HAGGAI 1
1
Achineki Shikitheni keu Za
1Akükau Darius yepe mpe akiniu, aqhi akütsüghou, atsala atüghüu lo Haggai tungkupu vecheo Ampeu tsa Judahw Angh, Shealtiel nu Zerubbabel, eno Jehozadak nu achinetou Joshua lau ighi: 2“Aqokitikhi Mpeu no pi ani: Timi hipaqo no Ampeu ki shiqhe kitheni keu do tomphie piani.” 3Tileno Haggai tungkupu vecheo Ampeu tsa ighi, 4“Imaye hi ye nongu ampi no aki kivi lo ngono Ampeu ki huno ixapinyi apeni keu ghuloki keshea? 5Tighenguno, itehi aqokitikhi Mpeu no piani: Nongu laghi chhejulo. 6Nongu no kutomo xusü kemu aghulo likhi ghile hulue. Nongu no chucheni kemu lukümkha kühae;#Hos 4:10 nongu no sho cheni kemu aghapiqilu chemoe. Nongu no pepu mini cheni kemu khunomu lüvüilu chemoe. Eno khunono aqe qelu cheni keno pewo süqhu küixü lo süve chenie.
7“Ikehu aqokitikhi Mpeu no piani: Nongu laghi chhejulo. 8Atoghi lo iqho no asü pewo Achineki shiqhelo, tishi aye I no aloqilu eno I juküvüpu shilu nani, Ampeu no pi. 9Nongu no kutomo laju akemu julo, aghulo likhi ghile huke. Eno kughou nongu no aki lo xapughi keno, I no fuleve tsü. Kushiye kea? ipi Aqokitikhi Mpeu no asheshu. Kughengu nongu lakhikhi no pütüta kilo mighimghai auve kelo I ki ye ixapinyive kehue. 10Tighenguno nongu sholo atsütsü no atsüzü süchilevae, eno ayeghi no pithilu pemovae. 11I no züha pesü ayeghi ngo atoghiqo shou pukuvae, athi, atsaizü kithe, thazü, ayeghi lono ipeghi chekeu, timi eno tüghashi, eno panongu kümla kümtsü shou pukuvae.”
Timiqo no Ampeu Gholu
12Tileno Shealtiel nu Zerubbabel ngo Jehozadak nu achinetou Joshua eno ghükulumi kümtsü no Ampeu panongu Lhou no puwu ketoi tungkupu Haggai tsa eno Ampeu panongu Lhou sütsa gholu. Eno timiqo no Ampeu sümsa. 13Ikehu Ampeu tsapeu Haggai no timiqo vilo Ampeu tsa pesü pi, “Ni ye nongu gholo ani, ipi Ampeu no sheshu ani.” 14Tileno Ampeu no Judahw Angh Shealtiel nu Zerubbabel ngo Jehozadak nu achinetou Joshua, eno ghükulumi ghungu xukuthove tsü. Eno panongu no ighi no panongu Lhou, aqokitikhi Mpeu ki mlathuve, 15ti ye akükau Darius yepe mpe akiniu, atsala muku abidiu, aqhi akütsüghou lono ke.
Currently Selected:
HAGGAI 1: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More