HABAKKUK 1
1
1Tungkupu Habakkuk no ithulu keu tungkuptsa.
Habakkuk no Muchho
2O Ampeu, ni ye khitohi kuphutsü peniye ighamkuni,
eno Nono chilu tsümo nani kea?
Momu O vilo “Ngukangugha!” lono xalu lopi keghi
Nono xalu tsümo nani kea?
3No ye kushiye I pelo kixikila ithulupe, eno Nou no
inaqhoi pimi keu ju ani kea?
Kütsakungo eno heqhi buqhi keu no I phivilo ani;
Kumgho kütsala keu ipeghi anie.
4Ikehu ayezah ye avehu shimovae,
eno kuchou xakütha ye kühavae.
Kughengu kixikilami no achipiu mikuchomi süho luve akehu
kuchou xakütha ye tuchighivae.
Ampeu no Khochile
5“Shiyeqo gholo juno ithulu lo;
akichiqhi eno akümzaqhiyi lo.
Kughengu nongu vilo pi namu pülü moni keu kümla lakhi
I no nongu ghuloki lo shinani.
6Kughengu julo, hu kukhukimji eno ngosükümla shiye
Chaldeami I no puthu ani,
panongu ye panow kumomu süxa
luveni ye ayeghiqha xü cheni.
7Panongu ye kümsa kimshipu ke;
panongu ye pano pulou lono ayezah eno ajuaje pecheni.
8Panow khurshiqo ye angshuu amikhiu#1:8 Momu akhighiu ngushuu nguno akümthüu,
avela tineqo nguno ayiküsau;
panow khurshimi no kushuo
lono kokoshi ighi; panongu no
tsüqhini ke alhuqu toi yesü ighi.
9Panongu no heqhi buqhini ke
azüu shesü hue. Panongu no
asaye jehi timi küghaluve.
10Panongu no kükamiqo phimo,
eno yepemiqo junuqhi.
Aliwo kümtsü panongu no junu,
kughengu panongu no ayeghi xapuwo amoqhe no leluve.
11Tishino panongu no amülhü toi jolesü ighi no wuve,
küqüve kemi hipaqo ye pano kumto no pano lhou ke!”
Habakkuk Kumchho Akiniu
12O Ampeu I Lhou, Iw Akimtheu,
No ye pülhapuju acheni kekumo kea?
Ningu ye thimo nani.
O Ampeu, Nono küghatha nike panoqo süsüe,
O Atuqu, Nono sakiyini ye panoqo puthuphe ke.
13Ow tsüghükhüi keu nhethi ye alhoksa eno akumou
shou jupukulu chemoke kushiye
thekuchumi shou inaqhoi jupuku, eno küsaküghami no pa
nguno amikuchomi munove
kelo iqünhei ngove cheni kea?
14Azüghi lo akha toi, eno itikiche lhoxüqo no yepeu
küha ketoi Nono timiqo mlae,
15Aghümi huno akha kümsüpuyi
ngo akhame pesü panongu kümtsü sünhephe; panoqo
hakütsüpe ghokütsü keu-a lo süve;
eno pa ye alovi eno amloqi ani.
16Ikehu pa no aghakishi pesü pa khame tsü eno akümllagho
pesü ghokütsü keu khame tsüe;
kughengu tipaqo vecheo pa ye tule-pele xüani,
eno pa chuqupu ye nibonilei anie.
17Imaye pa ye pa khame kümsashi kuthole auve eno alholo
kimiyemo mithe shiyeqo ghiqhi auve nani keshea?
Currently Selected:
HABAKKUK 1: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More