MATIYE 26
26
Waŋre ma siɗ jag tay wo joŋ cogob ti Yeso
(Mark 14.1-2; Lug 22.1-2; Jaŋ 11.45-53)
1Yeso wo taw wããre sen wo go ɓuy mokay, á raw riŋ jar ma wer ɓen wo ga : 2Nday yaŋ de koge ga naw few Pag gwaʼ ɓoge, day à hã ge Wel je Tabay yaŋ go maga à mo wo go ɓal ge ɓe ti koo.
3Blam sen waŋre jar ma siɗ jag wo de jar kluuri jar Jwifn raw wo tay ti see ɓaara liŋ ni Kayf je kluu ma siɗ jag no. 4Á raw wo tay jag ɓaara ɓuy ga saara mo baa Yeso go de yoŋre, saara mo wo go ʼwar ge ɓe. 5Á raw wo riŋ kããra ga : Naa mo wo baa ge ɓe wur few wa, naa baan we wur sen jar hoo ge wo ciŋ de wããre.
Wãy po kaa trusa ne Yeso ti
(Mark 14.3-9; Jaŋ 12.1-8)
6Yeso wo Betani liŋ ni Simoŋ bloo je cíi no, 7wãy po raw yaʼ ge see ɓe de trusa maga yee solay pur debaŋ ɓi klobo pare, raw kaa trusan go ne Yeso ti de maga Yeso de re hoole mono. 8Jar ma wer Yeson wo wo ko ge doosen mokay, ɓil ɓaara raw sõõge, á kal wo riŋ gi ga : Á ɓlagn go mokay gahãyla? 9Á hay nen maga á de yee trusa maga yee pur mokay go, ma hã solay ɓe go ne jar coo wo nà ɗawa ga? 10Yeso raw koge ga á wo de wããge doosen, á raw riŋ rage ga : Nday gay wãyn mo deŋ gahãyla? Fen maga á joŋ ti ɓi mokay de el debaŋ. 11Nday joŋ ge yaŋ mbay de jar coo wo see ɓay la tum, ama ma ɓi nday daʼ ge ndi see ɓay la tum gà. 12Á kaa trusan me see, á joŋn ma ʼwũy see ɓi go ma woge ɓoʼ mege ɓi tuu de ɓe. 13Kidolgi ndi riŋ nday ti ngel maga à wo ge go sii Wããre ma de Cõõren mokay go ni ɓuy, hãã go ti tamsir krub ɓuy, à sii gi fen maga wãyn joŋ mokay yaŋ go ni ma ɗig ti ti ɓe.
Judas ga se hã Yeso go ne waŋre ma siɗ jag wo no
(Mark 14.10-11; Lug 22.3-6)
14Blam sen jobo yoo jar ma wer ɓe ma hwal ti ɓog wo boŋ, à ɗen ga Judas Iskariyod, raw woge daʼ waŋre jar ma siɗ jag wo, 15raw riŋ rage ga : Hayga ndi hã Yeso we go ne nday ni nday hã may yaŋ me la? Á raw wo kee solay boo ne hẽn hwal hwal swaʼa. 16Tĩĩ wer de wur sen tuuseŋ Judas kal rawge kiɗ faage maga se mo hã Yeso go ne hara.
Yeso re hoole few Pag de jar ma wer ɓen wo
(Mark 14.12-21; Lug 22.7-14,21-23; Jaŋ 13.21-30)
17Wur tĩĩgi wer naw few hoole ma bay defõõren mono, jar ma wer Yeson raw wo age wiigi ɓe ga : Ndo da ga wùr mo joŋ rege few Pagn la gen ɓa? 18Yeso raw riŋ rage ga : See we wo ɓi leege ni mono, ni nday riŋ we ga : Waŋ wãã ga wur se kos we go, se wo ge de jar se ma wer sen wo joŋ few Pag diŋ ni ɓo. 19Jar ma wer ɓen raw wo joŋge doo maga Yeso riŋ ra no lay, jar ɓen raw wo joŋ rege few Pag ni so.
20Wur wo go coŋge mokay, Yeso raw wo lagge rege de jar ma wer ɓe ma hwal ti ɓog wo. 21Á wo de rege mo lag, Yeso raw riŋ rage ga : Kidolgi ndi riŋ we, jobo yoo ɓay la kaŋ ge taw ɓi yaŋ go. 22Jar ma wer ɓen kol wo go lawge debaŋ, raw wo wiɗ gi ɓe go boŋ boŋ ɓuy, je la ga : Bay ndi wa gà Waŋkluu? Bay ndi wa gà Waŋkluu? 23Yeso raw ga : Je maga de her hoole nen nee ɓi gosoŋge de ɓi degaʼ diŋ je maga kaŋ ge taw ɓi mono. 24Wel je Táabay wo ge go huugi diŋ doo wããre maga go de yerge nono. Ama re yaŋ ti je maga kaŋ ge taw Wel je Tabay go mono. De el ɓen je sen de hay biŋ go gà nà ɗawa. 25Judas je maga go de kaŋ taw Yeso la raw wiigi lay ga : Bay diŋ ndi wa gà Waŋ? Yeso raw fer wããre ne hẽn ga : Diŋ ndo je maga ndo de wãã ge ɓe mo yeʼ no.
Hoole ma bay ɗage
(Mark 14.22-26; Lug 22.15-20; 1 Kor 11.23-25)
26Á wo de rege mo lag, Yeso raw maŋ hoolen doo, raw joŋ suseʼ wo ne Baa wo ti ɓe, blam sen á raw car nen hoolen go, raw hãge ɓe ne jar ma wer ɓen wo, kal riŋ rage ga : Far we ne, re we ne, á mokay diŋ hõõgese ɓi. 27Blam sen pa, á raw maŋ wehãn de yii ɓili, raw joŋ suseʼ ne Baa wo ti ɓe, blam sen á raw hãge ɓe ne hara, raw riŋ rage ga : Jon we ɓuy, 28á mokay diŋ cíi ɓi ma kaŋ nen jar ti tayge jag maga Baa fer tayge de jar téebeere wo mono, á kaa go ti re jar ngaɓa maga Baa mo fug ɓil go ti ɓlagge jar wo. 29Ndi de riŋ nday ga tĩĩ wer wara, ndi jo ge yii sen gà so has hãã go ti wur maga ndi wo ge jo yii ma defay de ɓay ti twaywaŋ mani Baan mono. 30Blam sen á raw wo ʼwaa siŋ few no, blam sen pa, saara kal rawge ti húulì maga koore Olif wo ti ɓe mono.
Yeso ga Piyer dog kaŋ kiŋ yaŋ ɓaale swaʼ ga se ko se gà
(Mark 14.27-31; Lug 22.31-34; Jaŋ 13.36-38)
31Blam sen Yeso raw riŋ jar ma wer ɓen wo ga : De suŋ ma kaʼ wara lam tuu, nday men ndi ge yaŋ go ɓuy, werga á go de yerge ga : Ndi ii gi je koɗ sããren wo go, sããren dus gi wo ɓil yaŋ go boŋ boŋ ɓuy lay. 32Yeso raw ga : Ndi wo we ferge go bir gi, ndi raw ge yaŋ wo pel ɓay Galile. 33Piyer raw ga : Hay bo ga jar lan ɓuy men wo ndo we go layblaʼ, ma ɓi, ndi men mo go gà hase. 34Yeso raw fer wããre ne hẽn ga : Kidolgi ndi de riŋ moge ga de suŋ ma waran mo kaʼ tuu taŋgu maga kag wo rage, ndo dog kaŋ kiŋ yaŋ go ɓaale swaʼ ga ndo ko me gà. 35Piyer raw wããge ga : Ndi kaŋ ge kiŋ go ga ndi ko mo gà gà hase, à mo hay bo woge ii naa go de kããra ɓuy yaw. Jar ma wer ɓe ma lan ɓuy wãã wo doosen no lay.
Yeso wo tosge Getsemane
(Mark 14.32-42; Lug 22.39-46)
36Yeso raw nduugi de jar ma wer ɓen wo ti ngel maga à ɗen ga Getsemane, á raw riŋ rage ga : Lag we lam taʼ la no, ndi wo tosge mo taʼ wo ɗa. 37Á raw hoo Piyer wo wer ɓe de weere mani Sebede ma ɓog wo. Jiili ɓe raw tĩĩ wer ndarge ɓe, se law see ɓe debaŋ lay. 38Á raw riŋ rage ga : Jag jiili ɓi go de caage, hãã de woge ʼwar mege go. Lag we lam taʼ no, lag we tenen. 39Á raw yaʼge wo go see ɓaara hãã ɗawa, raw leʼ monɗra tosge ga : Baba, hayga á joŋ no, yaʼ joŋge bon ma kay wo go see ɓi hãã ɗa la. De sen ɓuy joŋ diŋ doo ga ndi da no wa, ama joŋ diŋ doo ga ɓil ɓo dan nono.
40Blam sen á raw ferge le see jar ma wer ɓe ma swaʼ wo, á daʼ rage ti naa, á raw riŋ Piyer ga : Nday bay de kããge ma iggi tenen see ɓi smagga wa hase? 41Lag we go de pũygi, tos we maga nday mo leɗ ge go nen re ma jãɗ weege wa. Jiili je tabay yaŋ mbe de egre, ama hõõgese ɓe go de gayre debaŋ.
42Á raw ferge wo tosge tigriŋ pa ga : Baba, hayga bon sen mokay yaŋ maga ndi mo jon ɓegdeʼ no, ni ndo joŋ mbo doo ga ɓil ɓo da nono.
43Á raw ferge le see jar ma wer ɓen wo mo pa no, á daʼ rage ti naa pa, werga nen ɓaara de joŋ naa debaŋ. 44Yeso raw men rage, raw ferge wo go tosge ma de swaʼ de wããre sen pa. 45Blam sen á raw ferge le see jar ma wer ɓen wo, raw riŋ rage ga : Leɗ we mbay naa patala so? Ig mbay see ɓay so. Ko we nen ɓay, wur maga à wo go hã Wel je Tabay ne jar ma de ɓlagge wo doo á we go. 46Hoo we go ciŋ naa see. Ko we nen ɓay, bloo maga kaŋ taw ɓi go yaŋ le.
À baa Yeso
(Mark 14.43-50; Lug 22.47-53; Jaŋ 18.3-12)
47Yeso de wãã reen ɗa, ko la Judas je ma yoo jar ma wer ɓe ma hwal ti ɓog wo á we yaw, de jar wer ngaɓa debaŋ de moslamre wo de grawre doo debaŋ. Laa ra le diŋ waŋre jar ma siɗ jagn wo, de jar kluuri jar Jwif wo. 48Judas je maga kaŋ taw Yeso go, raw riŋ jarn wo ti fen maga se wo ge joŋge ɓe ma kaŋ nen ɓaara ti ɓe ga : Bloo maga ndi wo ge ɓoʼ doo ne hẽn soole la, diŋ je maga nday da baage ɓe mono ni nday baa we ne so. 49Judas raw yaʼ ge see Yeso deparday, kal ɗege ɓe ga : Waŋ, ndi hee jag mo, raw ɓoʼ doo ne hẽn soole tuu. 50Yeso raw fer wããre ne hẽne, raw ɗege ɓe ga : Bar ɓi, taw re ɓo maga ndo á joŋge ɓe go. Blam sen jar ma lan raw wo yaʼge le, raw wo laa doo ne Yeso ti, baa wo ne. 51Jobo yoo jar maga hay wo see Yeso ni, raw naa moslam ɓen go, raw caa sug wejõõ je kluu ma siɗ jag go. 52Yeso raw riŋgi ɓe ga : Fer moslam ɓon ɓi fra ɓe, jar maga wo de hoo moslam ciŋ mo ɓuy deŋ à taw rage go diŋ de moslamre lay. 53Ndo bay de koge ga ndi de kããge maga ndi ɗe Pan ɓi le la ga á mo a le kay ndi, se kãã ma laa jar peele ɓe wo le durgi ti ɓi deparday ndar hwal hwal renam ti ɓog wa yawla? 54Ama Hayga ndi joŋ we doosen no kay, ni wããre maga à hay yer ra go ga á mo wo go joŋge doosen, á joŋ ge go joŋ ge yaw ne?
55Blam sen Yeso raw riŋ ngaɓan wo ga : Nday hoo ɓayn le ti ɓi de moslamre de grawre baa mege doo ga ndi diŋ je leɗ faagen no le la? Ndi yaŋ had we ge ɓi tiŋ Baa tum, nday baa me gà. 56Ama re sen á mo deŋ ɓuy ma leʼge go ti jag wããre maga jar ndar nen wããre ma jag Baa go hay yer ra wo go mono.
Blam sen jar ma wer ɓen raw wo menge ɓe go, daŋ wo de ɗeere ɓuy.
Á a de Yeso pel jar kluuri ma ɓoɗ ti wããre wo no
(Mark 14.53-65; Lug 22.54-55,63-71; Jaŋ 18.13-14,19-24)
57Jar maga baa wo Yeso le la, raw wo woge de ɓe ni Kayf je kluu ma siɗ jag no, maga jar ma ndar wer wããre Baa wo de jar kluurin wo go de tay ti ni mono. 58Piyer raw maŋ blam Yeso le hãã go jagjiŋ ni je kluu ma siɗ jag no, á raw kalge wo jagjiŋ, raw hayge ɓiŋ jar gor jagjiŋ wo koge ga wããre sen taw ge go tawge la.
59Waŋre jar ma siɗ jagn de jar kluuri ma cag wããren wo ɓuy kiɗ wo wããre mbe ti Yeso hãy hãy koɗ maga saara mo baw ne de wããre ma ʼwar ge ɓe go. 60Ama de kiɗgi wããre ɓaara ma hãyhãy ɓuy, á laa wo daʼ faage ma bawge ɓe gà hase, blam sen ɓuy, jar po raw wo age ɓog ga : 61Bloo mo deŋ hay wãã ga se kãã ma mbug tiŋ Baan mo kaʼ go, síilí wo joŋ ge swaʼ se fer ge boo ge ɓe ni pa.
62Je kluun ma siɗ jagn raw urgi ciŋ riŋ Yeso ga : Ɓa, ndo fer wããre gà has ge? Jar sen wãã wo ti ɓo mo deŋ gahãy ɓa? 63Ama Yeso laa wãã re gà hase. Je kluun raw riŋgi ɓe ga : De ɗúu Baa ma tenen no, ndi de wii ndo ga ndo mo fer wããre ne wùri de haʼge go haʼge. Ndo mbo diŋ Mesi, ndo diŋ wel Baan mbo yawla? 64Yeso raw ga : Doo ga ndo wãã mbo nono. Ama ndi de riŋ we ge ga tĩĩ wer wara nday ko ge Wel je Tabay yaŋ go de hayle ti ɓaŋ war Baa ma de egre daŋge ɓuyn yeʼe, day nday kon ge yaŋ le ferge le ciŋ ti swaare cwaage gesiŋ caw pa. 65Blam sen je kluun ma siɗ jagn raw ngar õõbe ɓen go, raw wãã ge ga : Á ɗar Baa mo pa. Naa bay patala de sãy wii jar ti wããre wa so hase. Nday laa we ga? Á ɗar Baa we. 66Nday ɗig gahãyne? Á raw wo ga : Wããren baw ne, á nen ʼwar ge go.
67Blam sen á raw wo tuf sããre ne hẽn nene, srogn wo de doo, jar ma baapo mbarn wo haw, 68riŋ wo ne ga : ngaɓ je mbar mogen ɗa so, ndo Mesi no, wose mbar mo mo so ne?
Piyer kaŋ kiŋ ga se ko Yeso gà
(Mark 14.66-72; Lug 22.56-62; Jaŋ 18.15-18,25-27)
69Piyer hay le go siigi feele, maygebee je kluun ma siɗ jagn raw riŋgi ɓe ga : Ɓa, ndo hay le wer Yeso bloo je Galilen la lay ga ge? 70Ama Piyer raw kaŋ kiŋ go pel jar ga : Ndi bay de ko re maga ndo de wããge ɓe mo deŋ wa.
71Blam sen á raw ferge wo go jagjiŋ, maygebee po raw koge ɓe pa, kal riŋ jar ma de tay tin wo ni ga : Je ma deŋ mo deŋ hay le wer Yeso ma Nasared lay. 72Piyer raw kaŋ kiŋ tigriŋ pa ga : Ndi haʼ go haʼge ga ndi ko bloo sen gà. 73Wo iggi blam sen meʼ ẽ, jar maga wo de lagge ni raw wo yaʼge see Piyer, raw wo riŋ gi ɓe ga : Kidolgi ndo diŋ je ma yoo ɓaara, wããre ɓo maga ndo wãã mokay go de kaŋ nen jar go ti ngel maga ndo a le ni mono. 74Piyer raw wããge ga : Hayga ndi caa we diŋ geteʼ no, ni Baa mo joŋ bon ɓi. Ane, ndi haʼ go haʼge ga ndi ko bloo ɓay mo deŋ gà. De sen ni tuu, kag raw rage. 75Piyer raw ɗig ti wããre maga Yeso hay riŋn go ga : Taŋgu maga kag wo rage, ndo dog kaŋ kiŋ yaŋ ti ɓi ɓaale swaʼ ga ndo ko me gà mono. Á raw kalge go siigi, raw rage debaŋ.
Currently Selected:
MATIYE 26: TUP
Highlight
Share
Copy
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.