Hagayi 1
1
Wɛ diga kam kwɛɛm
1Bene delo Pɛ Darusi na di paare o ke bena yalei to chane seredo boboa dɛ dem ne mo Baŋa Wɛ kwora déem yi o sampwora Hagayi. Kwora kam nam ye se ka pa Selateli bu Zerubabel mo. Wonto déem mo ye Judah teo kom maama yuu tu. Ka ta maa jege se ka yi Jehozadaki bu Josua, o na ye Wɛ kaanem nakwe tu to.#Ezera 3:2; 4:24; 5:1; Zekaria 1:1
2Paŋwa Tu Baŋa Wɛ nam tage tento mo o bere Hagayi we, “Nɔɔna bam kare ba tɛ ba we, maŋa ta wo yi se ba fɔge ba lɔ Baŋa Wɛ diga kam.” 3Baŋa Wɛ laam ma pa o sampwora Hagayi kwora se o lwoni o bere nɔɔna bam ye o we:
4“Abam na zoore sɔ-ŋonno telo na fɔge lanyerane wone to, ye amo diga kam laam zege nenɛɛne di-dwoŋo to, ko maŋe na? 5Paŋwa Tu Baŋa Wɛ ta maa we: Fɔge á maane á ŋwea wone se á nii ko na ye tei to. 6Abam ná yeini á du wo-dwa dedɛ, á wó zage fenfee mo. Abam seene á ba gae se á di. Ko nam na ye tei to, á ba fɔge á di á sui. Á jege na se á nyɔ, ye na-nyɔm ta jege abam. Gwaaro telo á na zoore á yera ne to maa ba kwoli á waaro. Á na toŋe se á jwoŋi ŋweero telo to ba fɔge te woli abam, ko nye de á kwei-te á ke gare-fɛɛla yalo na jege bɔɔna to wone mo.
7Paŋwa Tu Baŋa Wɛ nam we: Fɔge á maane á ŋwea wone se á nii ko na ye tei to. 8Diini-na peero tem yuu ne á beeri da-ŋonno á ja á ba. Laam kwei-na-se á ma á fɔge á lɔ diga kalo amo yi na wo taa sui to, se á daare á ta‑á zuli-ne ka wone. 9Abam ya teene se á zage wodiu dedɛ mo, ye ko ji fenfee ko pa abam. Kolo á na maŋe á ja á zo diga to mo a fuli de vio a yage a daare abam. Bɛ mo ye a ke konto? Ko ye abam yia na seene á tete sam lɔɔm baŋa ne, ye á yage amo diga kam pa se ka ji di-dwoŋo ka zega to ŋwaane mo. 10Konto ŋwaane nam mo pa se nyɔnɔ daa ba toe. Tega kam de maa ware wodiu se ka ke ka pa abam. 11Amo ta ma pa se da-kore zege á tega kam maama baŋa ne. Ko ná ye á kare sem, de peero tem, de mɛ maama wodiiru na lage te ke to, de mena, de Vini teeni, de Olivi nuga teeni na wo mɛ to, tento maama kwaare mo. Ko ma zo abam tete yera dedaane á vara maama yera, ye á totoŋa maama de ji kafɛ.”
12Zerubabel, de Wɛ kaanem nakwe tu Josua, ko woli de balo maama na dɛ ba nwoŋi sa-teene yiga yiga ba jwoori Jerusalem to maama na nigi Wɛ sampwora Hagayi taane dem konto to, ba déem ma sɛ ba Tu Baŋa Wɛ kwora kam. Ba ma sɛ we Baŋa Wɛ ni dem tɔge Hagayi baŋa ne mo de yi-ba, ye ba bobo se ba taa zuli Baŋa Wɛ de chega.#Ezera 5:1-2
13 Baŋa Wɛ tontoŋeno Hagayi déem ma kwei Wɛ ni dem o pa nɔɔna bam ye o we, “Baŋa Wɛ pwooli we, o wora de abam mo.”
14 Baŋa Wɛ ma ja nɔɔna bam maama boboŋa o ke daane. Ko ná ye Zerubabel na ye Judah teo kom yuu tu to, de Josua na ye Wɛ kaanem nakwe tu to, de balo maama de na dɛ ba nwoŋi sa-teo yiga yiga ba jwoori to, ba maama ma ba ba gilimi daane, se ba taa toŋe Paŋwa Tu Baŋa Wɛ wom na ye ba Wɛ to diga kam lɔɔm totoŋa. 15Darusi paare dim bena yalei tu bene dem chane seredo sem da finlei-yana dɛ dem ne mo ba déem bobo ba fɔge ba lɔ Wɛ diga kam.
Currently Selected:
Hagayi 1: xsmKBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)