MARK 1
1
Baptiz Kishiu John no Ala Kutotsü
(Mt 3:1-12; Lk 3:1-18; Jhn 1:19-28)
1Alhou Nu Jisü Khristo tsakiviu ghili hukuthu.
2Tungkupu Isaiah no yepüake toi,
“Julo, I ghinikishiu khuu o laghi kutotsü nani keno
I no o züu no puwu ani.
3Yenguyi ke-a lo milakhi no ighamku ani:
‘Ampeu ghenguno ala kutolo;
Pa laghi müzüchoi shitsü lo,’”
4John no yenguyi ke-a lo baptiz shisü ighi eno axine qhitsü kepushi Alhou lau xaide ighi no baptiz shilu penike sheshu. 5Judea ghakhu eno Jerusalem lo akemi kümtsü no pa lau wuche eno pano xine piphe kelo pa no Jordan ghoki lono panoqo baptiz shitsü cheke. 6John ye sayeshi#1:6 Momu camel mhi phimini pepu, ashiyiko pokha pesü pa chita vehopu eno leusü ngo aghalo khingozü chuche. 7Pa no ishi kütsü, “I thiu khuu cheni keno, pa ye I nguno akumtou kehu ni ye itsaqi no pa pukhukuqho kighi mu kuqho küzüpu kumoe. 8I no azü pesü nongu baptiz shive tsüae, ikemu pa ye Aghungu Kimthe pesü nongu baptiz shitsü nani.”
Jisü Baptiz Shilu
(Mt 3:13-4:11; Lk 3:21-22; 4:1-13)
9Tipa ghuloki lo Jisü ye Galilee qhalo Nazareth lono chesü ighi no Jordan ghoki lono John no baptiz shive tsü. 10Kughou Jisü no azü lono ithughi keno, paikhavi atsütsü khaqhi keu pa no ithulu eno Aghungu no miqhedu toi iqighi püzü pa shou ngove. 11Eno atsütsü lono asütsa lakhi ighi, “No ye I qhuu I Nu, O jupe I mloqi cheni.”#Lesh 2:7; Isa 42:1
12Paikhavi Alhou Ghungu no pa hape yenguyi ke-a lo puwuve. 13Eno pa ye yenguyi ke-a lo atsala lhobidi Satan no ghuju ae. Tilau pa ye tüghashiqo gholo ae, eno Alhou ghinimi no Pa jukuto kheae.
Jisü Kümla Hukuthu
(Mt 4:12-22; Lk 4:14-15)
14John kügha luve kethiu Jisü no Alhou tsakiviu pesü Galilee lo asheshu ighi, 15“Ado ye kupuvae, eno Alhou yekipe ye kupunuvae, xaidelo eno atsakiviu pülü lulo.”
16Jisü no Galilee Züghi mxüsü wuche kelo akhakükhami Simon ngo pa thiküzüu Andrew pama akhame pesü azükutho lo vesü cheghi keu ithulu. 17Jisü no pama vilo pi, “I papelo, I no nongu pesü timi kükhami shipeni.”#Mt 4:19 18Paikhavi pama no akhame qhive no pa pape wuve. 19Tishino khitohi kumo lo, Jisü no Zebedee nu James ngo pa thiküzüu John pama ashuka lono akhame pukho aghi keu ithulu. 20Pa no kukhavi pama no ashuka lo aqekiqemi gholo pama papu Zebedee qhive no pa pape wuve.
Tüghaküsa Shou Jisü Kükagha
(Lk 4:31-37)
21Panongu no Capernaum lo wuve, eno Sabbath tsalani Jisü no sinagog lono kütsü ae. 22Pa kükütsü chilu no timiqo ye akümzave, kughengu pa no Ayezah shikükami toi mono kükagha akemi toi kütsü ke. 23Züleno tüghaküsa no peitha akeu timi lakhi sinagog lo aghi püzü pa no igha ithughi, 24“O Nazarethmi Jisü, no ye ningu lau kiu shikepu ani kea? No ye ni kütsave niye ighive akeshea? Ni ye no khuu keno ithi ani—Alhouw Akimtheu ke.” 25Ikemu Jisü no pa ghasüve no pi, “Inaqhoive lo, eno pa lau no ipeghive lo!” 26Tüghaküsa huno timi phiau sükütsüpe sükuchoqhi püzü asütsa kuloghi shi igha no pa launo ipeghive. 27Ikelo timi kümtsü no akümzave püzü panoqo dolo ishi ighiju kile, “Hi ye kiu kea? Kükagha pesü akükütsü kithe tsü ani nokua! Pa ye tüghaküsaqo ghi azah tsü ani, eno tipaqo ghi pa gholu anie.” 28Paikhavi no Galilee eno ti sümxape akeu qha kümtsü lo pa juaje kügha wove.
Jisü no Timi Kutomo Shipivi
(Mt 8:14-17; Lk 4:38-41)
29Tithiu Jisü no sinagog qhive no mtazü James ngo John pama sasü Simon ngo Andrew kilo ilove. 30Tipa tüqhüdo lo Simon pani ye aghamki püzü azüa lo akehu timiqo no mtazü li vehu pesü Jisü vilo pi. 31Ikehu pa no ighi no li u tsüqüpe sünhe puthu kelo paikhavi aghakimki no li launo wuve, eno li ye timiqo loji thuve.
32Tipani avelau kughou khetsünhe ilove keno, timiqo no küsükinimi ngo tüghaküsa no ghime akeqo kümtsü sasü Jisü lau ighi. 33Eno aphughi lo küxümi aqha no aki khala lo kumqo luve. 34Ikehu pa no aküsü jeli xapusü akemi kutomo shipivi tsü, eno tüghaküsa kutomo hapheve tsü. Ikemu pa ye tüghaküsaqo pelo atsa pilu pemoe, kughengu panoqo ghi pa ithi ake.
Jisü no Galilee lo Kütsüwu
(Lk 4:42-44)
35Thanau tsükutho lau Jisü no itheno ithuve no züghüi aphi lono yenguyi ke-a lo wuve, eno tilauno inikhue. 36Ikemu Simon ngo pa qomi no Jisü phuche 37kehu pa ithulu kelo panoqo no pi, “Kümtsü no o phu cheni.” 38Jisü no panoqo khochile, “Aphughi kütau akupunu lo akeqo lo ghi ni ye asheshu masa anike ningu wuni nolo, kughengu ni ye ti ghenguno hilau ipeghive ake.” 39Tishino pa no Galilee qha kümtsü lo wuno sinagog lono kütsü eno tüghaküsaqo haphe.
Jisü no Apüghami Shikimthe
(Mt 8:1-4; Lk 5:12-16)
40Ado hami thiu apüghami lakhi no Jisü lau ighi no qhoqhünhe pe tsüikhomo pa qhüiniju, “Nono pulo aye no ye I shikimthelu nani.” 41Jisü no amloighive no pa u chhope apüghami bu püzü pi, “Ni ye pulo ani, mithe luvelo!” 42Paikhavi no pa philo apügha kühave, eno pa ye mithe luve. 43Jisü no mtazü pa hapuwove ghi tsatsai pa ghutu, 44eno pi, “Khuu vilomu kiu tsa mu pi kevilo. Ikemu wuno o mpi pesü achineu piyelo, tishino o shikimthe luve keu ghenguno timi zülo thopi shi kepushi Moses no azah tsü ketoi akümllagho tsülo.” 45Ikemu pa no wuve no hipa tsa zaleuve eno pikülha thuve, ikehu hipa thiu Jisü ye aphughi khalau yenguyi ke-a lo kumo aye pekiphe shi aphughi lo ilo mlave, ikemu timiqo no akuaqha lono pa lau ighi.
Currently Selected:
MARK 1: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More