Amosi 1
1
1Amo Amosi ye nayero mo na nwoŋi Tekoa, ye a laam bere taane dento. Yuzia déem na ye Judah teo pɛ, ye Jehoasa bu Jeroboam de ye Isarele tiina pɛ, ye ko daare bena yalei se tega kam ziziŋi to mo Wɛ le wonnu tento ya na seigi to o bere-ne.#2 Pwa 15:1-7; 2 Tigisim 26:1-23; Zekaria 14:5
2Amosi ma ta o we:
“Baŋa Wɛ kwora mo zaŋe Zion peo kom yuu ne ka suura.
O kwor-dɛa maa bage Jerusalem teo kom wone.
Ga-lɛɛro tem nayera na kale ba vara ba vei mɛ to wora te kora.
Kamele peo kom gaao de ma kwaare.”
Damasika tiina taane
3 Baŋa Wɛ ni dem mo tento:
“Damasika nɔɔna bam yeini ba tiini ba ke wɛleera ba daŋe da-baŋa ne.
Konto ŋwaane amo wó yɔɔre a waare-ba.
Ba nɔne Gilead tiina bam mo
pa se ba twanno peere.
4Konto ŋwaane amo wó ke-ba tento:
Amo wó pa se mini zwɛ Pɛ Hazayeli
na lɔge sɔ-fɔrɔ kolo to,
se a daare a zwɛ Pɛ Ben-Hadadi
dam jei sem.#2 Pwa 13:24
5Amo wó chɔge Damasika teo
ni bworru tem,
se a daare a go ko nɔn-bia bam
a vo a yi Aven#1:5 Aven kuri mo ye Lwarem. bwolo kom.
Ko ta ná ye pɛ wolo na di paare Bɛte-Eden teo kom ne to,
amo wó zeili‑o mo pa se o lage jei.
Amo ta wó pa ba kale
Siria tiina bam
ba ja ba vo Kiri teo
se ba ji peena da.”
Baŋa Wɛ mo tage konto.
Filisi tiina taane
6 Baŋa Wɛ ni dem mo tento:#Zefania 2:4
“Gaza teo kom nɔɔna yeini ba tiini ba ke wɛleera ba daŋe da-baŋa ne.
Konto ŋwaane amo wó yɔɔre a waare-ba.
Ba jaane teo kodwoŋi nɔn-bia maama
ba kale-ba ba vo ba ke
Edom tiina jeŋa ne.
7Konto ŋwaane amo wó ke-ba tento:
Amo wó pa se mini ja Gaza teo kom,
ye de zwɛ ko dam jei sem.
8Ko ná ye Asedodi teo kom
nɔn-bia bam,
de wolo na di paare
Asekelon teo kom ne to,
amo wó chɔge-ba,
se a daare a ma a dam-fɔrɔ
a waare Ekoron teo kom tiina.
Filisi tiina balo maama na daare to maa wó te.”
Yuu-tu Baŋa Wɛ mo tage konto.
Tura tiina taane
9 Baŋa Wɛ ni dem mo tento:
“Tura teo kom nɔɔna yeini ba tiini ba ke wɛleera ba daŋe da-baŋa ne.
Konto ŋwaane amo wó yɔɔre a waare-ba.
Ba jaane teo kodwoŋi
nɔn-bia maama mo
ba kale ba vo ba ke
Edom tiina jeŋa ne.
Konto to, ba yage ba ni-gwonim dem ba ya na ke de teo kom konto to. #Izaya 23:1-18; Joweli 3:4-8
10Konto ŋwaane amo wó ke-ba tento:
Amo wó pa se mini di Tura teo kom,
ye de zwɛ ko dam jei sem mo.”
Edom tiina taane
11 Baŋa Wɛ ni dem mo tento:
“Edom nɔɔna bam yeini ba tiini ba ke wɛleera ba daŋe da-baŋa ne.
Konto ŋwaane amo wó yɔɔre a waare-ba.
Ba zeili ba chorro tem mo se ba go.
Ba maa ba jege ba ŋwaŋa
de fenfee de,
ye ba wo pɛ se ba ban-zɔŋɔ kom zuri.#2 Tigisim 28:17
12Konto ŋwaane amo wó ke-ba tento:
Amo wó pa se mini ja
Teman teo kom maama,
ye de zwɛ Bozera dam jei sem.”
Amon tiina taane
13 Baŋa Wɛ ni dem mo tento:
“Amon teo kom nɔɔna yeini ba tiini ba ke wɛleera ba daŋe da-baŋa ne.
Konto ŋwaane amo wó yɔɔre a waare-ba.
Ba na beeri tega se ba woli ba tega wone ye ba kwaare jara to,
mo ba lɔge Gilead kapwi sem
ba pwi seeni ba go-se.
14Konto ŋwaane amo wó ke-ba tento:
Amo wó pa se mini ja Raba teo kom,
ye de zwɛ ko dam jei sem.
Nɔɔna laam maa wó kaase tiguri-kaasa jara dɛ dem konto ne.
Jara yam maa wó tiini ya ba
ba baŋa ne,
nenɛɛne vo-dɛɔ na chɔge wonnu tei to.
15Amo ta wó pa se ba ja Amon
teo kom pɛ de o nakwa bam
ba kale ba vo teene dedwonna ne
se ba ji peena da.”
Baŋa Wɛ mo tage konto.
Currently Selected:
Amosi 1: KBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)