Zekaria 1
1
Fɔɔre-na á twɛ Baŋa Wɛ
1Darusi paare dim bena yalei bene dem chane nana chana kam wone mo Baŋa Wɛ kwora déem yi o sampwora Zekaria. Wonto kwo déem ye Ido bu Berekia mo.#Ezera 4:24; 5:1; 6:14; Hagayi 1:1; Matiyu 23:35
2 Baŋa Wɛ kwora kam mo tento:
A bane déem zaŋe de abam kwoa bam. 3Nam ta de nɔɔna bam we: Paŋwa Tu Baŋa Wɛ na tage tei to mo tento: “Jwoori-na á ba amo tei, se amo de pipiri a jeeri abam. 4Abam de yé ta‑á ke ne á nabaara bam déem na ke tei to. Faŋa to, Wɛ sampwori sedwonna déem tage de-ba mo ba we: ‘Paŋwa Tu Baŋa Wɛ tage tento mo de abam: Yage-na á totoŋ-balwaaro tem se á pipiri á jwoori amo tei ne.’ Ba nam wo cheigi amo kwora kam.” Amo Baŋa Wɛ na tage kolo to mo konto. 5Á nabaara bam konto laam wo yein-seeni mo? Se Wɛ sampwori sem konto de, ba wó taa wora taa wuu na? 6Ko nam ná ye amo nia yam de a bera yam a déem na pɛ a sampwori sem konto to, ya wo seene ya ke ya ja á kwoa bam na? Banto de ma pipiri ba jwoori ba ba amo tei, ye ba we, “Paŋwa Tu Baŋa Wɛ seene o waare debam mo dé kikia ŋwaane, se ko maŋe de o boboŋa na maŋe ya ja se o ke tei to.”
Wɛ veere wonnu o bere Zekaria
1. Sisein-dira taane
7Chane fuga-dedoa chana kam da finlei-yana dɛ dem ne, Baŋa Wɛ kwora déem yi o sampwora Zekaria, o kwo na ye Ido bu Berekia to. Sebate chana kam ne mo konto. Ko maa ye Darusi paare dim bena yalei bene dem ne.
8Tete dem ne mo amo Zekaria nii a na nɔɔno na dɔge sisein-nɔɔno baŋa ne, ka na ye nasoŋo. Mɛ seeni o na zega da to ye bwolo mo ye Motele teeni su ko maama. O laam maa wo de tetare ne. A ta ma na we sisein-nɔɔna sedwonna mo zega o kwaga ne, se na ye nasonno, de nason-pupwiu, de napwonnu, ye nɔɔna de dɔge se baŋa ne.#Gurim 6:2-8
9Wɛ maleka kadwoŋi déem zege da, ka na ŋɔɔne de-ne. A ma bwei‑o a we, “Amo tu, bɛ mo ye banto maama zege da?” O de ma leiri-ne o we, “Amo wó ta ko kuri a bere‑m.”
10Nɔɔno wolo na wo teeni dem tetare ne to laam ma ta o we, “Banto ye balo Baŋa Wɛ na toŋe se ba taa kare logo ni maama se ba lɔre kolo na jege ko ke da to.” 11Balo na dɔge sisein-nɔɔna bam baŋa ne to de maa lwoni ba kwori ba bere Baŋa Wɛ maleka kam na wo teeni dem tetare ne to ba we, “Debam kaare tega baŋa ni maama, ye dé maane we logo kom maama ye ziim mo, ye kolokolo ba dɔna.”
12 Baŋa Wɛ maleka kam laam ma ta ka we, “Paŋwa Tu Baŋa Wɛ, bena fuserepɛ mo tento nmo bane na yɔɔre de wo Jerusalem teo kom, de Judah teene dem maama baŋa ne. Maŋa kɔ mo nmo bane dem wó to se n duri ba ŋwaŋa?”#Jeremia 29:10 13Baŋa Wɛ ma ŋɔɔne ta-laaro telo na bwona ye te zuri bochara to o ma leiri maleka kalo na zege ka ŋɔɔne de amo to. 14Maleka kam konto ma ta de amo ka we, “Pa kwora kanto zaŋe wɛɛne we, Paŋwa Tu Baŋa Wɛ na tage tei to mo tento: ‘Amo yi page a tete teo Jerusalem baŋa ne. 15A bane nam tiini de zaŋe de teene dedwonna dem na boŋe we kolokolo bá daane-ba to mo. Kokuri to, a bane ya zaŋe de a nɔɔna bam fenfee yerane mo. Dwi-gɛ tiina bam laam ma yɔɔre ba pa ko zo ba yera se ko dwoni a ya na boŋe se a ke-ba tei to.’ 16Konto ŋwaane, Baŋa Wɛ tage tento mo o we: ‘Amo laam pipiri a jwoori a ba Jerusalem se a duri a nɔɔna bam ŋwaŋa. Amo diga kam wó jwoori ka lɔ ka zege teo kom wone. Ba ta wó kwei lɔra ŋona kam ba maŋe Jerusalem teo kom ni maama se ba fɔge ba lɔ-ko.’ Paŋwa Tu Baŋa Wɛ na tage kolo to mo konto.
17Nam ta pa se n kwora zaŋe wɛɛne we: Paŋwa Tu Baŋa Wɛ na tage tei to mo tento: ‘Teene delo a nɔɔna bam na zoore de wone to daa wó na jejegero dedɛ se ko gaale. Amo Baŋa Wɛ daa ta wó pa se Zion nɔn-bia bam bochara zuri. A ta wó jwoori a le Jerusalem se ko taa ye a tete nyem.’ ”
2. Nyea yana de gwaro tena taane
18Amo ma kwoni a yuu wɛɛne a nii a na nyea yana. 19A ma bwei maleka kalo na zege ka ŋɔɔne de amo to a we, “Nyea yanto bere bɛ mo?” O de ma leiri-ne o we, “Nyea yam zege ya pa dwi-gɛ tiina balo na mɛ ba dam ba wane Judah tiina bam, de Isarele tiina bam, de Jerusalem teo nɔɔna bam ba jage jei maama ne to mo.”
20 Baŋa Wɛ laam ma le gwaro tena o bere-ne. 21A ma bwei‑o a we, “Banto beene ywo se ba ke bɛ totoŋe mo?” O ma leiri o we, “Nyea yam ya jage Judah tiina bam mo se nɔɔn-nɔɔno yé wane o le o yuu o ke keim. Gwaro tento nam mo lage ba fugi nyea yam, se ba daare ba chochoge ya dam, se teene delo na daane a nɔɔna Judah tiina bam ye ba jage-ba to dam ti.”
Currently Selected:
Zekaria 1: xsmKBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)