MATIYE 27
27
Jar a de Yeso pel Pilade
(Mark 15.1; Lug 23.1-2; Jaŋ 18.28-32)
1De jag toŋ crum, waŋre jar ma siɗ jag wo de jar kluuri jar Jwif wo ɓuy, raw wo tay jag ɓaara ga saara mo wo go ʼwar Yeso. 2Á raw wo baŋge ɓe, nduu wo de ɓe ne Pilad goforne no.
Judas ʼwar see ɓe go
(Joŋ 1.18-19)
3Judas je ma kaŋ taw Yeso go la wo koge ga reen baa Yeso we mokay, wããre sen raw cege ɓe debaŋ, á raw hoo solay boo ma hwal hwal swaʼn wo le ne waŋre ma siɗ jag wo de jar kluuri jar Jwif wo. 4Á raw riŋ rage ga : Ndi joŋ ɓlagge ti maga ndi hã je maga joŋ ɓlagge gà go ʼwarge mono. Á raw wo ferge ne hẽn ga : Sen maŋ see wùr gà so. Sen diŋ re ma ɓo. 5Judas raw laa solayn wo go ɓi tiŋ Baa, kal rawge hag see ɓe go ciŋ.
6Waŋre ma siɗ jag raw wo hoo solayn ga : Wããre Baa bay de hã faage ma laa solayn mokay yoo solay ma ɓi tiŋ Baa wa, werga á diŋ poɗge cíi. 7Blam sen á raw wo tay jag ɓaara ga saara mo yee pay de solay sen mokay doo je bor pãyre no, ma ter jar ma de koɗ wo ti ngel ni. 8Diŋ wersen ga à raw kaŋ ɗúu ne pay sen ga pay cíi hãã wara mo so no. 9Wersen wããre maga Jermi je ndar nen wããre Baa go hay yern go ga : Á hoo wo solay ma hwal hwal swaʼ no (solay maga ngaɓa jar Israyel tay wo jag ɓaara yeege ɓe de ɓe mono). 10Á raw wo hãge ɓe yee pay mani je bor pãyn doo ga Baa Waŋkluu hay riŋ me de ɓe nono. Re sen raw leʼ ge go ti jag ɓe so.
Pilad de wii jag Yeso
(Mark 15.2-5; Lug 23.3-5; Jaŋ 18.33-38)
11Yeso raw ooge pel gofornen deŋ, goforne raw wiigi ɓe ga : Ndo mbo diŋ Waŋ jar Jwifn wo ge? Yeso raw ga : Á mbe doo ga ndo wããn mbo nono. 12Waŋre jar ma siɗ jag wo de jar kluurin raw wo ɓoʼ ɗee car wããre ne Yeso see blam sen debaŋ, Yeso laa fer wããre ne hara gà has. 13Pilad raw riŋgi ɓe ga : Ɓa ndo bay laa wããre maga á wo de car ge ɓe mo see mo deŋ wa ge? 14Yeso laa fer wããre ne hẽn ti maapo ni boŋ gà has ɓuy, hãã Pilad raw ngrisgi debaŋ.
Jar wo ga saara mo ii Yeso go
(Mark 15.6-15; Lug 23.13-25; Jaŋ 18.39—19.16)
15Ti few Pag tum Pilad de hadge ɓoɗ je daŋgay maga ngaɓan dan wo ga ɓoʼ sen le go, se ɓoɗ sen go ne hara. 16Paga ti wur sen ni tuuseŋ, je leɗ faage po yaŋ ti daŋgay ni, à ɗen ga Yeso Barabas. 17Pilad raw wii ngaɓa ma de taygen wo so ga : Nday da ga ndi mo ɓoʼ wose go ne nday la? Yeso Barabas yaw, noga Yeso maga à ɗen ga Kris mo yawla? 18Werga Pilad go de koge ga á hã wo Yeso go ne se ʼwarge mokay doo huni.
19Pilad wo hayge ti paale ma cag wããren mokay, wãy ɓe raw ɓoʼ jobo le see ɓe ga : Kal see ɓo ti re bloo sen mo yeʼ wa, á bay de joŋ re wa hase, werga lwaʼge naa joŋ coo ɓi suŋ la ti re ɓe debaŋ.
20Waŋre ma siɗ jag wo de jar kluuri jar Jwifn wo ɓuy raw wo jãɗ nen ngaɓan wo ga á mo wii wo Pilad ga á mo ɓoʼ Barabas le go, mo ʼwar Yeso go lay. 21Pilad fer wii rage tigriŋ ga : Yoo jar se ɓog wo mo lag nday da ga ndi mo ɓoʼ ma hon le go la? Á raw wo ga : Diŋ Barabas, Barabas. 22Pilad raw wii rage ga : Day ni ndi mo joŋ may se de Yeso maga à ɗen ga Kris mo lay la? Á raw wo wãã ge ɓuy ga : Ɓaln go ti koo, ɓaln go ti koo. 23Pilad raw wii rage ga : Á joŋ diŋ ɓlagge may no maʼ la? Á raw wo ngar jag de egre ɓaara ɓuy ga : Ɓaln go ciŋ ti koo, ɓaln go ciŋ ti koo. 24Pilad wo koge ga egre se laa kããge gà so mokay, ngar jagn yaʼ wer lay, á raw maŋ bii yog doo ɓe go pel ngaɓan kaʼ ɓuy ga : Ama ma ɓi dugwaare húulí bloo sen mo deŋ bay ti ɓi wa, sen diŋ re ɓay. 25Á raw wo wãã ge ɓuy ga : Daga dugwaare húulí ɓe mo leɗ ne wùr ti de weere wùr wo. 26Blam sen Pilad raw ɓoʼ Barabas go ne hara, raw jwag Yeso de mbreŋ, raw hãge ɓe go ga wo go ɓalge ɓe ti koo.
Soode feg wo ti Yeso
(Mark 15.16-20; Jaŋ 19.2-3)
27Soode Pilad raw wo age de Yeso ɓi tiŋ mani goforne no, sooden wo ɓuy raw wo yiŋ ti ɓe go cwẽẽ. 28Á raw wo ndar õõbe ɓen wo go, raw wo laa õõbe ma kluu desẽẽ ne hẽn ti. 29Blam sen á raw wo tãã klaŋ hõõre kaŋ wo ne hẽn ti, raw wo hã graw ne hẽn ti doo ware. Á raw wo lag kõyõgre gesiŋ pel ɓe, mbuɗ wo foo ɓe ga : Wùr hee jag mo, Waŋ jar Jwifi. 30Á raw wo tuf sããre ne hẽn nene, yãã wo grawn mbar wo ne de ɓe ti. 31De maga á mbuɗ wo foo ɓe go mbuɗ mono, á raw wo naa õõbe ma kluun go, raw wo lag õõbe ma ɓen wo ne hẽn ti, raw wo rawge ɓalge ɓe go ciŋ ti koo ma ɓal jar no.
A ɓal Yeso go ti koo ma ɓal jare
(Mark 15.21-32; Lug 23.26-43; Jaŋ 19.17-27)
32De maga á wo laage le go mokay, á raw wo yiŋgi de je Siren po, à ɗen ga Simoŋ, á raw wo maŋ koo maga à de woge go ɓal Yeso ti ɓe ne hẽn ti de waŋ. 33Á raw wo dayge ti ngel maga à ɗen ga Golgota, wer ɓe ga ngel Hm Ti. 34Ti ngel sen ni, saara raw hã yii ne Yeso de tay nen de fen ma glagge ga á mo jo ne. Ama á wo gusgi ɓe mokay, á laa dayge joge ɓe gà.
35Á raw wo ɓalge ɓe go ti koo no, raw wo ɓes õõben wo go de naage wãywáale. 36Blam sen á raw wo lagge gorge ɓe ni. 37Á raw wo yer wããre ma kaŋ nen jar go ti re maga à baan ti ɓe ga : Bloo sen la diŋ Yeso Waŋ jar Jwif wo. 38Á raw wo ɓal jar leɗ faage wo ti jeŋ Yeso ni ɓog lay, ma la boŋ ti ɓaŋ war ɓe, ma lan ti ɓaŋ gùr ɓe lay.
39Jar maga see wo ti faage ni, glad wo ti ɓaara ɗar wo ne lay, 40wãɗ wo ga : Ndo bloo je se maga ndo mbug tiŋ Baan go, fer boo ma tigriŋ síilí swaʼ no, yãã see ɓo go de see ɓo sog ne. Hayga ndo yaŋ diŋ wel Baa, yãã see ɓo go jag koo ma ɓal jar no day cwaa le go gesiŋ sog ne. 41Waŋre jar ma siɗ jag wo de jar ma ndar wer wããre Baa wo de jar kluurin feg wo ti ɓe doosen no lay, wãɗ wo ga : 42Á yãɗ jar po wo go, day ɓen á kãã ma yãã see ɓe go de see ɓe gà ane? Á nà diŋ waŋ jar Israyeln wo so lay á mo ɗii le go gesiŋ mo men koo ma ɓal jar le go patala, ni wùr hã ɓil wùr yaŋ go ne hẽne. 43Á raw kaŋ ɗiggi ɓe ti Baa, á raw wãɗge ga se diŋ wel Baa lay no. De ele, wùr ko mo ɗa so, ti ga Baa yaŋ dage ga se yãã ne go patala so layblaʼ no. 44Jar leɗ faage maga wo de ɓalge ti jeŋ ɓe la, ɗarn wo doosen no lay.
Yeso huu go so
(Mark 15.33-41; Lug 23.44-49; Jaŋ 19.28-30)
45Wur wo dayge ɗeger mono, suŋgu raw ɓoʼge go ti sir krub ɓuy, hãã wo dayge go de wur maga fǐiri ma de law wo go de kos age go liŋ mono. 46De wur sen, Yeso raw ngar jag ciŋ kloŋ ga : Eli, Eli, lamma sabagtani. Wer ɓe ga Baa ɓi no, Baa ɓi no, ndo tob me go le la. 47Jar po wo yoo jar maga hay wo de lagge ni, raw wo laa wããre sen mokay, kal wo wãã ge ga : Á de ɗe Eli. 48Jobo raw ur ɗee deparday maŋ fen kor hãn hee nen feneger, raw saʼge ɓe jag koo coŋ wo ne Yeso ga á mo jo ne. 49Ama jar maapo wo ga : Men eŋ ɗa, naa kon ɗa, ti ga Eli nduu yaŋ go yããge ɓe layblaʼ no. 50Yeso raw ngar jag de hãã tigriŋ pa, blam sen egre ɓe raw hooge go.
51De sen ni, õõbe ma de caa nen tiŋ Baan raw ngar ɓil go ɓoge, le go ciŋ kaʼ, hãã go gesiŋ taʼa, sir raw fĩɗgi, húulì raw wo mungi go debaŋ lay, 52tipaale raw wo bulgi go lay, ngaɓa jar mani Baa maga hay huɗ wo go ɓaa fer wo go birgi lay. 53Á raw wo laage le go ɓi tipaalen wo. Wo dayge blam maga Yeso wo go kalge ciŋ mokay, á raw wo laage ɓi leege Jerusalem, jar po debaŋ ko ra wo lay.
54Je kluu soode wo de soode maga wo de gor ti Yeso de kããra la, wo wo ko fĩɗgi sirn de re maga joŋ mo deŋ, á raw wo caa hẽẽne debaŋ, kal wo wããge ga : Á mbe diŋ wel Baa cwãy. 55Naare maga hay maŋ wo blam Yeso le hãã Galile joŋ peele ne hẽn, hay yaŋ wo ni debaŋ, lag wo koge ɓe wo go wer day lagge. 56Mari ma Magdala, Mari man Jag wo de Josef, de man weere mani Sebeden wo yoo ɓaara ni lay.
Á ɓoʼ Yeso ɓi rum húulì
(Mark 15.42-47; Lug 23.50-56; Jaŋ 19.38-42)
57Wur wo go coŋge mokay, je horog debaŋ po le ɓi leege Arimate raw age, à ɗen ga Josefe, á de see ɓe diŋ je ma wer Yeso lay. 58Á raw woge see Pilad wii húulí Yeso. Pilad raw hã faage ga hã húulí Yeso ne hẽne. 59Josef raw maŋ húulí ɓe so, raw kuugi ɓe de õõbe ma defay, 60kal rawge ɓoʼ ge ɓe ɓi rum húulì maga se hay cloʼn de see ɓe ti húulì, blam sen á raw legad húulì ma kluu le ma tẽg jag rum húulì no, raw mbe rawge so. 61Mari ma Magdala wo de Mari ma lan raw wo lagge pel tipaalen lagge.
Á lag jar gor ti tipaale no
62Go toŋ ɓe wur Saba mokay, waŋre ma siɗ jag de Farisiyẽẽ raw wo de kããra see Pilade, 63á raw wo ɗege ɓe ga : Waŋ wùr ma de el no, ti wùr fer ɗig wããre je geteʼn ti maga á hay tenen caw ɗa, á hay wãã ga : blam síilí swaʼ se fer yaŋ birgi go. 64Wii jar ga á mo wo wo gor ti tipaalen hãã go wur síilí ma de swaʼ no, nen maga jar ma wer ɓen mo á wo go maŋge ɓe freŋ ma ferge riŋ jar ga : Á fer we go birgi wa. Hayga re sen joŋ we doosen, geteʼ ma blam la daŋ ge ma taŋgu no. 65Pilad raw riŋ rage ga : Hoo we soode mo lag wo no, see we gorge ɓe de el doo maga nday kãã nono. 66Á kal wo rawge so, lẽẽ wo jag tuun go de mopo doo keãy, kaŋ wo lamba ne hẽn ti ma koge ɓe, lag soode wo gorge ɓe lay.
Currently Selected:
MATIYE 27: TUP
Highlight
Share
Copy
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.