Joweli 3
3
Baŋa Wɛ wó bore dwi tiina maama taane
1“Nii-na! Maŋa kam konto ne,
amo wó pa se Jerusalem de Judah tiina bam
jwoori ba taa jege yu-ywoŋo lanyerane.
2Amo wó pa se dwi-gɛ tiina bam maama ba
ba jeeri bwolo kolo ba na bwoi we ‘Jehosafate#3:2 Jehosafate kuri mo ye Baŋa Wɛ borem. bwolo’ to ne.
Ba ná tu ba wora, a laam wó di ba taane,
de ba na ke amo nɔɔna Isarele tiina bam tei to.
Kolo ŋwaane ba ya jaane-ba
ba jage ba vo teene dedwonna ne,
ye ba daare ba jwoŋi ba tega kam ba tei.
3 Dwi-gɛ tiina bam tage jɔrɔ mo a nɔɔna bam ŋwaane
se ba nii wɔ mo wó jwoŋi-ba.
Ba ma yeini ba kwei bakeiri sem
ba yeigi ba ma tɔge ka-bworo kwaga,
ye ba daare ba kwei busankane sem ba yeigi
se ba jwoŋi sana ba taa nyɔa.
4Tura tiina, de Sidon tiina, dedaane Filisi tiina na wo jei selo maama ne to, abam boŋe se á ke amo tetɛ mo? Á lage se á yiri á jene mo amo baŋa ne na? Konto nam ná ye á boboŋe dem, lɔre-na we amo wó ke lela a jwoori a ŋwe kolo á na ke amo baŋa ne to. 5Abam vere lu-nyenno de sabu-seŋa jejegero tem na ye amo tete lonne nyem to á ja á vo á tiŋi á jwona di sem wone. 6Abam ta ma kwei Jerusalem de Judah tiina bam á ja á vo á yeigi á pa Girisi tiina. Á ke konto se ba vo yiga yiga mo ba daare ba tete teo kom se á ta‑á tei.
7Nam nii-na! Amo laam lage a jwoori a ja a nɔɔna bam mo se ba nwoŋi jei selo maama ne á na yeigi-ba to a ja a ba sɔŋɔ. A ta maa wó pipiri kolo á na toŋe ba baŋa ne to, se ko jwoori ko ba abam tete yuu ne. 8A lage a kwei abam bia mo a yeigi a pa Judah tiina bam. Banto laam wó kwei á bia bam ba yeigi ba pa Sabea tiina bam na zoore sa-teo ne yiga yiga to.”
Baŋa Wɛ mo tage tento maama.
9Tɔɔle-na kwora kanto se ka yi dwi tiina maama:
“Ti-na á yiga jara-keim ŋwaane!
Bwoŋi-na á babɛ sem de á jar-keira bam maama
se ba zaŋe ba la daane,
ba daare ba vo ba kwaare jara de ba dona bam.
10Kwei-na á vaane dem se á ma‑á lu jara-keim se-zɔɔro,
se á kwei á lare sem á pa se ji chichwoa.#Mika 4:3
Pa-na se nabwonu maama taa tɛ we, ‘A ye babea!’
11Dwi maama tiina, ke-na lela á nwoŋi á teene dem ne
á ba á jeeri tento se á ke jara!”
Baŋa Wɛ, nmo de ja n jar-keira bam n nwoŋi n jeeri!
12Dwi-gɛ tiina bam maama jege se ba zaŋe
ba vo ba jeeri Jehosafate bwolo kom ne mo.
Dáane mo amo Baŋa Wɛ lage a jeini
a di dwi-gɛ tiina balo maama na gilimi abam to taane.
13Nɔn-balwaaro tem maŋa yia se ba na chɔgem!
Konto to, kwei-na á sekware
á ja á zo ba wone á ma á gaane-ba,
nenɛɛne ba na yeini ba gwei mena yalo na bege tei to.
Nam ta nɔne-na ba baŋa ne,
nenɛɛne ba na ke tei ba ŋoke Vini tio-bia to.
Maŋa kam yia! Sana bam su ba wɛɛle!
14Nɔn-kɔgɔ mo jeeri Bora Borem bwolo kom ne,
kɔgɔ kolo na tiini ko gaale dedɛ to.
Chega to, Baŋa Wɛ dɛ-kamunu kom lage de ba lela mo,
se o bore ba bora dáane.
15Wea kam dedaane chana kam maama wó ji lim.
Chalechwe sem pwooni de daa bá taa nyeena.#Matiyu 24:29
16 Baŋa Wɛ kwora mo zaŋe Zion peo kom yuu ne ka suura.
O kwor-dɛa maa bage Jerusalem teo kom wone,
pa se tega baŋa dedaane wɛyuu maama ziziŋi.
Ko nam ná ye o tete nɔɔna Isarele tiina bam,
Baŋa Wɛ mo ye ba dalem jei,
se ba sale o yera ne.
Baŋa Wɛ wó swɛ o nɔɔna bam swolim
Baŋa Wɛ ma ta o we:
17“Abam Isarele tiina bam laam wó lɔre we amo mo ye á Tu Baŋa Wɛ wom.
A maa zoore a tete peo Zion yuu ne mo.
Amo ta ma pɔɔre Jerusalem se ko taa ye a tete teo kom.
Veira daa bá wane-ko ba di maŋa de maŋa.
18Maŋa kam konto ná yia,
Vini teeni delo á na wó jeiri peero jei sem ne to
wó pa á na sa-sona dedɛ.
Á vara de maa wó puli ba su zwonnu laŋa kam maama,
pa se nayela de gaale.
Judah wo bwi sem maama de maa wó su se wɛɛle.
Bu-nɔgɔ wó zege Baŋa Wɛ diga kam ne
ka duri ka vo ka yi Sitim#3:18 Sitim kuri mo ye Jei selo sabare na wo mɛ to. bwolo kom ka bugi tega kam.
19Ejipti teo kom nam lage ko ji di-dwonnu jei mo,
se Edom de taa ye kagoa yerane.
Kokuri ba déem tiini ba toŋe puseŋa Judah tiina bam yera ne.
Ba ma zo ba tega kam ba go balo na wo maŋe se ba te to.
20Ko nam ná ye Jerusalem teo kom dedaane Judah laŋa kam maama,
nɔɔna wó taa zoore da maŋa maama mo se ko taa vei wuu.
21Amo laam maa wó jwoori a ŋwe nɔn-gora tusim dem jene,
amo na wo ŋwe-de to ŋwaane.
Chega to, amo Baŋa Wɛ zoore Zion wone.”
Currently Selected:
Joweli 3: KBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)