Malaki 3
3
1Paŋwa Tu Baŋa Wɛ ni dem mo tento:
“Nii mo! Amo lage a toŋe a tontoŋeno mo se o da amo yiga o vo o kwɛ chwoŋa kalo amo na wó tɔge da to. Konto ná kea, á Teiru wom á na beeri o jei to mo wó pɔpɔ o ba o zo o diga kam wone. Amo tontoŋeno wolo á na jei á cheigi to wó ba o ta ni delo a na gwoni de abam to taane o bere abam.”#Malaki 4:5; Matiyu 11:10; Luka 1:76
2Dɛ delo dem Baŋa Wɛ nam na wó ba to, o lage o taa nye nenɛɛne mini na kwɛ lu-nyenno pa se digiru daa tera to, de chanfene na wo ware-zoŋa wone de zare gwaaro to mo. O ná tua se o lɔre nɔɔna lɔra konto, ba bá wane ba zege o yiga ne.#Joweli 2:11 3Baŋa Wɛ tete mo lage o kwɛ Levi dwi dem se de taa ye chekke. O wó jeini tega ne mo, nenɛɛne luru na jei o kwɛ sabu-seŋa dedaane lu-nyenno pa te peere tei to. O na kwɛ-ba konto to, nɔɔna laam wó taa jaane pɛɛra yalo na ye chekke to ba tui o tei ne. 4Kanto maŋa kam ne mo Baŋa Wɛ daa wó jwoori o jwoŋi pɛɛra yalo Judah tiina dedaane Jerusalem tiina na wó ja ba ba ba pa‑o to. Ko daa wó taa nye nenɛɛne faŋa kam ne o yi na su ba kikia tei to mo.
5Paŋwa Tu Baŋa Wɛ ni dem mo tento:
“Amo lage a yi abam yera mo se a bore chega bora. A maŋe a zege se a bore taane a vane balo na toŋe yi-nɛɛre totoŋa dwi maama to mo, dedaane balo na nwoŋi ba kaana naa ba banna kwaga ne ba ke tolo to. A nam ta bá ma a chɛ vwa-fɔra naa balo na pini ba tontoŋena to. Balo de na jege chanɛɛre ba ke kadeina de botara dedaane nɔn-zora yerane to de maa wó ga bora amo tei ne. Kokuri to, nɔn-dwoa banto maama ba kɔre-ne.”
Nɔɔna na vere Wɛ yi-fula yi-fula tei to
6Paŋwa Tu Baŋa Wɛ ni dem mo tento:
“Jakob bia bam, cheigi-na! Amo nam bá fɔge a leiri a ji wo-gaa. Konto nam mo pɛ se abam dwi dem ta wo jei tega baŋa ne to.#Wo-chechɔgɔ 3:22 7Ko na maŋe ko nwoŋi á nabaare wone to, abam ye dwi delo na ve se á ta‑á sɛ amo nia yam mo. Abam nam ná sɛ se á pipiri á jwoori amo tei ne, amo de wó pipiri a jeeri abam mo. Abam ma‑á kare á tɛ we, ‘Debam wó ke tɛ mo dé jwoori dé ba?’
8Amo nam lage se a bwei abam a nii, nabiinu wó wane o vere Wɛ na? Abam nam vere amo mo ga yi-fula yi-fula! Abam ta kare á bwei mo we, ‘Dé bere dé vere‑m tetɛ seeni mo?’ Woŋo maama fuga wone popɔra dedoa kalo na ye amo nyem to, ko woli de pɛɛra yalo á na jege se á yeini á pa-ne to, tento baŋa ne mo á jege-ne á vera. 9Abam nam na yeiri to, konto ŋwaane mo amo sɔɔle a yage á teo kom maama baŋa ne. 10Abam ná laga, faŋe-na amo á nii. Ja-na woŋo maama fuga wone popɔra dedoa kam na ye amo nyem to á ja á ba á tiŋi amo sɔŋɔ kom ne. Wodiu ná su amo sɔŋɔ kom wone, amo laam wó puri wɛyuu kom a jeeri abam se á neene dedaane Wɛ zaane amo na wó ke a yage á yuu ne to. Amo zaane dem wó taa tiini de daga de dwoi abam jaanem. Amo Paŋwa Tu Baŋa Wɛ na tage tei to mo konto.#Memaŋa 3:9 11Konto kwaga ne de, amo wó che se kayere dedaane wo-korro dwi maama yé daane á wodiiru tem na wo á kare sem ne to. Á teeni dem maa wó taa leiri bia lanyerane. 12Konto laam maa wó pa logo baŋa teene dem nɔɔna bam maama ta we, abam jege yu-ywoŋo dedɛ. Kolo ŋwaane to, abam tega kam wó taa lamma ka pae nɔɔna se ba taa zoore da.”
Paŋwa Tu Baŋa Wɛ na tage tei to mo tento:
13“Abam ye balo na ŋɔɔne wo-balwaaro mo a pa amo to. Á nam ta bwei-ne mo we, ‘Debam wo ni kokuri, dé tage bɛ de bɛ mo ye ko ba lamma to?’ 14Abam ŋɔɔne wo-balwaaro mo ye á we, ‘Bɛ nyɔɔre mo bere ko wo Wɛ totoŋa yam wone? Dé ná sɛ Paŋwa Tu Wɛ nia yam, bɛ nyɔɔre mo dé wó na? Debam ná maŋe dé bere we dé wo mo chɔge dedaane dé totoŋ-lwanno tem de, konto ta ye kafɛ mo. 15Debam tei ne, balo na bere ba tete kamunim to mo jwoori ba jege yu-ywoŋo. Nɔn-balwaaro jege yiga-veiŋa mo. Banto tiini ba gigili Wɛ yiga, ye de ko de, kolokolo ba daane-ba.’ Mo abam na yeini á tɛ tei to.”
16Ko daare ko ná ye balo na kɔre Baŋa Wɛ to, banto ŋɔɔne ba taane mo ba bere daane. Baŋa Wɛ de ma ni kolo ba na ŋɔɔne to. Wɛ ma pa ba popone balo na kɔre‑o to yera ba tiŋi tɔnɔ wone, se ko taa ye gulim.
17Paŋwa Tu Baŋa Wɛ laam maa we:
“Dɛ dem a na lage a zaŋe se a toŋe to, banto wó taa ye amo tete nyem amo yi na su-ba to mo. Amo wó duri ba yibwona nenɛɛne kwo na duri o bu wolo na toŋe o pa‑o to yibwona tei to.#Lei 103:13 18Konto baŋa ne mo abam wó lɔre amo na ke tei de nɔn-laaro dedaane nɔn-balwaaro to. Konto mo wó bere we balo na toŋe ba pa amo de balo na ba toŋe ba pa amo to dae bedwe.”
Currently Selected:
Malaki 3: xsmKBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)