MATIYE 2
2
Jar ma de ko wer fẽẽre a wo ko Yeso
1Yeso biŋ Betlehem ɓi sir Jude, ti kal maga Herod hay diŋ waŋ mono. Blam biŋgi ɓe, jar ma de ko wer gér a wo le nen were, raw wo nduugi Jerusalem. 2Á raw wo wiigi ga : wel maga biŋ la ga joŋ ge diŋ waŋ jar Jwif, á la gen yaw ɓa? Werga wùr ko gér le de naage ti ɓe le nen wer hãã, day wùr a leɗ monɗra pel ɓe.
3Herod waŋ wo laa wããre sen mokay, hẽẽne raw joŋge ɓe debaŋ, jar ma ɓi leege Jerusalem wo ɓuy doosen no lay. 4Á raw tay ti waŋre jar siɗ jag wo, de jar ma ndar wer wããre Baa ma yoo jar ɓen wo, raw wii rage ga : Ɓa Mesi hay nen biŋgi nà gen ɓa? 5Á raw wo fer wããre ne hẽn ga : Wo Betlehem ɓi sir Jude, werga je ndar nen wããre Baa go hay yer wããre sen we go ga :
6Ndo Betlehem ma ɓi sir Jude,
Ndo bay de pẽẽre yoo ɓi leege ma Juden wo wa hase.
Werga waŋ maga koɗ ge Israyel jar ɓin wo,
Kal ge le go diŋ ni ɓo.
7Blam sen Herod raw ɗe jar ma de ko wer fẽẽren wo le see ɓe freŋ, raw wii rage ga á mo ngaɓ wo naw maga gérn naa nen wur sen ne se ti ngel ɓe keɗede. 8Blam sen se raw laa rage wo Betlehem, raw riŋ rage ga : See we kiɗ weln de el, day nday wo we daʼ ge ɓe no, ni nday kaŋ we nen ɓi wo ti ɓe lay, nen maga ndi de see ɓi, ndi wo leʼ monɗra ne hẽn pel lay.
9Jarn wo wo laa wããre waŋ laa, á kal wo rawge, raw wo ko gér maga á hay kon wo le keɓaa nen wer de seege wo pel ɓaara caw. Gérn wo nduugi ciŋ ti ngel maga weln de ɓoʼ ge ni mokay, raw ooge. 10Á wo wo ko gérn de oo le mokay, ɓil ɓaara raw fuggi go feh feh debaŋ, 11á raw wo laa ge tiŋma, wo wo daʼ weln de man ɓe Mari. Á raw wo laa kõyõgre gesiŋ, raw wo goŋ wel no. Blam sen saara raw bud fẽẽre ɓaaran wo go, raw wo hã fẽẽre ne hẽne, boo biŋni wo de gúmgùm maga fõõ fãyfãy wo de trusa. 12Blam sen je peele Baa raw riŋ rage nen lwaʼge ga á mo fer wo se Herod wa so. Á raw wo maŋ faage ma tigriŋ, raw wo ɓi sir ɓaara.
À daŋ go de Yeso Ejipte
13Blam maga jar ma de ko wer fẽẽren raw wo raw, je peele Waŋkluu raw naa nen see ɓe ne Josef nen lwaʼ ge ga : Ur go ciŋ, hoo mbargan wo de man ɓe, daŋ wo go Ejipte hay wo go ni, hãã ndi fer yaŋ riŋ moge ga : fer mbo le so, werga Herod de kiɗ weln ga se ʼwarn go.
14Wersen Josef raw maŋ weln wo de man ɓe, kal rawge de ɓaara Ejipte de suŋ ni. 15Á raw hayge wo go Ejipte ni, hãã go ti wur maga Herod wo go huugi mono. Wããre maga je ndar nen wããre ma jag Baa go hay wããn go ga : Wel ɓin le go Ejipte, ndi ɗen le liŋ. Wããre sen raw leʼ ge go ti jag ɓe so.
À id weere kleere wo go
16Blam sen Herod wo koge ga jar ma de ko wer fẽẽren jãɗ wo se jãɗge mokay, ɓil ɓe raw sõõge debaŋ. Á raw riŋ jar ga á mo wo wo id weere twerpiiri ma Betlehem de sir ma ti ɓen wo go ni kããra ɓuy, ma kiŋgi ɓog ɓog wo, hay bo maga kiŋgi ɓaara day wo go doosen no gà doo maga se hay laa jag jar wo ga gérn naa nen de ngar ngel sen no kay mono. 17Wããre maga Jermi, je ndar nen wããre Baa go hay siin go mono, re sen la raw leʼ ge go ti jag ɓe so. Á ga :
18À le de laa ngar jag le Rama,
Roo wo de ngar ge jag debaŋ deŋ.
Diŋ Rasel de ra weere ɓen wo.
Á bay yãã jag ga jobo mo coɓ nen se boŋ draʼ wa, werga á wo go de húulí mono.
Josef fer le ɓi sir Israyel
19Herod wo go huugi mokay, je peele Waŋkluu raw naa nen see ɓe ne Josef nen lwaʼge le Ejipte, 20raw riŋgi ɓe ga : Ur go ciŋ, hoo mbargan wo de man ɓe, fer de ɓaara ɓi sir Israyel, werga jar ma kiɗ weln ga saara ʼwarn go, á huɗ wo we go. 21Wersen Josef raw urgi go ciŋ seŋ, raw hoo weln wo de man ɓe, fer ferge le de ɓaara ɓi sir Israyele.
22Ama á wo laage ga Arkelaws kol we waŋ Jude ti ngel pan ɓe Herod, á raw joŋ hẽẽne ma woge hayge ɓi sir se no. Blam maga lwaʼgen wo kaŋ nen ɓe go ti wããre sen, á kal rawge wo go ɓi sir Galile, 23raw hayge go ɓi leege maga à ɗen ga Nasared mono. Wããre maga jar ndar nen wããre ma jag Baa go hay siin wo go ga : À ɗen ge yaŋ ga je Nasared mono, re sen raw leʼ ge go ti jag ɓaara so.
Currently Selected:
MATIYE 2: TUP
Highlight
Share
Copy
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.