MATIYE 9
9
Yeso ur je grúm go ciŋ vboŋ vboŋ
(Mark 2.1-12; Lug 5.17-26)
1Yeso raw ɗii daage, raw cegaɗ maarogn go, kal rawge ɓi sir ɓe. 2À raw age de je grúm ne hẽn de ɓoʼ ge ti fen suuli. Yeso wo ko ge ga jar sen wo de hã ɓil ɓaara ne se mono, á raw riŋ je grúm ga : Coɓ nen ɓo wel ɓi no, ndi fug ɓil we go mo ti ɓlagge ɓon wo. 3Wersen jar po ma ndar wer wããre Baa raw wo wããge de ɓil ɓaara ga : Bloo se deŋn de ɗar Baa. 4Yeso raw ko ɗiggi ɓaara go, kal wãã ge ga : Wer may ga nday ɗig ɗiggi se ma de ɓlaggen mokay la? 5Maga go gus diŋ ma honla, maga ndi mo riŋ ne ga Ndi fug ɓil we go mo ti ɓlagge ɓon wo mo yaw, noga ndi mo riŋ ne ga : Ur go ciŋ, see mo yawla? 6Ama daga nday mo ko ga Wel je Tabay yaŋ de egre ma fug ɓil go ne jar ti ɓlagge wo ti tamsir la. Á raw riŋ je grúm ga : Ur go ciŋ, maŋ fen suuli ɓo no, see liŋ.
7Bloon raw urgi go ciŋ, raw liŋ jag ɓe. 8Ngaɓan wo wo ko ge doosen mokay, á raw wo ngrisgi de hẽẽne debaŋ, togoɗ wo Baa ti maga á hã egre sen mokay ne jar téebeere wo mono.
Yeso ɗe Matiye wer ɓe
(Mark 2.13-17; Lug 5.27-32)
9Yeso raw kalge le go, raw ko jobo maga à ɗen ga Matiye de hayle ɓi tiŋ ma tar segen yeʼe. Á raw riŋgi ɓe ga : Maŋ blam ɓi.
Matiye raw urgi go ciŋ raw maŋ blam ɓe.
10Blam sen Yeso raw hayge rege liŋ ni Matiye, jar tar seen wo de jar maga jobo bay kee rage jag wa raw wo age rege ɓiŋ Yeso de jar ma wer ɓen wo. 11Farisiyẽẽ wo wo ko ge no mokay, á raw wo riŋ jar ma wer ɓen wo ga : Wer may ga waŋ ɓayn re hoole de jar tar see wo de jar maga jobo bay kee rage jag wa mo la?
12Yeso wo laa wããre ɓaaran mokay, á raw riŋ rage ga : Jar maga bay wo de cegè wa, bay wo de sãy dogtor ti wa, de sãy dogtor ti diŋ jar ma de cege wora. 13See we had wer wããre ma de yerge ga : Ndi da diŋ ga wosela mo hay ko decoo kẽẽ, ama bay diŋ ngaɗge fẽẽre siɗ jag wa mono. Ma ɓi, ndi a bay ɗege diŋ jar maga a de horge sug ti ɓaara ga á wo de deele wo wa, ndi a ɗege diŋ jar maga á bay kee rage jag wa mono.
Wããre hẽẽge bii
(Mark 2.18-22; Lug 5.33-39)
14Jar ma wer Jaŋ raw wo yaʼge see Yeso, raw wo riŋgi ɓe ga : Wùr de Farisiyẽẽ wo wùr hẽɗ bii tum, day jar ma wer ɓon hẽɗ wo bii gà has wer may la?
15Yeso raw fer wããre ne hara ga : Nday ɗig ga jar maga à ɗe ra le re doo ɓoʼ ge wãy ti bii kãã wo ma lagge lawge de maga war wãyn yaŋ yoo ɓaara mbe ni mo yawla. Nen naa taʼ ga bay wa. Ama wurpo a ge yaŋ le, á baa ge wo war wãyn yaŋ go, wur sen á hẽẽ ge wo bii kway lay so.
16Jobo day sãã õõbe ma defay jag õõbe ma de tããbe gà hayga á sãã we doosen, ma defayn ngar ma de tããben go, ngarge ɓen ɓlag ge õõben go, yaɗ wer ngarge ɓe wo de pel ni. 17Jobo day ser yii maga de jiigi defay ɓi ndar bii ma de tããbe gà hayga á sern we doosen, yiin cag ndarn go, ndar day ɓlag go debaŋ lay. Ser yii maga de jiigi defay diŋ ɓi ndar bii ma defay lay, ni á wo ɓog ɓuy raw wo yaŋ laa kããra.
May mani waŋ wo de wãy ma duʼ õõbe Yeso no
(Mark 5.21-43; Lug 8.40-56)
18Yeso de wãã wããre sen ne hara deŋ ɗa, waŋ po raw nduugi, leʼ monɗra pel ɓe, raw riŋgi ɓe ga : May ɓi yaŋ le go de húulí patala, a le kaŋ doo ne hẽn ti ɗala, ni a bir yaŋe.
19Yeso raw urgi go ciŋ raw wo maŋ blam ɓe de jar ma wer ɓen wo.
20Paga wãy po yaŋ de gayge go doo yuu way wer kiŋgi hwal ti ɓog raw yaʼ ge see Yeso duʼ jag õõbe ɓen le nen faale. 21Á raw ɗiggi de ɓil ɓe ga : Hayga ndi duʼ mbi jag õõbe ɓen we tawa, ni way ɓin hoo yaŋ go.
22Yeso wo mbuɗ nen koge ɓe mokay, á raw riŋgi ɓe ga : Coɓ nen ɓo may ɓi no, hãge see ɓo ne ndin pẽẽ ndo we go. Cegèn raw men wãyn go de sen ni degaʼ tuu.
23Yeso wo nduugi liŋ ni waŋn mokay, á wo daʼ jar ʼwad síilí ma teege ɓe deŋ, ngaɓan wo de glum gi de roo deŋ. 24Á raw riŋ rage ga : Laa we le go, mayn bay de húulí wa, á leʼ diŋ naa.
Á raw wo feg ge ti ɓe debaŋ. 25Yeso raw laa ngaɓan wo go siigi laa, á raw kalge tiŋma, raw ɗaw doo may no, may raw urgi go ciŋ. 26À raw laa wããre Yeso wo go ɓi sir sen ni ɓuy.
Yeso caa nen jar rẽwre wo go ɓoge
27Yeso kal rawge, wo dayge ti ngel po jar rẽwre wo ɓog raw wo maŋ blam ɓe de ngar jag ɗe ge ɓe ga : Moo Dafid no, moo Dafid no, ko decoo wùr ɗa la.
28Yeso wo dayge liŋ mokay, jar rẽwren raw wo yaʼge see ɓe, á raw riŋ rage ga : Nday yaŋ de hã ɓil ɓay me ga ndi kãã ma caa nen ɓay go? Á raw wo fer wããre ne hẽn ga : ãã Waŋkluu.
29Yeso raw duɗ nen ɓaara, raw riŋ rage ga : Re sen mo joŋ ne nday doo hãge ɓil ɓay maga nday hãn ne ndi nono. 30Nen ɓaara raw caage go koge, Yeso raw ruu rage debaŋ ga : Coʼ we sug ɓay de el ga jobo mo joŋ nen ko re sen wa hase.
31De sen ɓuy á raw wo dus wããre Yeso go ɓi sir sen wo ni ɓuy so yaw.
Yeso wal jag je mbululum go
32De maga á wo go de laage ma rawge mokay, à raw age de je mbululum ne hẽne, werga a de sõõ ti. 33Yeso raw go nii sõõ se no, je mbululum raw tĩĩ wer wãɗ wããre. Ngaɓan raw wo ngrisgi, kal wo riŋ kããra ga : Jobo ko fen ma kay le Israyel ti boŋ gà.
34Ama Farisiyẽẽ raw wo wãɗ ge ga : Hã egre ma niɗ sõõren wo go ne hẽn diŋ waŋ sõõren wo no.
Yeso ko decoo ngaɓan wo
35Yeso raw raŋ ɓi leege ma kluurin wo go de ma kleeren wo ɓuy, had jar ɓi tiŋ tosge wo, siɗ Wããre ma de Cõõre ne jar ga Baa de hayge Waŋ ɓaara, pẽɗ jar go jag wer cege ma honla ɓuy. 36Jar se ngaɓan wo mo deŋ raw wo ko decoo nen ɓe debaŋ, werga jarn gay wo go debaŋ, kol wo go de hugli doo sããre maga je wer ɓaara bay wa nono. 37Á raw riŋ jar ma wer ɓen wo ga : Coore ma weegen debaŋ, ama jar joŋre ɓen bay wo debaŋ wa. 38Wii we Pan payn ga á mo lag jar wer coore wo le ni pa.
Currently Selected:
MATIYE 9: TUP
Highlight
Share
Copy
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.