Danyeli 11
11
1Bene dem Medea tu Darusi bobo se o di paare to, mo amo déem kuri se a zege Mikayeli kwaga ne se a pa o na dam.”
Teene delei pwa bam jege daane
Maleka kam ta ma ta ka we:
2“Amo laam wó pa se n lɔre kolo na ye chega to. Pwa batɔ daa ta wó zaŋe ba di Peresia paare dem. Banto paare dim maŋa kam ná kɛ, bana tu wom wó ba o jwoŋi paare. O wó tiini o taa ye nadum o dwoi o dwonna bam. O nam ná mɛ o jejegero tem o na dam o ti, o wó chiŋi nɔɔna maama se ba ke jara de Girisi paare laŋa kam. 3Pa-dedɛɛro laam maa wó zaŋe ye o jege paare o di de dam-fɔrɔ. O nam wó taa ke tei maama o na lage to mo. 4O paare dem ná yɔɔre de jeini, de wó pɔpɔ de ti mo. Ba maa wó pɔɔre o paare dem kuni bena mo se de jage de yi tega baŋa sapɛ sena sem maama ne. O bia nam bá di ba kwo paare dem, se de lage de gɔ mo pa se nɔn-gɛ di-de. Paare dem ná pɔɔre konto, de nam daa bá taa jege boboa dam dem dwoŋi.
5Tega-kuri seeni pɛ wom#11:5 Tega-kuri seeni pɛ wom = Ejipti pɛ wom maa wó tiini o na dam. O jar-keira yiga tiina bam dedoa de daa wó taa dana o dwoi‑o, pa se o vo o jwoŋi o tete paare o taa di de dam-fɔrɔ. 6Bena yalei nam ná kɛ ya ke da, pwa balei bam wó ke ni-sɛɛm daane. Tega-kuri seeni pɛ wom bukɔ wó zo baŋa seeni pɛ wom#11:6 baŋa seeni pɛ wom = Siria pɛ wom, se ko pa ba ni-sɛɛm dem kwaare chekke. Bukɔ wom dam nam bá dáane, ye o baro de paare dam ti. Ba maa wó go bukɔ wom, de balo na woli‑o to, de o baro wom, de o bu wom de.
7Maŋa kam konto ne, bukɔ wom yera nɔɔno dedoa wó leiri o kwo yuu ne o taa tei tega-kuri seeni paare dem. Kotu nam wó ke jara de baŋa seeni pɛ wom de o jar-keira bam mo, ye o daare o zo o teo dam jei sem o di‑o jara yam wone. 8Ko kwaga ne, o wó vere baŋa seeni pɛ wom teo jwona, de ba sabu-seŋa zela, de lu-nyenno zela o ja o vo o tiŋi o tete teo Ejipti ne. Ko maa wó ke bena dedɛ se o daa boŋe se o ke jara de baŋa seeni pɛ wom. 9Konto kwaga ne, baŋa seeni pɛ wom de wó zaŋe o vo o kwaare jara de tega-kuri seeni pɛ wom. Ba nam wó fe‑o se o pipiri o jwoori sɔŋɔ. 10Baŋa seeni pɛ wom bu-baara laam wó ke ba tete ba ke daane ba la jar-keira kɔgɔ dedɛ, se ba ke jara de kuri seeni pɛ wom. Ba kɔgɔ kom wó yɔɔre ba mage jara taa ba vo ba yi tega-kuri seeni teo dam jei sem.
11Tega-kuri seeni pɛ wom wó nwoŋi de bane se o ke jara de baŋa seeni pɛ wom de o kɔ-fɔrɔ kom. O maa wó wane-ba o di. 12Tega-kuri seeni pɛ wom ná nɛ wɔnɔ konto, o laam wó tiini o bere o tete. O wó go o dona morro dedɛ, ye o dam nam bá dáane. 13Baŋa seeni pɛ wom wó jwoori o la jar-keira kɔgɔ na daga ko dwoi boboa kɔgɔ kom o ke daane mo. Ko ná wora ko wora, o wó pa o kɔ-fɔrɔ kom konto nwoŋi de ba jara zela dedɛ, pa se ba yɔɔre yiga ba taa mage jara ba via.
14Maŋa kam konto ne, nɔɔna dedɛ wó nwoŋi tega-kuri seeni pɛ wom kwaga ne. Nmo tete nɔɔna bam wone nankɔ-nyena de wó kwaane se ba dwoni ded‑o, ba na lage ba pa se veera yam ji chega to ŋwaane. Ba nam wó ga ko ŋwa. 15Baŋa seeni pɛ wom de o jar-keira kɔgɔ kom laam wó ba ba kaare teo kom dam jei sedwonna ba pu, ye ba daare ba wane-ko ba di. Tega-kuri seeni jar-keira bam daa bá wane-ba ba zeili, ba ná maŋe ba ye babɛ tei de. 16Baŋa seeni pɛ wom wó taa toŋe o fera mo, ye ba bá wane‑o ba che. O ta wó vo o yi te-ŋoŋa kam ye dam wo o jeŋa ne se o chɔge-ka. 17O boboŋa wó ja se o tɔge de o jar-keira bam maama o ba o ke ni-sɛɛm de tega-kuri seeni pɛ wom. O bere o wó kwei o bukɔ o pa pɛ wom konto, se o wane o na chwoŋa o tɔge da o chɔge tega-kuri seeni paare laŋa kam. O boboŋa nam bá seene ya maŋe daane.
18Ko kwaga ne, baŋa seeni pɛ wom wó vo o kwaare jara de dwi tiina balo na zoore naneo ni ne to mo. O maa wó wane ba dedɛ o di. Dwi-gɛ dedɛɛro wodwoŋi nam mo lage o zaŋe o baŋa ne o pa o teera yam jei, se chaveera jwoori ya ja‑o. 19O laam maa wó pipiri se o jwoori o vo o tete teo kom o seigi o dam jei sem ne. O ná via, o wó chɔɔle o to tega ne o jei, ye nɔɔn-nɔɔno daa bá ni o ŋwa.
20Wolo na wó saŋe o kwaga o ji baŋa seeni teo kom pɛ to de laam wó toŋe lampwoo-jwoŋinu se o fe nɔɔna o la sabu, se o paare taa jege nenɔŋa lanyerane. O de nam bá dáane. O wó ba o te lela mo, ye ko dae jara wone naa vuvuga baŋa ne.
21Nɔn-yɔɔ wolo kuri na dae paare dwi to mo laam wó ji baŋa seeni teo kom pɛ se o leiri wodwoŋi wom yuu ne. Wonto wó kwei swa de ni-som mo o pɔpɔ o ba o vere paare dem o pa o tete. 22O nam wó yɔɔre o chɔge jar-keira balo maama na wó dwoni ded‑o to mo, de Wɛ kaanem yiga tu wom de. 23O ta wó ke ni-sɛɛm de teene dedwonna, ye ko ye swa mo o ke se o ma o gane-ba. O dam dem wó fɔge de taa daga, ye balo na wo o kwaga ne to de ye fenfee yerane. 24O maa wó pɔpɔ o zaŋe teene delo jejegero na tiini te daga to baŋa ne o kwaare jara de-ba se o vere ba wonnu. O kwoa déem wo wane o keim dem konto dwoŋi ba ke. O maa wó pɔɔre jejegero de zela yalo o na vere to o pa o kwaga tɔgena bam. O ta wó ke o boboŋa ne se o chɔge teene dedwonna dam jei sem. O keina yam konto nam bá dáane se ya ti.
25Pɛ wom wó tiini o na baare se o la kɔgɔ dedɛ o ke daane se ba vo ba ke jara de tega-kuri seeni pɛ wom. Wonto de nam wó la jar-keira kɔgɔ kolo na tiini ko dana ko gaale to. De ko de, tega-kuri seeni pɛ wom bá wane o dono wom, nɔɔna na wó baare o kwaga ne to ŋwaane. 26Ko nam ye o tete sɔŋɔ tiina mo lage ba de‑o tega ne. O jar-keira bam dedɛ wó te jara wone, ye o kɔgɔ kom maama ba ko jei. 27Pwa balei banto wó jeini daane se ba taa lara. Ba nam bá taa jege boboŋ-laaro ba pae daane. Ba wó taa jege daane ba fɔ vwa se lwarem laam ba. Ba kikia yam nam bá ja kuri, kokuri to, ba kweelim maŋa kam jege se ka yi mo. 28Baŋa seeni pɛ wom wó zaŋe o taa maa jwoori o tete teo kom de jejegero telo maama o na vere to. O ta ná wo chwoŋa ne, o boboŋa wó ja se o chɔge Wɛ nɔɔna bam na tɔge chwoŋa kalo ba zuli Wɛ to. O maa wó yɔɔre o toŋe o fera mo ba baŋa ne, se o laam kɛ o vo o yi o teo kom.
29Maŋa kam ná yi ka ti, baŋa seeni pɛ wom wó jwoori o vo se o ke jara de tega-kuri seeni teo kom. Wonnu nam daa bá ke lanyerane te pa‑o ne boboa jara yam na ke tei to. 30Nɔɔna wó zege wɛ-zoore seeni#11:30 wɛ-zoore seeni naa Rom teo kom: Hiburu = Kitim ba tɔge naneo kom baŋa de nabwooru ba ba se ba ke jara ded‑o. Konto wó pa se o fom, ye o tutwoni se o jwoori sɔŋɔ. O ta ná wo chwoŋa ne o vei to, o laam wó kwei o ban-zɔŋɔ kom o daŋe Wɛ nɔɔna bam yuu ne mo, se o pa ko chɛ ba yera ne. Ko daare balo na ve se ba tɔge Wɛ chwoŋa kam to mo o yiga wó taa wo ba wone. 31O jar-keira bam wó zaŋe ba zo Wɛ diga kam de ka dam jei sem se ba chɔge-ka. Ba wó che nɔɔna se ba daa yé taa ke dɛ maama kaanem dem da, ye ba daare ba kwei wo-zɔɔne delo na chɔge Wɛ yere to ba zege Wɛ wara-jei sem ne. 32Pɛ wom wó kwei ni-som mo o soge balo na nwoŋi Wɛ kwaga ne to o ke o yera ne. Ko nam ná ye balo na ke ba chega de ba Wɛ to, ba bá sɛ ba pa‑o.
33Yi-pore-nyena bam wó taa bere nɔɔna dedɛ se ba lɔre yeino chwoŋa. Ko nam ná yi yiga, ba wó pa ko chɛ banto yera ne. Ba badwonna wó te jara wone, ye ba zwɛ ba badaara de mini. Ba ta wó zi ba badwonna ba vɔ, ye ba vere badwonna jejegero ba daare-ba. 34Wɛ nɔɔna bam ná zo cham dem konto wone, ba wó na wolim fenfee yerane mo. Balo na wó ba se ba woli ba wone to nam wó taa jege ni-zɛ ni-zɛ. 35Yi-pore-nyena bam badwonna wó to ba yaara yam ŋwaane. Wɛ nam wó tɔge ko baŋa ne o fɔge o kwɛ o nɔɔna bam se ba taa lana jase se ko vo ko yi kweelim maŋa kam. Kokuri to, kweelim maŋa kam ta lage ka yi mo.
36Baŋa seeni teo pɛ wom lage o toŋe o fera mo. O wó taa zeiŋi o tete wɛɛne, ye o daare o bere o tete we o dwoi wɛ dwi maama. O ta wó ta wo-zɔɔna o chɔge Wɛ wolo yerane na ye Wɛ chekke to yere. O nam wó na chwoŋa se o ke konto se ko vo ko yi maŋa kalo Wɛ ban-lom dem na wó ke ko ti to. Wɛ nam wó seene o ke se ko su o na boŋe se o ke tei to mo. 37Pɛ wom yiga bá taa wo o nabaara wa yam wone, de jwoni delo kaana na swoi se ba zuli to wone. O maŋe o bá nii wɛ de wɛ se de taa jege kuri de pa‑o. O nam wó taa bere o tete we wonto mo dwoi wa yam maama. 38O nam wó yage wa yanto yam, ye o leiri o kwei wɛ delo na nii dam jei to mo o taa zula. O nabaara déem nam yeiri wɛ dem konto. O maa wó kwei sabu-seŋa, de lu-nyenno, de kandwa-nyenno, de pɛɛra yalo na tiini ya ke sabu to o pa-de. 39Dwi-gɛ tiina wɛ dento wó woli‑o se o ke jara o vere o dona dam jei sem. Balo maama ná sɛ ba pa‑o, o wó zuli banto lanyerane. O ta wó pa ba taa nii nɔɔna dedɛ baŋa ne, ye o daare o kwei tega kalo o na vere o dona tei ne to o pɔɔre o pa-ba.
40Kweelim maŋa ná yia, tega-kuri seeni pɛ wom wó nwoŋi o ke jara ded‑o. Baŋa seeni pɛ wom maa wó ja jar-keira kɔgɔ dedɛ se o vo o jeeri‑o de dam. Ba badwonna wó taa dɔge sisein-nɔɔna baŋa ne, ye badwonna wo sisei-torokooro yuu ne, ko daare badwonna yɛ nabwooru ba via. O laam wó vo o kwaare jara teene dedɛ baŋa ne, pa se o chwooli-ba ne na-fɔrɔ na chwooli wonnu tei to. 41O ta wó ja jara o vo o yi te-ŋoŋa kam, ye o daare o pa se nɔɔna morro dedɛ to jara yam wone. Se ko ná ye Edom, de Moaba, de Amon kateiri delo ta na daare to, teene dem konto wó lu o jeŋa ne. 42O dam dem wó jage de yi teene dedɛ mo, ye Ejipti teo kom tete de bá lu o jeŋa ne. 43O maa wó jwoŋi Ejipti tiina sabu-seŋa kam, de ba lu-nyenno tem, de ba lonne zela maama o taa tei, ye o daare o pa Libia teo kom de Kusi teo kom taa wo o dam kuri ne. 44Kwora nam wó nwoŋi wɛ-puli seeni de baŋa seeni ka ba pa se o fom ka ŋwaane. O maa wó kwei o ban-lom dem o zaŋe o nwoŋi mo se o taa chɔge nɔɔna dedɛ fase. 45Ko kwaga ne, o wó vo o chwi o paare nenɔŋa vwoa yam nane-fɔrɔ kom de Wɛ tete peo kolo na ye wose to tetare laŋa ne mo. Ko nam na ye tei to, toone wó ba de yi‑o, ye nɔɔn-nɔɔno tera o na wó wane o woli‑o.”
Currently Selected:
Danyeli 11: KBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)