HAGGAI 2
2
Achineki Jukighilepu Chekeu
1Aqhi akütsüniu, atsala muku-aqhaqhiu lo Ampeu tsa tungkupu Haggai vecheo ighi: 2“Itehi Judahw Angh Shealtiel nu Zerubbabel ngo Jehozadak nu achinetou Joshua, eno ghükulumi kümtsü pütsa no pilo, 3‘Nongu gholo püzüu chineki jukighilepu hipau ithulu püakemi khuu aphi kea? Itehi ye hipau kishi ithulu ani kea? Nongu nhethe lo hi ye kiumu kumphi kekumo? 4Tishimu mtolo, O Zerubbabel, Ampeu no asheshue. Mtotoi lo, O Jehozadak nu achinetou Joshua. Mtotoi lo, nongu ayeghi lo akemi, Ampeu no asheshue. Mlalo, kughengu Ni ye nongu gholo ani, aqokitikhi Mpeu no asheshu, 5kughou nongu no Egypt lono ipeghi keno tileno I no nongu sasü puloshoqhi shikeu kiqi lono ke. I Ghungu no nongu gholo ani, msa kevilo. 6Kughengu aqokitikhi Mpeu no pi: Itaghi ado hami thiu, I no atsütsü ngo ayeghi, eno azüghi ngo qhaike yeghi süküthü nani. 7I no shiye kümtsü süküthü nani, tishikeu lono shiyeqo küakini kümtsü ighi nani, eno I no ajuküvü pesü aki hipau shepichhi nani, ipi aqokitikhi Mpeu no piani. 8Ghükayi eno ameshoyi ye Iw ke, aqokitikhi Mpeu no sheshu. 9Achineki hipau ye püzüu nguno akiqheu jukighilepu shi nani, aqokitikhi Mpeu no pi. Eno hipa-a lono I no aloino keu tsü nani, ipi aqokitikhi Mpeu no asheshu.’”
Kitiqeve keqo ghenguno Kükümgha
10Darius yepe mpe akiniu, aqhi atokuu, atsala muku abidiu lo Ampeu tsa tungkupu Haggai vecheo ighi, 11“Aqokitikhi Mpeu no ishi piani: Achinemi vilo Ayezah ghili inijulo: 12‘Tsala milakhi no pa phimini lo akümlla shi leqhi süpe cheghi no tipau pesü asho, akulho, aji, thazü, momu achuqupu kiu kiumu dilu aye ti ye akimthe shive cheni keshea?’” Achinemi no khochile pi, “Moe.” 13Ikehu Haggai no pi, “Tsala akithi kumo dilu keu vecheo mithe move keu timi no hipaqo kiu kiumu buve aye, ti ye mithe move cheni keshea?” Achinemi no khochile pi, “Ti ye mithe move cheni.” 14Tile Haggai no khochile, “Ampeu no sheshu ani, timi hipaqo ghi titoi ke, shiye hipau ghi I zülo titoi, eno pano u lo kümlaqo ghi tishie. Panoqo no kiu pe mlla keno tighi mithekumo ke. 15Tishiaye, ishi no huthusü chhejulo, püzüu Ampeu Chineki shiqhe mphi züu, 16nongu ye kishi ache kea? Kughou milakhi no akimghi muku pekütsü püa keno, tile chighi likhi aghive. Kughou milakhi no atsaizü tughuko lo akimghi lhopungu shophe niye ighi keno, tilehi muku likhi aghive. 17I no nongu eno nongu no aghimeshi mlaphe keqo kümtsü akhumu, akughumho eno mürasü pesü kütsave tsü, ikeghi nongu ye I lau ideighi moe, ipi Ampeu no asheshu. 18Ishi tsala, muku abidiu aqhi atokuu, hipau lono huthusü chhejulo. Ampeu Chineki boqha ghoke tsala lono chhejulo: 19Ale lo itaghi athi aphi keshea? Mtsüqheino atsaibo, mububo, khaghatubo eno olivebo ye kiumu pithi move ke. Ikemu atsala hipau lono huthu no I no nongu kümghatsü nani.”
Amchipushi Zerubbabel Kishelu
20Tipa qhi atsala muku abidini Ampeu tsa Haggai lau akiniu ighi, 21“Judahw Angh Zerubbabel pütsa no pilo, Ni ye atsütsü ngo ayeghi süküthüni cheni, 22eno kükalakhüqo ikhiveni cheni. Ni ye shiyeqo kükaqha kumto kütsa niye ani, eno khurkulu ngo tile chekemi tukulu niye ani. Khurshi eno khurshimi kümtsü pano thiküzümi zütakikihi lono ikiqive nani. 23Tipani, aqokitikhi Mpeu no asheshu, I no no ikhilu nani, O Shealtiel nu I qeu Zerubbabel, eno o pesü jedapu nguthi toi shitsü nani, kughengu I no o kisheluvae, aqokitikhi Mpeu no asheshu.”
Currently Selected:
HAGGAI 2: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More