MATTHEW 4
4
Jisü Ghuju
(Mk 1:12-13; Lk 4:1-13)
1Tishino Jisü ye ghukujuu pelo ghukeju penike Aghungu Kimthe no sasü timi yenguyi ke-a lo wuve. 2Putho pucho tsala lhobidi kümvüve kethiu pa ye müzüthive. 3Tileno ghukujuu no ighi no pa vilo pi, “Nono Alhou Nu shiaghi aye, atu hipaqo pesü asho kughulhoveni keu za tsüju lo. 4Ikemu pa no khochile, ishi yepüani,
“Timi ye achuqupu vecheo likhino xülumo nani,
ikemu Alhou kichi lono atsa ipeghi keu vecheo ke.”#Zak 8:3; Jhn 4:34
5Tishino tüghami no akimthe phughi lo pa sawu eno achineki kütsüqa lo ngope 6eno pa vilo pi, “Nono Alhou Nu shiaghi aye, hileno ilheqive lo, kughengu ishi yepüani,
‘Pa no o ghenguno Paw kungumi hapuwu nani,’
eno
‘O pukhu no atu lo püsü pukulu
nosa kehu panongu u lono o khapeqhe luve nani.’”
7Jisü no pa vilo pi, “Itaghi ishi yepüani, ‘No ye o Mpeu o Lhou ghuju kevilo.’” 8Itaghi, tüghami no pa sasü ighono chuqumghai keu naghuto lo wuno ayeghi lo kükaqha eno tipaqo jekipi kümtsü pa piye. 9Eno pi, “Nono itsaqi no I mllave aye, I no hi kümtsü o tsüveni.” 10Tileno Jisü no pa vilo pi, “Chevelo, Satan! Kughengu ishi yepüani,
‘No ye Ampeu o Lhou mlla lo
eno pa likhi huthu lo.’”
11Tithiu tüghami no pa qhive, eno julo, kungumi no ighi no pa huthu auve.
Jisü Kümla Hukuthu
(Mk 1:14-15; Lk 4:14-15)
12Kughou John küghape akughu shivae pikeu Jisü no chilu keno, pa ye Galilee lo idewove. 13Pa ye Nazareth qhive no Zebulun ngo Naphtali lughi kikime lo Capernaum, ti ye Galilee züghi mkülo achekeu, phughi lo wo xüsüve, 14tishikeu lono Isaiah tungkupu no kiu pipüa keno shikupu niye ke:
15Zebulun ngo Naphtali yeghi,
azüghi kuwula lo, Jordan tüxau akeu shiyeqow Galilee#Isa 9:1-2
16aküzü lo ache keqo no
aküvü kije ithuluvae,
eno akithi yekükhü qholo ache keqo ye aküvü no ipeghi
no panoqo shou yepüvü luvae.#Isa 9:1; 42:7
17Hipa ghuloki lono huthusü Jisü no ishi kütsü thuve, “Xaidelo, kughengu kungugha yekipe ye kunupu khoivae.”
Akhopemi Atüghümi Kulu
(Mk 1:16-20; Lk 5:1-15)
18Tithiu Galilee züghi mkülo chekelo Jisü no akhakükhami athiazü kini, Simon (khuu Peter ipi cheni keno) eno pa thiküzüu Andrew pama, akhame pesü azüghi lo akha vecheghi keu ithulu. 19Pa no pama vilo pi, “I papelo, eno I no nongu pesü timi kükhami shipeni.” 20Paikhavi pama no akhameqo qhive no pa pape wuve. 21Tileno wuche kelo Jisü no athiazü kütami kini, Zebedee nu James ngo pa thiküzüu John pama, ashuka lo apu sasü akhame pukho aghikeu ithulu kehu pa no pama ku. 22Pama no paikhavi no ashuka ngo pama papu qhive no pa pape wuve.
Aqokitikhi Kije lau Mla
(Lk 6:17-19)
23Jisü no Galilee qha kümtsü lo wuno sinagog lono timiqo shika, kungugha yekipe tsakiviu pesü sheshu, eno aküsü aghime jeli kümtsü shipivi tsü. 24Ikehu pa jekipi ye Syria qha kümtsü lo veküpha wove, eno küsükinimi, aküsü jeli xapusü ime akemi, tüghaküsa no ghimeqhi akemi, kiligha kipemi, aphiau kithimi kümtsü pa lau saghi no pa no panoqo shipivi tsü. 25Tileno Galilee, Decapolis, Jerusalem ngo Judea lo akemi, eno Jordan tüxau akemi aqokitikhi kije no ighi no pa pape wuve.
Currently Selected:
MATTHEW 4: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More