MICAH 1
1
1Jotham, Ahaz eno Hezekiah noqo no Judah lo kükami shiake ghuloki lo Moreshethmi Micah lau Samaria eno Jerusalem ghenguno Ampeu tsa ighi.
Kütsakungo Chekeu
2Inilo, nongu ashiaye kümtsü;
amlo tsüqhiyilo, O ayeghi, eno tile akeqo kümtsü,
Ampeu Alhou pelo Pa kimthe chineki lono
nongu shou thopi shipelo.
3Kughengu julo, Ampeu ye Pa kungo-a lono cheni,
Pa no iqighi no ayeghi lo qhemghaike-aqo neda nani.
4Ami lono aghügha kümlave keshi naghutoqo no
Pa zülo mlaghubeive nani,
kunguu no azü peleqhi akeshi
akhilaqo no iko ipeghive nani.
5Hi kümtsü Jacob xine eno
Israel lagha xine ghenguno ke.
Jacob xine ye kiu kea?
Ti ye Samaria ke kumo?
Eno Judah kuchuqu-a ye kiu kea?
Ti ye Jerusalem ke kumo?
6Ikehu I no Samaria pesü xine-xigha pekilepu-a shive tsüni,
atsaibo shokepu-a shive tsüni,
eno li tuquqo pesü akhila lo kulu piqive tsüno
li boqhaqo xaleve tsü nani.
7Li julho shisü keu kümtsü hephopinyive tsü nani,
li jume kümtsü ami lono pitive tsü nani,
eno li julho kümtsü I no kütsaleve tsü nani,
kughengu li no kütüqha keu jume kütsüpe qhi kehu,
li ye kütüqha keu jume lau idewove nani.
8Hi ghenguno I no mloqani;
I no aphimini xave no aphikümsa shi iqhoiqini;
I no aghalo tsü toi amloijuni,
eno ostrich#1:8 Ostrich ye aghau lakhi je toi mloqani.
9Kughengu li zaku ye shipivi kümlapu shivae,
eno ti ye Judah lau ighivae;
tipau ye Iw timiqow khagho
eno Jerusalem tovae.
10Gath lo tipau pi kevilo
khilemu mloqa kevilo;
Beth-le-aphrah lo
ayeghimkhu lo ihozü lo.
11Shaphir lo küxümiqo
aphikümsa eno akukujopu
shi nongu la lo chechelo;
Zanaan lo küxümiqo
khalau ipeghi kevilo;
Beth-ezel kumlo no nongu-a ghi
sükusho kühavae pi ithipe nani.
12Kughengu Maroth lo küxümi no tinhemgha
ghenguno kütakihi ngokhe ani,
kughengu Ampeu launo amhekiqi
Jerusalem khagho lo ighivae.
13Lachish lo küamiqo, khurshi
pesü khurkulu lo tsüghada lo;
kughengu tino Zion limi shou
axine hukuthu ke,
kughengu Israel xine ye
o launo ithulue.
14Tighenguno Moresheth-gath lau nongu ye
kütüta shivekeu gho tsüni,
Israel kükamiqo ye Achzib lo
küami no pishiqhive nani.
15Nongu Mareshah lo küami lau
I no itaghi tokuluu saighi nani;
Israel jekipimi ye
Adullam lo itshü nani.
16Nongu züküvüpu tianuliqo
ghenguno nongu kütsüsa tsave no boghesho shivelo;
alhuqu lakhi toi miyeboive lo,
kughengu panongu ye nongu launo haphe sawuve nani.
Currently Selected:
MICAH 1: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More