MATTHEW 17
17
Ajuhi Kikili
(Mk 9:2-13; Lk 9:28-36)
1Atsala tsügho thiu Jisü no pa gholo Peter eno James ngo John pama athiazü sasü panongu likhi naghuto kuchuqu lo iqho. 2Eno panoqo zülono Jisü ye ajuhi kilive, pa gino khetsünhe toi vüqaive eno pa phimini no aküvü toi metsüghoive. 3Tileno Moses ngo Elijah pama no panoqo lau ipeghi eno Jisü sasü küptsa. 4Ikelo Peter no Jisü vilo pi, “Ampeu, ningu no hile aghi keu ye alovae; nono pulo aye, I no hile apusho küthü shini, lakhi no o ghenguno lakhi no Moses, eno lakhi no Elijah ghenguno.” 5Pa no pi aphi lono julo, vüqai keu khüngküsü no panoqo küzüpho luve eno khüngküsü lono asütsa lakhi no pi; “Hi ye I nu I qhuu, pa lau I mlokiqi acheni; pa tsa inilo.” 6Kughou akhopemi no hi chilu keno panongu ye thüghüive no panongu gi pishiqhope itsaqive. 7Ikemu Jisü no ighi no panoqo bupüzü pi, “Ithulo, eno msa kevilo.” 8Panongu no jupuku kelo Jisü likhi thono khumu ithumlave.
9Panongu no naghuto lono iqiche kelo, Jisü no pano küthü vilo azah tsü, “Akithi lono Timi Nu xüputhu moke kutolo khuu vilomu kungunhetsü pi kevilo.” 10Akhopemi no pa vilo iniju, “Imaye kushiye Ayezah shikükami ye Elijah paghi ighi masae picheni kea?” 11Pa no khochile, “Elijah ye cheni eno pa no thokha athoputho tsü nani. 12Ikemu I no nongu vilo pi anike Elijah ye ighivae, ikemu timiqo no pa ithimo no pa shou kiu shinishi keno shike. Tihutoi Timi Nu ghi mtsüqheino panoqo u lono ime nani.” 13Tileno pa ye Baptiz kishiu John ghili pesü piani kepi akhopemi no ithive.
Itimi philo Tüghami Haphe
(Mk 9:14-29; Lk 9:37-43)
14Kughou panongu no aqokitikhi lau ighi keno, timi lakhi no Jisü zülo ighi no qhoqhünhe 15eno pi, “Ampeu, I nu kimiyekütü tsülo, kughengu pa ye kilighape cheni eno shishe ime acheni. Ghuthu kutomo pa ye ami eno azü lo ilulove cheni. 16I no pa sasü o khopemi lau ighi kemu panongu ye pa shipivi mlave.” 17Jisü no khochile, “Nongu aküpülü küküha eno chighichilai keqo, ni ye khitohi nongu sasü amasa kea? Ni ye khitohi nongu gholo anani kea? Pa sasü hila ighilo.” 18Eno Jisü no tüghami lomipi kelo tüghami no pa launo ipeghive no itimi huye paikhavi shipivi luve. 19Tithiu akhopemi no lomoshi Jisü lau ighi no pi, “Kushiye ningu ye haphe mlave kea?” 20Pa no panoqo khochile, “Nongu küpülü mikhelo kehue. Kughengu kuchou no I no nongu vilo piani, nongu no aghanethi qhemi likhimu aküpülü aghi aye, nongu no naghuto hipau vilo, ‘Hileno iqesü hule wuvelo’ ipi kelo, tino iqewuve nani, eno nongu ghenguno shikümlapu kiumu küha nani. 21Ikemu akighini ngo kümvü keu likhino thono kiu nomu shimlae.”
Jisü no Akiniu Pa Kithi Vehu Pi
(Mk 9:30-32; Lk 9:43-45)
22Panongu no Galilee lo kumqope akelo Jisü no panoqo vilo pi, “Timi Nu küghape timiqo u lo süve tsüniye shivae, 23eno panongu no pa pithive nani, ikemu atsala aküthüni pa ye xüputhuve nani.” Ikelo akhopemi ye shishe amlo ijuve.
Achineki Süqha
24Kughou panongu no Capernaum lo ighi keno, asüqha küqhami no Peter lau ighi no pi, “Nongu shikükau ye asüqha tsü chemo keshea?” 25Peter no pi, “Tsüchenie.” Kughou Peter no aki alou iloghi keno, Jisü paghino pa pütsa no pi, “Simon, no ye kishi kümsü ania? Ayeghi lo kükamiqo ye khunoqo launo zame momu asüqha lucheni kea? Pano ghakhumi launo keo inami launo kea?” 26“Inami launoe,” ipi Peter no khochile kelo Jisü no pa vilo pi, “Imaye aghakhumi ye tsümo kepuke. 27Tishimu timi hipaqo püxa monike ghenguno azüghi lo wuno akha kümsüpuyi vesülo, eno akha müsülu tüghüu sünhephe no tipau kichi sükhoju aye nono pisa muno ithulu nani. Tipau ikhilu no I ghenguno ngo nongu ghenguno asüqha panoqo tsüvelo.”
Currently Selected:
MATTHEW 17: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More