Hagayi 2
2
Wɛ di-doŋa kam nenɔŋa taane
1Chane serepɛ sem da finlei dedwe dɛ dem ne mo Baŋa Wɛ ŋɔɔne de o sampwora Hagayi. 2O ma ta‑o se o lwoni o kwora kam o bere Selateli bu Zerubabel na ye Judah teo kom yuu tu to, de Jehozadaki bu Josua na ye Wɛ kaanem nakwe tu to, dedaane nɔɔna balo na dɛ ba nwoŋi sa-teo ba jwoori to maama. Wɛ ma bwei-ba o we:
3“Abam wɔ mo nɛ Wɛ diga kam nenɔŋa déem na ye tei boboa ne to ye n ta wora zem? Á nam ná lage se á kwei ka déem na ye tei se á maŋe de ka zem nenɔŋa kam, ko ye tetɛ mo? Abam wo maane we ka daa ba jege zula se ka yi Wɛ di-dwoŋa kam na?#Ezera 3:12; Zekaria 8:9 4Nam yé pa-na se á vɔna pare ko ŋwaane, se amo, Paŋwa Tu Baŋa Wɛ wo abam tei ne. Zerubabel, de Josua, ko ta woli de á kɔgɔ kom maama, ke-na baare á tete ne se á ta‑á toŋa. 5Maŋa kalo á kwoa bam déem na nwoŋi Ejipti ne to mo a yɔɔre a gwoni ni de-ba we, amo wó taa wora de abam. Amo Jworo ta maa wo abam tei ne. Nam yé ta‑á fona.
6Amo, Paŋwa Tu Baŋa Wɛ mo we: Ko ná ke fee amo daa ta wó jwoori a pa se wɛyuu kom de tega baŋa maama ziziŋi. A nam ta wó ziziŋi naneero tem de tega kam maama.#Hiburu 12:26 7Amo wó pa se tega baŋa teene dem maama ziziŋi pa se de nɔn-bia bam zeŋe ba jejegero ba ba ywo-seeni. Amo diga kam laam wó tiini ka na nenɔŋa ko baŋa ne. 8Amo, Paŋwa Tu Baŋa Wɛ mo we: Lu-nyenno tem, dedaane sabu-seŋa maama ye amo mo tei-te. 9Di-doŋa kanto abam na wora á lɔ to wó taa jege nenɔŋa se ko dwoni di-dwoŋa kam. Jei sem konto ne amo wó pa se a nɔɔna maama na yazura de bochare-zuru. Amo, Paŋwa Tu Baŋa Wɛ mo tage konto.”
Hagayi lare dedaane Wɛ kaanem tiina
10Bene delo Pɛ Darusi paare dim na wó ke bena yalei tu to chane nogo kom da finlei-yana dɛ dem ne mo Baŋa Wɛ daa pɛ o kwora yi o sampwora Hagayi. 11O maa we:
“Amo, Paŋwa Tu Baŋa Wɛ mo we: Véi a kaanem tiina bam tei n bwei-ba n nii ba boŋe ba ja bɛ mo keim dento baŋa ne: 12Nɔɔno ná kwei nɔne delo ba na pɔɔre-de ba tiŋi Wɛ kaanem ŋwaane, ye o kukuli-de o ke o gɔrɔ wone, o ná tu o kwei gɔrɔ kom konto o dwei wodiu kolo dwi maama, keim dem konto wó wane de pa se wodiu kolo o gɔrɔ kom na dwei to lɛɛre ko taa ye wose na? Ko ná ye bworobworo, naa dwoa, naa sana, naa nuga, naa wodiu kolo dwi maama, ko wó ke konto na?” Kaanem tiina bam ma leiri we, “Aawo.”
13Hagayi daa ma bwei-ba o we, “Se nɔɔno nam ná dwei too yera pa se ko bere we o digiri o tete de chullu tem mo, ye o laam ná tu o dwei wodiiru tento maama, o keim dem konto wó pa se wodiiru tem digiri na?” Kaanem tiina bam ma leiri‑o ba we, “Ɛɛ, te de wó digiri mo.”#Jeelim 19:11-12
14Hagayi laam maa we:
“Baŋa Wɛ nam tage we, o nii teo konto de ko nɔn-bia bam se ko taa ye konto mo. O nɛ we á na ke kikia yalo to, de á na yeini á kwei wonnu telo á ma á ke kaanem o bimbini dem baŋa ne á pa‑o to maama wo maŋe de o chullu tem mo. 15Baŋa Wɛ nam we:
Ko na zege zem se ko taa via, fɔge-na á maane á nii ko na ye tei to. Guli-na abam ya ta na wo beiri amo Baŋa Wɛ diga kam kuri ye á na cham tei to. 16Á ná vei á kare sem wone, á teene se á ja wodiu zwe finlei mo á zo diga ye zwe fuga yerane mo wora. Abam ta ná teena se á ŋoke sana á ke kunkwollu finnu wone, á wó lwo-ba á su kunkwollu finlei yerane mo. 17Ko ye amo mo pɛ se we-chera, de do-kandwa, de wodiiru jaweero ja á jeŋa totoŋa te chɔge. De konto maama nam, abam ta wo jwoori amo tei. 18Ko nam na zege zem dɛ dem na ye chane nogo kom da finlei-yana to, fɔge-na á maane á nii ko na ye tei to. Boŋe-na á nii Wɛ diga kam kuri zem na chwi se ko taa via ye ko ke abam tei to. 19Abam ta jege mena á tuli wone na? Ko ná ye á teeni dem, Vini teeni, de Olivi teeni, de kaporro, de Pomegara teeni, de daa ta wora de leiri bia na? De ko maama de, ko na zege zem se ko taa via, amo mo lage a swɛ abam swolim.”
Baŋa Wɛ gwoni ni o pa Zerubabel
20Dɛ dem konto na ye chana kam da finlei-yana to, mo Baŋa Wɛ daa pɛ Hagayi kwora o ke kuni belei. 21O maa we:
“Zaŋe n vo Judah teo kom yuu tu Zerubabel tei n ta we: Amo lage a pa se wɛyuu kom de tega baŋa maama vuvugi. 22A ta wó ja dwi-gɛ tiina pwa, se ba paare dim dam maama ti. A lage a pipiri jara-keim sisei-torokooro de balo na diini-te to mo a pu tega ne. Jar-keira sisein-nɔɔna bam maa wó to tega ne, ye balo na diini-se to go daane pa se ba maama te.
23Amo Paŋwa Tu Baŋa Wɛ we: Dɛ dem konto nam ná yia, amo mo lage a le nmo Zerubabel na ye Selateli bu to. Nmo ye a tontoŋeno. A nam wó pa se n kwei amo yere n ma‑n ta‑n tei a nɔɔna bam, nenɛɛne nmo ye jafole na bere amo dam tei to mo. Kokuri to, nmo mo ye wolo a na kuri to.
Amo Paŋwa Tu Baŋa Wɛ mo tage konto.”
Currently Selected:
Hagayi 2: xsmKBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)