Romanos 4
4
Ti intaj tenaja 'ate pa Abraham
1'Yina, ¿tepi iyo pa Abraham, ti Judíojosts'e'm ti pak atajlaja'm? ¿Ten siupa 'esi? 2Siut'itiejpe ka puwak int'emina ka k'iejliyeyi ka iwoyi, ti ilisajne'n, 'yina je 'wenata'ne pet paka iniwuniti ka kiak iwoyi. Jlampet jitieyi'i pi Sinia', lajk'iyipa ka iniwuniti, 3kajeyepa ti siuniwa Sinia' jlamtis ti yi'i ni ji'wet iyo'ate, “Siuti Abraham 'esi'n, lapakawo ti nak it'imina ti je 'yakakiu pa Sinia'.”#Gén 15.6; Gl 3.6
4'Yejne'n siunie i'nio' ti isijme'n siojona jikaja je ji'wajiet, jikijmaye laja. 5Jlampet ni siunie ti je 'yakakiu ni Sinia' siunie ti ilisajne'n siunapo jloski'la iyo jikipijnaye, je kia'iyo. Kajeyepa ti Sinia' ilisajne'n siunie ti kia'iyo ti je 'yakakiu ti jla'am, 'yina je'ne ka nakaye siuti jikijmaye ti 'es kant'emina.
6David kia'iyo yamtiyi naka siunie 'es ti Sinia' iniuyeje naka ni ilisajne'n jla'am, 'yina je nak ka int'emina ni siunie iyoyi ti 'es jikijmaye ka Sinia' in'yene. 7David iyo'ate:
“Wuj ti 'es ni Sinia' iyone napoka
ti jla'am ip'ilisijne'n ti isiwaliyi'i ki iyo kiwa jloski'la.
8Iniopa'atie ni Sinia' iyone,
siunie ti Sinia' je iyo jitisa' siunie jloski'la iyoyi.”#Sal 32.1-2
9'Yina, ¿ten siupapo janope siunie Sinia' janwone ti ijiate ti 'es? ¿Jot'e ka napokaye siunapo ti jijwa'al tejwak'iji'n? ¿Ni'ne ka napokataja jla'am siunapo lajk'ipa ka neyi siunie tiwonaja napok ajwel'ni? Jlam'ne ajwela pa Abraham ti pak 'esi siupa ti je 'yakakiu, sekyi'i it'imina ti Sinia' ilisanaja'n pet. 10Siuti Sinia' kiak iyonayiji pa Abraham, ¿pakat'iyijpe ti kiak tiwonajayi ti t'isie'n jiwa tejwak'i, ni'ne ka pakayeyi ti je kiak tiwonajliyi'ijyi? Ijiate pakayi ti je yijliyi'ijyi siupa tiwonaja. 'Yina Sinia' iniajnat pa Abraham ti ilisajne'n. 11Jak je iyoyiji paj ti kiak tiwonajayi ti t'isie'n jiwa tejwak'i,#Gén 17.10,26 sekyi'i ti 'yakajayi ti Sinia' ilisajne'n siuti kiak tiwonaja, 'yina ti pak it'imina ti je 'yakakiu. Jak je iyoyiji'ni pet wikie'eyi siunapo ti je 'yakakiuyis, napokaye pet Abraham jilis siunapo ti tomik'i pijia'm, 'wanjliyi ka kiak je tiwonaja ka t'isie'n tejwak'i, 'yina lapakawo ti Sinia' ijniejiet'ik'i. 12Jlampet siunapo i'nio' ti yiji siupa tiwonat'iyipi pi Abraham, siu'neje ti iyoyi siupa iyot'iyipi jla'am ti je 'yakakiu pi Sinia', ti je kiak tiwonajliyi'ijyi ka t'isie'n jiwa tejwak'i, 'yina napoka 'neje jilis pa Abraham.
Siuti Abraham je 'yakakiu pa Sinia' sekyi'i iwijna'm siupa ijwijla'm
13Sinia' ji'lij iwijna'm pa Abraham, siu'neje papo jilis tomik'i pijia'm ti ijwijla'm, ti iyo'ate, “Siuti a'm siunapo ales, siu'neje napo jantomik'i pijia'm, asa'am ti askimita' wikie'eyi siunie ajnat.”#Gén 17.4-6; 22.17-18; Gl 3.29 ¿Yot'iyi'ni ti Sinia' kiak iyone? ¿Nakat'iyi jla'am ti Abraham ya'm ape'e pak Moisés jika'neyasajnaye? ¡Je'e! 'Wenajliyi jla'am siunie iyo ti je 'yakakiu pa Sinia'. Jak je iyoyiji'ni Sinia' ilisajnen'ne. 14Siut'itie ka napokaye ka ijna'yi siunie Sinia' ijwi'il siunapo ti iyoyi ni inka'neyasajnaye, ijiate ka kiak iwoyetaja pit siunie iyo ni i'nio' ti je takakiu'n ka laja lajaye, ka kiak iyoyetaja pit siunie Sinia' iyot'iyi ti ijwi'il ka lajata lajaye.#Gl 3.18 15'Yina paka jla'am siupa Moisés jika'neyasajnaye ti itiojne'n ni Sinia' jiwak; siupa ajnat inka'neyasajnaye je yi'i, 'yina lajk'ipa ka inta'yi ilia'm, sek jane'yi ka inlaki kajeyepa lajk'ipa.
16'Yina kiakt'i iyopi, jak je iyoyiji siupa Sinia' iyont'iyijipi pa Abraham ti ijwijla'm, je tak'emisie'n jiwekie'e kajeyepa ti pak it'imina ti je 'yakakiu. 'Yina kiaka'ne pet ti 'yakajanitk'i ti tajle nak jikap'ijliuskiye ni Sinia' ka 'esieyi wikie'eyi siunapo jilis pa Abraham, siu'neje papo tomik'i pijia'm, ka iyot'e jla'mate, je napokata siunapo iyoyi ni inka'neyasajnaye ka 'esieyi, 'yina siunapo ti je 'yakakiu pa Sinia' kia'iyo 'esi pet, siunapo ti iyo'ate pak Abraham ti je 'yakakiu. Ijiatjliyi kia'iyo'ni, Abraham pak sinia' ti kaswikie'eyi,#Gl 3.7 17iyo niwa inamtis ti iyo'ate, “Jayoyi jiniaye'a'm siunapo i'nio' ti je pini' yiyits'i niwa ajnatis.”#Gén 17.5 'Yina naka Sinia' ti Abraham je 'yakakiu, siunie ti i'wiesankiti'n napo i'nio mases, jla'yi ti 'yakajanit niwak wask'i'nelaja ti je yi kisie'e.
18Siupa Abraham iyo ti je 'yakakiu pa Sinia', ijiate 'yaka'm ape'e siupa ti je ijiat paka woyi, ka je inkakiu'n. Jak je iyoyiji'ni ki iyo, ti jla'am ti jinia' siunapo ti “je pini' i'nio' yijits'i niwa ajnatis”, iyo ni siunie Sinia' iyont'iyijipi ti iyone'ate, “Kiak jawo ni janojwaja'm napo alesa' siunapo ti jantomik'i pijia'm.”#Gén 15.5 19Abraham t'oni pijia'm siupi ti je 'yakakiu pa Sinia', 'wanjlit'iyijpe ti ijliena ka neyi japa cien puwa jika najkapis,#Gén 17.17 je tojwa'a ka inleyi 'ni ajnat jlampa je isisieyi ti yam kijilats'e, siojopa jik'iemjla Sara ti je pa titijnisiejayi ka jilis poye. 20'Yina je 'yakakiu siupa Sinia' iyone ti ijwijla'm, jla'am yamjliyi pet ti iyoyi jitienkiujnieyejayi pa Sinia'. Iyunitjli pi Sinia', 21'yina ijiate ti inipejlaniti ti je 'yakakiu pa Sinia' ti ijiate ti 'yakajli jla'am ti je initiajnat siupi iyo ti ijwil ti jawoyi. 22Jak je iyoyi ka Sinia' je kiak iwone ti ilisajne'n.
23Siunie ti Sinia' jlamtis ti iyo'ate, “Siunie ti je 'yakakiu nak Sinia' ilisajne'n pet”, je pakata pa Abraham ti 'esi ti iyo. 24Kia'iyo sam'neje ti tijnats'e'm, kajeyepa ti Sinia' kaslesajne'n 'yina lajk'ipa ka int'emina ti kia'iyo ti je akakiuk ti jla'am ti iniujwa'n kisie'e pa Saka'niona Jesús ti tajli pa a'no'. 25Jlam ti tekiajlaja ni siunie inlaye iyo ti tiliana sitipe'e ti sa'am ti awoki ni sake', sekyi'i tiniujwana kisie'e ti tajli ki a'no', ja'nakayeyi ti Sinia' ja kaslesajne'n pet.
Currently Selected:
Romanos 4: CRT97
Highlight
Share
Copy
Want to have your highlights saved across all your devices? Sign up or sign in
Nuevo Testamento en Chorote © Sociedades Biblicas Unidas, 1997.