NAHUM 1
1
1Nineveh ghenguno tungkuptsa. Elkoshmi Nahum kungunhetsü kaku.
Nineveh shou Alhou Loghu
2 Ampeu ye anhekushu eno amkhükulu Lhou;
amkhükulu eno axukighideu;
Ampeu no Pa ghümi shou amkhü lu
eno panoqo sala aloghu püa cheni.
3 Ampeu ye asheshino amloide cheni eno aküka kuloghi,
Ampeu ye khilemu pimive keu phepuwuve chemo.
Pa laghi ye miyitsü eno pasapagha lo ani,
eno khüngküsü no Pa pukhu lo ayeghimkhu ke.
4Pa no azüghi lomipi no qhaive tsü;
Pa no aghoki kümtsü qhaive tsü;
Bashan eno Carmel ye ighüyivae;
Lebanon xamunu ye ighüyivae.
5Naghutoqo no Pa zü lo itha;
atoghiqo no ayitsü shivae;
ayeghi eno tile xüküami kümtsü
khokhoshi Pa zü lo ipeghi.
6Khuu no Pa xukighide zülo puthugho luni kea?
Khuu no Pa mlokighide kushu puqhe luni kea?
Pa loghu no ami toi ghuqhi,
Pa no atuquqo mukhumuno shi kubove tsü.
7 Ampeu ye aloe,
shiluküsa tsala lo sükusho-a;
khunono Pa ije cheni keno Pa no ithi ani.
8Ikemu Pa no züqozü kije pesü
aghümi qhoi kishekhave tsü nani,
Pa ghümi hasü aküzü lo ilo nani.
9Nongu ye Ampeu shou kiu kuchughu ani kea?
Pa no qhoi kishekhave tsü nani;
aküküpna ye ghuthu akiniu ipeghimo nani.
10Kughengu panongu ye asahu küptshüpe ake toi,
shokümzümi no shopusü ake toi;
aghijini qhaive keu pitive ketoi nani.
11 Ampeu shou küsakügha kuchughu keu
ameküküha lapiyeu ye
o launo ighi ke.
12Ikehu Ampeu no pi ani,
“Panongu no kutomo eno aküka kumtoshi aghi namu,
panoqo yeqhive eno pühave nani.
I no o ghimeve aghi namu,
Ni ye o ghime kithemae.
13Eno itehi ye I no o phi lono paw kuokhasü hechheve tsüni
eno o kütsüghaqo sütha kütüta shive tsüni.”
14 Ampeu no o ghenguno azah tsüvae:
“O je ye pekishe wo pemoae;
o lhou ki lono I no asü-atu
eno ayi julho kütsave tsü nani.
I no o kumoki mla nani, kughengu no ye ameküha ke.”
15Khuu asütsa kivi pecheni eno
külakishi sheshu cheni keno,
naghuto lo chenike julo!
Ow tiqhetiniqo pini lo, O Judah;
o shoqhiqo shikupulo,
kughengu amekükühami ye khilemu o leighi kithemae;
pa ye qhoi kütsapinyivae.
Currently Selected:
NAHUM 1: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More