MATIYE 10
10
Yeso hoo yoo jar ɓe wo hwal ti ɓog ma laa ra siɗ wããre Baa ne jare
(Mark 3.13-19; Lug 6.12-16)
1Yeso ɗe jar ma wer ɓe ma hwal ti ɓogn wo le, raw hã egre ne hara ma niɗ sõõre wo go, ma pẽɗ jar wo go jag wer cege ma honla ɓuy. 2Ɗúu jar peele Yeso ma hwal ti ɓogn wo mokay no : Ma taŋgun diŋ Simoŋ (à raw kaŋ ɗúu ɓe ga Piyer) wo de hẽn ɓe Aŋdre, lan diŋ Jag wo de hẽn ɓe Jaŋ jar ni Sebede wo, 3Filip, Bartelemi, Toma, Matiye je tar see no, Jag, je ni Alfe, wo de Tade, 4Simoŋ wel ma de oole ti jar sir ɓe ngiŋ no, la diŋ Judas Iskariyod je maga hã Yeso go ne jar hee ɓen wo mono.
Yeso laa jar peele ma hwal ti ɓogn wo siɗ wããre
(Mark 6.7-13; Lug 9.1-6)
5Yeso raw laa Jar ma hwal ti ɓogn wo wo, kal riŋ rage ga : Hee we ɓi leege jar maga bay wo diŋ jar Jwif wa wo wa, laa we ɓi leege jar Samarin wo wa lay. 6Ama see we wo diŋ see sããre jar Israyel maga wo go de yeɗ ge mo ɗa. 7Siɗ we wããre ti faage ga : Wur twaywaŋ ma ciŋ kos we go. 8Pẽɗ we jar cegè wo go, fer we bir jar ma de húulí wo go tenen, fãɗ we jar cíi wo go, niɗ we sõõre go ne jar ti lay. Nday daʼ fen sen go de koɗ has, hãn we go de koɗ has lay. 9Hor we boo biŋni, solay, hay bo siisii ma meʼ wo ɓi ndar doo ɓay wa. 10Hor we ndar ma raŋge doo ɓay wa, horge we õõbe ti ɓay ɓog ɓog wa lay, her we taarag ɓaale ɓay wa lay, far we grawre doo ɓay wa, werga je joŋre de kããge ma daʼ rege ɓen de joŋre se no.
11Nday wo we laage ɓi leege ma kluu noga ɓi leege ma klee no, kiɗ we diŋ je maga de yãã waare ɓay mono, lag we ni je se no, hãã go ti wur maga nday wo go men ngel sen no. 12Nday leʼ we laage liŋ ni jobo so no, ni nday wãã we ti jar ma liŋ nin wo ga : Baa mo ɗaw we doo ɓe de ele. 13Hayga jar ma ɓi tiŋ sen yãã we wo nday we, wããre ɓay maga nday wãã ma hã jam mo hay ti ɓaara, de ele. Ama hayga á yãã we wo we gà no, ni nday mo fer we wããre ɓay maga nday wãã ma hã jam le see ɓay. 14Hayga tiŋ po noga sir po day wo we yãã waare ɓay gà noga day wo coʼ sug wããre ɓayn gà ni nday laa we go, poʼ we ɓurgi ma ɓaale ɓayn go ne hara ni. 15Ndi de riŋ nday kidolgi, wur Cagge wããren, bon ma jar Sodom wo de Gomor joŋ yaŋ ɗawa daŋ ma ɓi leege sen pa yaw.
Yeso ga à wo yaŋ joŋ coo ɓaara wurpo
(Mark 13.9-13; Lug 21.12-17)
16Coʼ we sug ɓay. Ndi de laa nday wo doo sããre maga wo wo laage yoo way-baa wo nono, joŋ we see ɓay de ɗeŋ doo cwe nono, hay we desãy doo kurgudu nono. 17Koɗ we see ɓay de el, jar wo ge yaŋ ʼwad war ne nday ti pel jar cag wããren wo, à jwag wo nday yaŋ de mbreŋ ɓi tiŋ tosge ɓaaran wo. 18Á wo ge wo yaŋ de ɓay pel goforne wo, de waŋren wo mbarge ti re ɓi, ma joŋ sedewa ɓi go pel jar maga bay wo jar Jwif wa mo lay. 19Á wo ge wo we de ɓay pel jar cag wããren wo, ni nday mo joŋ we hẽẽne ti maga nday wãã ge gahãyla, noga faage wããre maga nday wãã ge mo wa. Wããre maga nday daʼn ge ma wããge, à hãn yaŋ wo ne nday ti ngel ni kway. 20Werga wããn ge bay diŋ nday wa, ama Nenterse mani Pan ɓay wããn ge ne nday ɓili.
21Jar po hã wo hẽẽre ɓaara yaŋ wo go ga id ra go, pããrebe joŋ ge wo weere ɓaara yaŋ wo doosen no lay, day weere mbuɗ gi wo nen yaŋ de pããre ɓaara wo, day id ra wo yaŋ go lay. 22Jar caa hee yaŋ de ɓay ɓuy ti re ɓi. Ama je maga oo we ngiŋ hãã go ti wur tawge sirn no, je sen daʼ ge see ɓe yaŋe. 23À leʼ we joŋ bon ɓay ɓi leege po no, ni nday daŋ we go ɓi leege ma tigriŋ. Ndi de riŋ nday kidolgi ga : Nday kãã ma raŋ jag sir Israyel wo go ɓuy taŋgu maga Wel je Tabayn fer le mo gà.
24Wel maga à de hadge ɓe ɗa, bay de daŋ je had ge ɓen wa. Wejõõ po bay de daŋ pan tiŋ ɓen boŋ wa lay. 25Say wel maga à de hadge ɓe ɗa, kol go doo je hadge ɓen ɗa lay, wejõõ kol go doo pan tiŋ ɓen ɗa lay. Hayga à hay mbuɗ foo pan tiŋ we le, joŋ nen ɗege ɓe we ga Belsebul waŋ sõõre wo no, ni à mbuɗ gi foo jar ma liŋ ni ɓen wo ɗe rage de ɗúu ma de ɓlagge daŋ sen so yaw.
Joŋ hẽẽne diŋ doo Baa
(Lug 12.2-7)
26Joŋ we hẽẽne doo jar téebeere wo wa. Jar mo yoŋ bà wo mopo go ga kon wa yaw, jar wo ge mbe go ko ge ɓe, jar mo wãɗ bà wo re po ga da ga jar mo laan go wa yaw, jar wo ge mbe go laa ge ɓe. 27Wããre maga ndi hay wãã we ne nday nen suŋgu no, wãã we ne go de ceg kãge. Wããre maga nday hay laa we jag ɓi de yoŋre, ngar we jag go de ɓe ciŋ ti tiŋ kloŋ. 28Jar maga id wo hõõgese ɓay go tawa, kãã wo ma id nenterse ɓay go gà mono, joŋ we hẽẽne doo ɓaara wa. Joŋ we hẽẽne diŋ doo Baa maga id hõõgese ɓay go de nenterse ɓay ɓog ɓuy nen wùu maga taw gà mono. 29Jar go de ko ge ɓuy ga jir ɓog à yee ra siisii boŋ lay. De sen ɓuy, boŋ yoo ɓaara leʼ go gesiŋ ga Pan ɓay Baa bay de hã faage ɓe wa gà. 30Ama ma ɓay hayba riŋ ti ɓay go de keege ɓuy. 31Joŋ we hẽẽne wa so, nday de daŋ jir wo nen Baa debaŋ yaw.
Yeso ga yoŋ jag go ti se wa
(Lug 12.8-9)
32Je maga wãã we go pel jar poɗag deŋ ga se diŋ je ɓi no, ndi wãã yaŋ go ti ɓe pel Pan ɓi maga le ciŋ ti ɓe poɗag deŋ ga á diŋ je ɓi lay. 33Ama je maga wãã we go tinoo pel jar poɗag deŋ ga se bay de ko mege wa no, ndi wãã ge yaŋ ti ɓe pel Pan ɓi maga le ciŋ poɗag deŋ ga ndi ko je sen gà lay.
Yeso ga se a bay ga jar mo hay jam wa, se a diŋ de moslam
(Lug 12.51-53; 14.26-27)
34Ɗig we ga ndi á diŋ ga jar ma ti sir mo hay wo de lagge jam wa. Ndi á diŋ ga jar ma ti sir la mo hay wo de lagge jam gà ama ndi á diŋ de moslam. 35Ndi á diŋ car ɓil wel wo go de pan ɓe, may wo go de man ɓe, wãy wel wo go de kaa ɓe man war ɓe. 36Jar po wo liŋ ni ɓaara car wo hee yaŋ de kããra.
37Je maga yaŋ da pan ɓe, noga man ɓe de daŋ mege no, bay diŋ je ɓi wa, je maga yaŋ da wel ɓe noga may ɓe de daŋ ndi no, bay diŋ je ɓi wa. 38Je maga hã ɓil ɓe go ga se mo huu mbe go ti re ɓi gà day maŋ blam ɓi we gà no, bay je ɓi wa. 39Je maga da ga se mo ʼwar see se go ti re ɓi wa mono, je sen diŋ je maga bas ge see ɓe go mo so no, ama je maga yãã wããre ɓi no, da ʼwar see ɓe mbe go ti re ɓi mono, je sen kol ge tenen caw tum so yaw.
Yeso ga jar maga da ge wo jar ma wersen daʼ ge wo poɗge yaŋ
(Mark 9.41)
40Wosela maga yãã waare ɓay we see, ni á yãã diŋ waare ɓi, je maga yãã me we see ɓe, ni á yãã diŋ je maga ɓoʼ me le mo lay. 41Je maga yãã je ndar nen wããre Baa go we see ɓe werga á diŋ je ndar nen wããre Baa go no, daʼ ge poɗge doo mani je ndar nen wããre Baa go no maʼ lay. Jobo yãã je maga yaŋ seege ti faage Baa de deele we werga a de deele pel Baa no, daʼ ge poɗge doo mani je ma de deele no maʼ lay. 42Je maga hã bii ma desãy meʼ layblaʼ we ne wel po yoo weere ma lag wo werga á diŋ je ɓi ma wer ɓi no, kidolgi ndi riŋ nday ga á daʼ poɗge yaŋ ti ɓe.
Currently Selected:
MATIYE 10: TUP
Highlight
Share
Copy
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.