunie inlaye ni siunie jitis. 'Yina tepa jawo ka kiak je iwo pet siunapo ti Sinia' jikap'ijliuskiye yi'ne ti iyo 'wajieta', siu'neje ti ilisajne'n jlajma ijiatayi jla'am ti jijweye poye ape'e siojopa ji'wasankiye ti ja ink'ieye ti pak jantajleje pak i'nio' ijwienjli, paka Sijwajieti Jesús.
18Iyoye pet 'ate iyo siupa jike' pa Adán ti ijwienjli, ti pak it'imina pet ti wikie'eyi napo i'nio' ti Sinia' iyo jitisa', 'yina kia'iyoyiyi pet siunie iyoyi nak ijwienjli i'nio' naka Sijwajieti Jesús ti je niliak, ti nak it'imina ti Sinia' isiwaliyi'i pi jitis iyo wikie'eyi napo i'nio', ti iyo ka ji'wasankiye poye. 19Ka iyot'e 'ate, ti ijwienjli t'ipi siupa i'nio' ti je its'iuye pa Sinia' siupa iyontaja, 'yina paka ti it'imina papo ijia ti je pini' ti tiwoki inke' jikipijnasa'. 'Yina kia'iyo pit siupa ijwienjli i'nio' ti its'iuye pet siupa Sinia' iyone ka woyi, 'yina pak it'imina pet papo ijia ti ja ke piniye siunapo jitis ja tinitiajnata.
20Ti yiyemet pet kiak Moisés jika'neyasajnaye, sekyi'i ti kat'ajayi pet ni siunie je 'es ti yajme'n, sekyi'i Sinia' ijiatayi pet ti 'yakajanit ni jikap'ijliuskiye iyoyi. 21Iyoyi pet 'ate siunie je 'es ti yi' ape'e napo ti ijioyiji jana 'najlati, 'yina kiak iyoyiyi pet siunie Sinia' jikap'ijliuskiye ti yi' ape'e pet napo i'nio', jla'yi ti ijioyi ni siunie ti tilisanaja'n, 'nakayi ti ja kassoyija'm janak si'wasankiye ti laj jlaja, ka lajak'i pet ni Saka'niona Jesús ti Sijwajieti ti kasts'esi.
Currently Selected:
Romanos 5: CRT97
Highlight
Share
Copy
Want to have your highlights saved across all your devices? Sign up or sign in
Nuevo Testamento en Chorote © Sociedades Biblicas Unidas, 1997.