MICAH 2
2
Nedaqoda kemi Hasapu
1Khunono küsakügha kuchughu
eno pano lüpa lono alhoksa shicheni keno ahasapue!
Kughou no tsütho ipeghini keno panongu no tishi cheni,
kughengu pano u lo tishilu kepu küka anike.
2Panongu no aluzaqo mine eno süxa luve cheni,
eno akiqo süxa luve cheni;
timi kibolomi nedaqoda cheni,
eno pano mheghi luvetsü cheni.
3Tighenguno Ampeu no piani:
julo, Ni ye akibo hipau shou amhekiqi kughupe ani,
tipau lono nongu xaphemla nani,
eno nongu no aqheküzashi ala chemove nani,
kughengu ti ye amhekiqi doke.
4Tipani panongu no nongu müsü kutho keu le phe
eno kukhukimji shi qa nani,
eno, “Ningu ye shishe kütsavae;
Pa no Iw timi saje kilive tsüae;
kishi Pa no I launo ti ikhipe wuvetsü akelae!
Pa no ni luzaqo pesü pülümo kemi tsüvae,” ipi nani.
5Tighenguno nongu ye Ampeu hoho lo asaqhini
kemi khumu kühave nani.
6“Kütsü kevilo”—panongu no ishi kütsü cheni—
“hipa vehu kütsü kepu kumoe;
akukujo ye ni züthave mo nani.”
7Hitoi pi kepu keshea, O Jacob laghami?
Ampeu ye kutuumla aya keshea?
Hipaqo ye Pa kümla keshea?
I tsapi ye müzüchoi cheche kemi
lau akivi shilu chemo keshea?
8Ikemu anileshi Iw timiqo ye aghümi toi ithughi ani;
khunono aghü shinike kümsümo#2:8 Momu “aghüshi lono idewo chekeqo” no pükhübe qhiyi
cheni keno tipaqow amekusho
phimini nongu no xaluve tsü.
9Nongu no Iw timi totimiqo
pano lokughuno ki lono eno
pano tianuliqo launo hapheve,
eno alholo ghenguno I juküvü pewuve tsüae.
10Ithu no wuvelo, kughengu
hi ye akulhokiqhi-a kumoe,
mithekumo khikhino shishe kütsakungo cheni keno
tipau ghenguno ke.
11Tsala timi lakhino akimki eno pishikiqhi lono,
“I no atsaiji eno aji kümka ghili kütsüni,” ipi cheghi aye,
pa ye timi hipaqo ghenguno akükütsüu shinani!
12I no mtsüqheino nongu kümtsü hekütsü nani, O Jacob;
I no Israelmi ghükulumi hekütsü nani;
Aqokitikhi mbumghu keu no
achu kümza-a lo ambeloji toi,
ambeqo sasü aki lo hekütsü ketoi
I no panoqo hekütsü nani.
13Khuu no ala kophetsü keno Pa no panoqo züu wunani
panongu no khagho hepho
ipeve no ti heche wuve nani.
Panongu kükau no pano züuno ti heche wunani,
Ampeu no pano kütsü shi nani.
Currently Selected:
MICAH 2: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More