Nahum 3
3
Lɛɛro lage te yi Ninevɛ teo kom
1Lɛɛro lage te yi teo kom, ko na su dedaane vwa-fɔra dedaane nɔn-gora to ŋwaane. Ba jejegero tem daga te dwoi jaanem. 2Ba dona laam tu ba baŋa ne! Banto fene sem ke sɔɔ! Ba jara-keim torokooro tem durim de ba sisein-nɔɔna bam wurigim dem de maa dɔna kiriba-kiriba! 3Sisein-dira bam yera nyaage mo! Ba se-zɔɔro de ba chichwoa laam maa jaane wɛyuu ne ye te pepela! Ba ma puuri puuri twa bam ba dogele daane vili-vili. Nɔɔn-nɔɔno maa ware ba ni se o ga o ti. Ko laam ma pa jar-keira bam nɔne ba baŋa ne, ye ba chɔɔle ba to tega ne.
4Ko maama kea Ninevɛ teo kom kikia na nye de ka-tola kikia to ŋwaane mo. Teo kom tiini ko jege fera nɔɔna badwonna tei ne, ye ko ta jege liri-mwanno na soge nɔɔna se ba tusi to. Ko yeini ko tɔge ka-tola kikia yanto baŋa mo ko gane teene dedwonna pa se de to. Ko chɔge dwi tiina badaara de ko liri sem.
5Paŋwa Tu Baŋa Wɛ nam tage o we, “Amo done abam mo. A maa wó le á gwaaro tem a daare pa se á zege kalambwolo. Á wó di chaveera dwi tiina badaara yiga ne, de ba na nɛ abam kuri to ŋwaane. 6Amo ta wó lwo weeru á baŋa ne se á lɔre we a yaale abam mo. Nɔɔna de maa wó di tega á yera ne. 7Nɔɔna balo maama na wó nii ba na abam to wó kɔɔre ba tete mo ba jwoori kwaga ye ba we, ‘Ninevɛ teo kom to ko saare! Wɔ mo wora se o keeri ba lua?’ Amo wó na nɔɔna se ba zege á kwaga ne na?”
8Abam teo kom gare Ejipti teo Tebesi na?#3:8 Tebesi déem ye Ejipti te-fɔrɔ kodwoŋi. Ba déem lɔge teo kom konto Naili buga kam ni ne mo. Buga kam ma kaare teo kom maama ka pu nenɛɛne kabira tei, se cham yé wane de yi-ko. 9Tebesi déem nii Kusi de Ejipti maama baŋa ne mo. Teo kom dam dem gaale dedɛ. Puti de Libia tiina maa ye ko fara. 10De konto maama de, ba déem ta jaane Tebesi tiina bam mo ba kale ba nwoŋi ba vo teo yiga yiga. Ba ma yigi ba bu-sese ba de tega ne ba go teo kom chwoŋa yuu maama ne. Ko ná ye teo kom nakwa de dedɛɛra bam, ba dona ma ta jɔrɔ se ba kuri ba wone, ye ba daare ba vɔ-ba dedaane chegero ba ja ba viiri.
11Abam Ninevɛ tiina de nam lage á nyɔ sa-dɛɛra bam konto dwoŋi mo pa se á beiri. Abam de wó kwaane se á duri á lu á dona bam jeŋa ne. 12Á dam jei sem á na lɔge to nye de kaporro telo mɔɔro na dɛ yiga te be te yi to mo. Ba ná sugi kaporro tem, mɔɔro tem wó yɔɔre te to nɔɔna bam nia wone mo. 13Abam jar-keira bam bwona ne kaana dwoŋi mo. Á teo kom de maa zege bwori á dona bam yiga ne. Mini mo lage de zwɛ á teo kom ni-bworru tem. 14Á dona bam lage ba kaare á teo kom ba pu mo. Mo kokuri abam nam jege se á mɔ na á zege, se á ma á ti á yiga. Ta fɔge-na á kwɛ á dam jei sem. Tiini á nɔne-na teero se te be, se á laam ma á mage wara á tiŋi! 15Abam nam ná maŋe á ke tetei maama de, mini wó zwɛ abam kula mo! Á dona bam ta wó go abam jara wone. Ba lage ba ti abam mo nenɛɛne kayere na yeini se deilimi wodiiru tei maama nyɔ to!
Puli-na dedɛ, ne kayere na tiini se yo tei to! 16Á teo kom pipim-piina bam tiini ba daga zanzam, se ko dwoni wɛyuu chalechwe sem kɔgɔ na mae tei to. Leile konto, ba nam daa tera. Ba jei mo, nenɛɛne kayere na di kara wodiu se ti, ye se laam jaane se viiri tei to. 17Abam nakwa de á dedɛɛra bam nye de kayere mo na nwoŋi de kɔgɔ, ye se laam vo se meeli kabira yera ne se waaro yé yi-se tei to mo. Wea laam ma mage, pa se maama jaane se jei, ye nɔɔn-nɔɔno yeiri se na vei mɛ to.
18Asiria pɛ, nmo teo yiga tiina bam mo dɔ ba lusi. Naduna bam de maa tigi ba dɔa, ye ba daa bá zaŋe. Nmo nɔn-bia bam maama ma jage ba yi jei maama peero tem baŋa ne, ye nɔɔn-nɔɔno tera se o ja-ba o jwoori o ke daane. 19Zonne delo n na nɛ to bá wane de yɔɔre. Nmo fufwollu tem bá jei kɔtaa! Balo maama ná nigi we n teo kom to mo ko saare, banto wó taa chaka mo de wopwolo, ba daare ba taa mage ba jea. Kokuri to, abam ya na tiini á bɛɛse nɔɔna tei to, nɔɔn-nɔɔno wo lugi abam lwarem kikia wone.
Currently Selected:
Nahum 3: xsmKBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)