MATTHEW 3
3
John no Ala Kutotsü
(Mk 1:1-8; Lk 3:1-8; Jhn 1:19-23)
1Tipa ghuloki lo Baptiz kishiu John no Judea lo timi küghünamo ke-a lo sheshu ighi, 2“Xaidelo, kughengu kungugha yekipe ye kupunuvae.” 3Kughengu khaghi Isaiah tungkupu vecheo ishi pikeu ye pa ghenguno ke,
“Yenguyi ke-a lo milakhi no ighamku ani:
‘Ampeu ghenguno ala kutolo;
pa laghi müzüchoi shitsülo.’”
4John ye sayeshi#3:4 Momu camel. Asayeqha lo achekeu lhoxü kehu sayeshi mhi phimini pepu eno ashiyiko pokha pesü pa chita khapu, eno leusü ngo aghalo khingozü no pa chuqupu shiche. 5Jerusalem ngo Judea qha eno Jordan sükümxa kümtsü lo ache kemi no pa lau shesü wuche, 6eno panoqo xine piphe kelo pa no Jordan ghoki lono baptiz shitsü che.
7Ikemu kughou pa no baptiz tsüchekeu-a lo Phariseemi ngo Sadduceemi kutomo ighikeu ithulu keno, panoqo vilo pa no pi, “Nongu tüghükupu pighitiqo! Khuu no nongu ye Alhou loghu chekeu lono poluve nanie pi kütüghü kea? 8Aküxü xaidelu keu michipu shi axathi pithilo. 9Eno kümsükuju lono, ‘Abraham no ningu papu,’ ipi nongu ampi vilo kevilo, kughengu I no nongu vilo piani, Alhou ye atu hipaqo mu pesü Abraham tianuli shi saputhulu nani. 10Itehi mu amüghü ye asübo philo qhipüani, eno axathi kivi pithimo keu sübo ye yeqhipe ami lo vesüve nani.
11“Aküxü xaide penike I no azü pesü nongu baptiz shitsüe, ikemu I thiu khuu cheni keno, pa no I nguno akumtou, eno pa pukhukuqho mu ni ye peküzüpu kumoe. Pa no Aghungu Kimthe eno ami pesü nongu baptiz shitsü nani. 12Pa ye athi gholono amuu kütashi fuleve no pa niqa shikimtheve nike pa u lo aphighi pe ani, eno pa no pa thi pekütsüpe ale lo süve nani, ikemu amuu ye pa no ghapinhe kümlapu mi lono pitive nani.”
Jisü Baptiz Shikulu
(Mk 1:9-11; Lk 3:21-22)
13Tithiu Jisü ye John pelo baptiz shitsü penike Galilee lono Jordan lo ighi. 14John no pa lakha ghi pi, “Nou no ni baptiz shitsü kelau thono no ye I lau ighi ani keshea?” 15Ikemu Jisü no pa khochile, “Itehi ye tishive aghilo, kughengu Alhou lopu shiluni keu mikucho kümtsü shikupu tsükeu ye ningu ghenguno achipi ke.” Tileno John no pulove tsü. 16Kughou Jisü baptiz shitsü keno, paikhavi pa no azü lono ithughi kemtsa, julo, atsütsü pa lau khaqhitsü, eno miqhedu no yewu chekeshi Alhou Ghungu iqighi no pa shou ngove keu pa no ithulu; 17eno atsütsü lono asütsa lakhi no pi, “I qhuu I Nu, khuu lau I no amlokiqi shicheni keno, hi cheni.”
Currently Selected:
MATTHEW 3: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More