MATIYE 3
3
Wããre maga Jaŋ ma joŋ batem jar no siin mono
(Mark 1.1-8; Lug 3.1-18; Jaŋ 1.19-28)
1De ngar ngel sen Jaŋ ma joŋ batem jar raw woge ti puuli ma Jude, raw tĩĩ wer ʼwad ɓay, 2ga : Coo we ɗiggi ɓay ma de ɓlaggen de deele tigriŋ, werga wur twaywaŋ ma ciŋ kos we go. 3Jaŋ diŋ je maga Esay, je ndar nen wããre ma jag Baa go hay wãã go ti ɓe ga :
Je tabay yaŋ le ʼwaa ɓay ti puuli ga :
Kneʼ we blam faage Waŋkluun go,
Raɗ we faage ma kleeren wo go ne hẽn de deele ɗeger ɗegere.
4Õõbe ma ti Jaŋ de joŋ ge de fũy yoŋyoŋ, á saʼ ɓil ɓe de mblaaga hõõge, re diŋ maapoɗ wo de noo yõõre ma koore. 5Jar ma ɓi leege Jerusalem de ma ɓi sir Jude wo, de ma jag pyew Jurdẽẽ wo ɓuy, raw wo age see ɓe. 6Á raw wo ɓoɗ jag go ti ɓlagge ɓaaran go tinoo nen jar poɗag ɓuy, Jaŋ raw joŋ batem ɓaara go nen pyew Jurdẽẽ.
7De maga Jaŋ wo koge ga Farisiyẽẽ wo de Sadusiyẽẽ wo de age le see se maga joŋ batem saara go lay mokay, raw riŋ rage ga : Nday cwe wer mani yee no, wose riŋ we ga nday daŋ bon maga Baa joŋ we ge de ɓe yaŋ go la. 8Joŋ we joŋre maga jar mo ko see ɓe ga nday coo ɗiggi ɓay ma de ɓlaggen we de deele tigriŋ. 9Ɗig we diŋ doo maga nday de wãɗge ɓe de ɓil ɓay ga : Abraham diŋ pan ɓay nà ẽn la wa, ndi riŋ nday ga Baa de kããge ma kol weere ne Abraham de húulì ma lag wo no. 10À yaŋ go de kneʼ klaɓn patala ma car kooren wo go ti kããge ɓaara taʼ taʼa. Koo maga bay leʼ ge de el wa mo ɓuy, à car ra ge go, à lag ra ge go ti wùu. 11Ma ɓi, ndi joŋ batem ɓay diŋ de bii ma kaŋ nen jar go ga nday coo ɗiggi ɓay we de deele, ama je maga a ge le blam ɓi mono, á joŋge batem ɓay yaŋ diŋ de Nenterse ma bay ɗag wo de wùu. Je ma sen de daŋ mege egre, ndi de see ɓi, ndi bay de kããge maga ndi ndar taarag ɓen go hẽn draʼ wa. 12Á de hãn faɗgen doo, ma faʼ hoole cooren go, á laa ge coore ɓen go ɓi boole, roɗ ge hoolen go nen wùu maga huu go gà has mo lay.
Jaŋ joŋ batem Yeso go
(Mark 1.9-11; Lug 3.21-22)
13Blam sen Yeso raw urgi le Galile, raw age jag pyew Jurdẽẽ, á nduu ɓiŋ Jaŋ ga á mo joŋ batem se go. 14Jaŋ raw ɗiggi ga se day gà kal riŋ gi ɓe ga : Ndi nen maga ndo yog me go diŋ ndo yaw, day ndo fer age see ɓi yaw?
15Yeso raw fer wããre ne hẽn ga : Day mbo ga sen mo joŋ mbe go patala ɗa. Werga naa taw re maga ɓil Baa dan mo ɓuy go, diŋ doosen no.
Doo kay nono Jaŋ raw mbe men re sen joŋge so. 16Jaŋ joŋ batem Yeso go nen bii. Yeso wo kalge le go ciŋ nen bii mokay tuu, ngel ma ciŋ raw bulgi go ne hẽn ti, se raw ko Nenterse Baa le de sirgi ne hẽn ti doo kurgudu le caw, 17á raw laa gẽẽge po le ciŋ wãã ge ga : Je ma deŋ mo deŋ diŋ wel da ge ɓi, ɓil ɓi go ti ɓe feh debaŋ.
Currently Selected:
MATIYE 3: TUP
Highlight
Share
Copy
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.