HABAKKUK 2
2
1Ni ye I ghukhe-a lo ngoluveni
eno qogheki lo iku ngono Pa no I vilo kiu pini keno
khejuni, eno I kumchho ghenguno
ni ye kiu khochileni keno juni.
Amikuchomi ye Aküpülü lono Xünani
2Eno Ampeu no I khochile:
“Atulupha shou kungunhetsü
mtsümishei yepuku lo, tishino
philu kemi pelo pove pelo.
3Kughengu ti ye kimshilu kepu do khe ani; ti kishekhani
keu ye pai ighive nani, ti ye mikimo nani.
Tsala tino asheshive namu khelo;
ti ye süpushuve mono mtsüqheino ighi nani.
4“Julo, pa ngulho ye aqheküzae; pa ye akümzümi kumoe,
ikemu achipiu-mikuchomi ye aküpülü lono xü nanie.
5“Tinguno alau, aji ye thekuchuue, akuchhomami lakhi ye
khilemu akulhoqhilu chemoe.
Pa lakimne ye Kithigha#2:5 Hebrew lo Sheol toi thonhei; akithi toi pa ye
khilemu aghaqive chemoe.
Pa no shiye kümtsü pa lau hekütsü eno ashiaye kümtsü
paw toi hekütsü cheni.”
Chaldeami lau Ahaküsapu
6Panongu kümtsü no pa cheqhi eno junu ghi thaigha keu tsa pa vilo pi,
“Khuu no paw kumomu pekütsü luve eno aküna shoqhi
thimeqo pa salashi qhiluve keno
ahasapue! Khitohi ow shini kea?
7O piashe kupumi no züleno ithu
o shithüghüi moni kea? Tishino
panongu no o hakholuve nani.
8Nono aji pele eno ayeghi shipüsa,
aphughi eno tile küxümi kümtsü lau küsakügha shi kehu,
nono shiye kutomo pükaqhi kehu
ghükulumi no o pükaqhi nani.
9“Khuu no kunguu apüsü pesüni ye, eno alhoksa lono
itshü luniye pa kibolomi sala
akumou laghi lono ala shicheni keno ahaküsapue!
10Nono timi kutomo kütsave kehu
o kibolomi lau akukujopu shivae;
no ye o küxü chipiu pühavae.
11Kughengu atupi lono atuqu no qa nani, eno akika no
asü kümla-a lono khochile nani.
12“Khuu no aji pelekeu lono mishiphu shiqhe eno
kixikila lono mishighüna puthupheni keno ahaküsapue!
13Julo, timi no ime mla chekeu ye ami no pitive tsüniye ke,
eno shiyeqo no ame küha keu lono ime chekeu ye
aqokitikhi Mpeu no kekumo?
14Kughengu azü no azüghi pichhi
püake toi Ampeu juküvüpu
kighithi no ayeghi shepichhi nani.
15“Khuu no pa kisüghümi aji piye cheni keno ahaküsapue—
pano phikümsa lo jupukuni ye
nono o loghu leqhi tsüno panongu pelo shomzü peke!
16No ye ajekipi züqhulo akukujou no chhitoive nani.
Nou no shoalo, eno o phighüyiko ghamo keu piyelo!
Ampeu u ajeu akeu jukhu ye
idechilesü o lau ighi nani, eno shishe akukujopu no
o jekipipu nhavetsü nani!
17Nono Lebanon kütsale kehu tino o mhoqhive nani,
nono kütsale keu tüghashiqo no o shikichiqhi nani,
kughengu aji pelekeu eno ayeghi shiküpsa, aphughi eno
tile küxümi kümtsü lau nono küsakügha shike.
18“Ayi julho kiyiqiu no akoghe
mlaphe keu, pishikiqhi shika
chekeu huye kiu ala ani kea?
Kughengu atsa pikümla julho mla kelo akümlau ye pa no
mlaphe keu pükhübe cheni!
19Khuu no asülu vilo, Ithulo; iqünhei keu tuqu vilo, Ithulo!
ipi cheni keno ahaküsapue.
Hipau ye shikalu nani keo? Julo,
hi ye ameshoyi ngo ghükayi no
dapüani kemu atuthu ye kühae.
20Ikemu Ampeu ye Pa kimthe chineki lo ani;
ayeghiqha kümtsü no Pa zülo iqünhei shilo.”
Currently Selected:
HABAKKUK 2: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More